പെഷവാര്: മുംബൈ ഭീകരാക്രമണത്തിന്റെ സൂത്രധാരന് ഹാഫിസ് സയീദിന്റെ വിശ്വസ്തനും നിരോധിത സംഘടനയായ ലഷ്കര്-ഇ-തൊയ്ബയുടെ പ്രധാന നേതാവുമായ ഷെയ്ഖ് യൂസഫ് അഫ്രീദി വെടിയേറ്റു മരിച്ചു. പാകിസ്ഥാനിലെ ഖൈബര് പഖ്തുന്ഖ്വ പ്രവിശ്യയിലുണ്ടായ ആക്രമണത്തില് അജ്ഞാതരായ തോക്കുധാരികളാണ് ഇയാളെ വധിച്ചതെന്ന് പോലീസ് സ്ഥിരീകരിച്ചു. ഖൈബര് മേഖലയിലെ ലാന്ഡി കോട്ടലില് വെച്ചാണ് അഫ്രീദിക്ക് നേരെ ആക്രമണമുണ്ടായത്. ബൈക്കിലെത്തിയ അക്രമികള് ഇയാള്ക്ക് നേരെ തുരുതുരെ വെടിയുതിര്ക്കുകയായിരുന്നു.
സംഭവസ്ഥലത്തുതന്നെ മരണം സംഭവിച്ചു. ആക്രമണത്തിന്റെ ഉത്തരവാദിത്തം ഇതുവരെ ഒരു സംഘടനയും ഏറ്റെടുത്തിട്ടില്ല. ഖൈബര് പഖ്തുന്ഖ്വ മേഖലയില് ലഷ്കര്-ഇ-തൊയ്ബയുടെ പ്രവര്ത്തനങ്ങള് ഏകോപിപ്പിക്കുന്നതിലും പുതിയ ആളുകളെ ഭീകരപ്രവര്ത്തനങ്ങളിലേക്ക് ചേര്ക്കുന്നതിലും അഫ്രീദിക്ക് നിര്ണ്ണായക പങ്കുണ്ടായിരുന്നതായാണ് വിവരം. ഹാഫിസ് സയീദിന്റെ നേതൃത്വത്തിലുള്ള ജമാഅത്തുദ്ദവ വക്താക്കള് സംഭവത്തില് പ്രതിഷേധം രേഖപ്പെടുത്തി. അഫ്രീദി അറിയപ്പെടുന്ന മതപണ്ഡിതനായിരുന്നുവെന്നും അഹ്ലെ ഹദീസ് (സലഫി) വിഭാഗത്തിന്റെ പ്രധാന നേതാവായിരുന്നുവെന്നും അവര് അവകാശപ്പെട്ടു.
തെഹ്രീകെ താലിബാന് പാകിസ്ഥാന് പോലുള്ള തീവ്രവാദ ഗ്രൂപ്പുകളില് നിന്നുള്ള വെല്ലുവിളികള് ഇദ്ദേഹം നേരിട്ടിരുന്നതായും അവര് സൂചിപ്പിച്ചു. ലഷ്കര്-ഇ-തൊയ്ബയുടെ സ്ഥാപക നേതാക്കളിലൊരാളായ അമീര് ഹംസയ്ക്ക് ലാഹോറില് വെച്ച് വെടിയേറ്റതിന് തൊട്ടുപിന്നാലെയാണ് അഫ്രീദിയുടെ മരണം എന്നത് ശ്രദ്ധേയമാണ്. ലഷ്കര് കേന്ദ്രങ്ങളില് വലിയ പരിഭ്രാന്തിയാണ് ഈ സംഭവങ്ങള് സൃഷ്ടിച്ചിരിക്കുന്നത്. നിലവില് ഭീകരവാദത്തിന് പണം നല്കിയ കേസുകളില് ശിക്ഷിക്കപ്പെട്ട് ലാഹോറിലെ കോട്ട് ലഖ്പത് ജയിലില് കഴിയുകയാണ് ഹാഫിസ് സയീദ്.
സംഭവത്തില് പ്രാദേശിക ഭരണകൂടം അന്വേഷണം ആരംഭിച്ചിട്ടുണ്ട്. അക്രമികളെ കണ്ടെത്താനായി ഖൈബര് മേഖലയില് സുരക്ഷ ശക്തമാക്കി.
