തിരുവനന്തപുരം: സംസ്ഥാനത്ത് വൈദ്യുതി ഉപഭോഗം റെക്കോര്ഡുകള് ഭേദിക്കുന്ന സാഹചര്യത്തില്, വിതരണ ശൃംഖലയുടെ സുരക്ഷ മുന്നിര്ത്തി കെ.എസ്.ഇ.ബി നിയന്ത്രണങ്ങള് കടുപ്പിക്കുന്നു. പീക്ക് ലോഡ് സമയങ്ങളില് (രാത്രികാലങ്ങളില്) വൈദ്യുതി വിതരണം തടസ്സപ്പെടുമെന്ന വിവരം ഇനിമുതല് ഉപഭോക്താക്കളെ എസ്.എം.എസ് വഴി മുന്കൂട്ടി അറിയിക്കും. നേരത്തെ ‘ലോഡ് ഷെഡിങ്’ എന്ന പേരില് നടപ്പിലാക്കിയിരുന്ന രീതിക്ക് പകരം ‘പീക്ക് ലോഡ് മാനേജ്മെന്റ്’ അല്ലെങ്കില് ‘ലോഡ് റെസ്ട്രിക്ഷന്’ എന്ന പേരിലാണ് ഇപ്പോള് ക്രമീകരണം നടത്തുന്നത്.
രാത്രികാലങ്ങളില് 15 മിനിറ്റ് മുതല് അരമണിക്കൂര് വരെയായിരിക്കും കറന്റ് കളയുക. അപ്രഖ്യാപിത വൈദ്യുതി തടസ്സത്തിനെതിരെ പ്രതിഷേധം ശക്തമായതോടെയാണ് മുന്കൂട്ടി സന്ദേശം നല്കാന് തീരുമാനിച്ചത്. അമിത ഉപഭോഗം മൂലം ഫീഡറുകള് തകരാറിലാകുന്നത് ഒഴിവാക്കുക എന്നതാണ് ഈ ഒരു മാറ്റം കൊണ്ട് ലക്ഷ്യം വെക്കുന്നത്. വൈദ്യുതി പ്രതിസന്ധി നിലനില്ക്കുന്നുണ്ടെങ്കിലും സംസ്ഥാനത്ത് ഔദ്യോഗികമായി ലോഡ് ഷെഡിങ് ഏര്പ്പെടുത്തില്ലെന്ന് വൈദ്യുതി മന്ത്രി കെ. കൃഷ്ണന്കുട്ടി വ്യക്തമാക്കി. പുറത്തുനിന്ന് 250 മെഗാവാട്ട് വൈദ്യുതി വാങ്ങാന് റെഗുലേറ്ററി കമ്മിഷന് അനുമതി നല്കിയതാണ് നിലവില് ആശ്വാസമാകുന്നത്.
വേനല്മഴയുടെ കുറവ് കെ.എസ്.ഇ.ബിയെ വല്ലാതെ വലയ്ക്കുന്നുണ്ട്. ഡാമുകളിലെ ജലനിരപ്പ് സംഭരണശേഷിയുടെ 30 ശതമാനത്തിലേക്ക് താഴ്ന്നു. കഴിഞ്ഞ നാല് വര്ഷത്തെ അപേക്ഷിച്ച് ഏറ്റവും കുറഞ്ഞ ജലനിരപ്പാണ് നിലവിലുള്ളത്. 1279.59 ദശലക്ഷം യൂണിറ്റ് വൈദ്യുതി ഉല്പാദിപ്പിക്കാനുള്ള വെള്ളം മാത്രമാണ് ശേഷിക്കുന്നത്. കഴിഞ്ഞ വര്ഷങ്ങളെ അപേക്ഷിച്ച് ഇത് (2025 1641.424 MU, 2024 1513.958 MU, 2023 1463.776 MU, 2022 1598.964 MU) കുറഞ്ഞജലനിലയാണ്.
നിലവിലെ കണക്കനുസരിച്ച്, പ്രതിദിനം 25 ദശലക്ഷം യൂണിറ്റ് ഉല്പ്പാദിപ്പിച്ചാല് ഇനി 51 ദിവസത്തേക്ക് മാത്രമുള്ള വെള്ളമേ ഡാമുകളിലുള്ളൂ. കഴിഞ്ഞ ശനിയാഴ്ച 115.07 ദശലക്ഷം യൂണിറ്റായിരുന്ന ഉപഭോഗം, ഞായറാഴ്ചയായതിനാല് 108.80 യൂണിറ്റായി നേരിയ തോതില് കുറഞ്ഞിട്ടുണ്ട്.
