ഹൈദരാബാദ്: ഇന്ത്യയിലെ സ്വകാര്യ ബഹിരാകാശ മേഖലയ്ക്ക് പുത്തന് ഉണര്വ് നല്കിക്കൊണ്ട് സ്കൈറൂട്ട് എയറോസ്പേസിന്റെ ‘വിക്രം-1’ റോക്കറ്റ് വിക്ഷേപണത്തിനൊരുങ്ങുന്നു. ഭ്രമണപഥത്തിലേക്ക് ഉപഗ്രഹങ്ങളെ എത്തിക്കുന്ന ഇന്ത്യയിലെ ആദ്യ സ്വകാര്യ റോക്കറ്റായി വിക്രം-1 മാറും. റോക്കറ്റിലെ ഉപഗ്രഹങ്ങള് സൂക്ഷിക്കുന്ന ഭാഗമായ ‘പേലോഡ് ഫെയറിംഗ്’ ഹൈദരാബാദില് നിന്ന് ശ്രീഹരിക്കോട്ടയിലെ വിക്ഷേപണ കേന്ദ്രത്തിലേക്ക് യാത്രതിരിച്ചു.
വിക്രം-1 റോക്കറ്റിന്റെ നിര്ണ്ണായകമായ പരിശോധനകളെല്ലാം പൂര്ത്തിയായതായും വിക്ഷേപണത്തിന് മുന്നോടിയായുള്ള അവസാനഘട്ട നടപടികള് അടുത്ത ആഴ്ച ശ്രീഹരിക്കോട്ടയില് ആരംഭിക്കുമെന്നും സ്കൈറൂട്ട് സഹസ്ഥാപകന് നാഗ ഭരത് ഡാക്ക അറിയിച്ചു. തെലങ്കാന മുഖ്യമന്ത്രി എ. രേവന്ത് റെഡ്ഡിയുടെ സാന്നിധ്യത്തിലായിരുന്നു ഫ്ലാഗ്-ഓഫ് ചടങ്ങ് നടന്നത്. ബഹിരാകാശ മേഖലയില് ആഗോള തലത്തില് തന്നെ തെലങ്കാനയെ ഒരു പ്രധാന ഹബ്ബാക്കി മാറ്റുന്നതിലെ നിര്ണ്ണായക നാഴികക്കല്ലാണിതെന്ന് മുഖ്യമന്ത്രി പറഞ്ഞു.
ഇന്ത്യന് ബഹിരാകാശ പദ്ധതിയുടെ പിതാവായ ഡോ. വിക്രം സാരാഭായിയുടെ സ്മരണാര്ത്ഥമാണ് റോക്കറ്റിന് ‘വിക്രം’ എന്ന് പേര് നല്കിയിരിക്കുന്നത്. വിക്രം-1 റോക്കറ്റിന്റെ പ്രധാന സവിശേഷതകള് ഇവയാണ്. ലോഹങ്ങള്ക്ക് പകരം കാര്ബണ് കോമ്പോസിറ്റ് ഉപയോഗിച്ചാണ് റോക്കറ്റ് നിര്മ്മിച്ചിരിക്കുന്നത്. 3ഡി പ്രിന്റിംഗ് സാങ്കേതികവിദ്യ ഉപയോഗിച്ച് ഇന്ത്യയില് നിര്മ്മിച്ച എഞ്ചിനാണ് ഇതില് ഉപയോഗിച്ചിരിക്കുന്നത്. ഇത് നിര്മ്മാണച്ചെലവ് കുറയ്ക്കാനും വേഗത കൂട്ടാനും സഹായിക്കുന്നു.
ഭൂമിയില് നിന്ന് 160 കിലോമീറ്റര് മുതല് 2,000 കിലോമീറ്റര് വരെയുള്ള താഴ്ന്ന ഭ്രമണപഥത്തിലേക്ക് 350 കിലോ ഗ്രാം വരെയുള്ള ഉപഗ്രഹങ്ങളെ എത്തിക്കാന് ഇതിന് സാധിക്കും. റോക്കറ്റിലെ വിവിധ ഘട്ടങ്ങള്ക്ക് കലാം, രാമന്, ധവാന് എന്നിങ്ങനെ ഇന്ത്യയുടെ മഹാനായ ശാസ്ത്രജ്ഞരുടെ പേരുകളാണ് നല്കിയിരിക്കുന്നത്. 2022-ല് സബ്-ഓര്ബിറ്റല് വിക്ഷേപണം നടത്തി സ്കൈറൂട്ട് നേരത്തെ ചരിത്രം സൃഷ്ടിച്ചിരുന്നു. വിക്രം-1 വിക്ഷേപണത്തിലൂടെ ആഗോള വിപണിയില് ആവശ്യാനുസരണം ഉപഗ്രഹങ്ങള് വിക്ഷേപിക്കാനുള്ള സൗകര്യം ഒരുക്കുകയാണ് തങ്ങളുടെ ലക്ഷ്യമെന്ന് സി.ഇ.ഒ പവന് കുമാര് ചന്ദന പറഞ്ഞു.
ഇതോടൊപ്പം തന്നെ ഐ.എസ്.ആര്.ഒയുടെ വിശ്വസ്ത വാഹനമായ പി.എസ്.എല്.വിയുടെ സ്വകാര്യ മേഖലയില് നിര്മ്മിച്ച ആദ്യ പതിപ്പും ഈ വര്ഷം വിക്ഷേപിക്കപ്പെടുമെന്നാണ് പ്രതീക്ഷിക്കുന്നത്.
