മലപ്പുറം: കേരളത്തിന്റെ അടുത്ത മുഖ്യമന്ത്രി മുസ്ലീം ലീഗ് നേതാവ് പികെ കുഞ്ഞാലിക്കുട്ടി ആവട്ടെയെന്ന് നിർദ്ദേശം. സുന്നി മഹല്ല് ഫെഡറേഷന്‍(എസ്എംഎഫ്) നേതാവ് അസ്ലം മഷ്ഹൂര്‍ തങ്ങളാണ് മുഖ്യമന്ത്രി സ്ഥാനത്തേക്ക് പി കെ കുഞ്ഞാലിക്കുട്ടിക്ക് മുഖ്യമന്ത്രി സ്ഥാനത്തേക്ക് പിന്തുണയുമായി രംഗത്തെത്തിയത് . ചെമ്മാട് ദാറുല്‍ ഹുദയില്‍ നടന്ന എസ്എംഎഫ് ഗോള്‍ഡന്‍ ജൂബിലി പ്രഖ്യാപന വേദിയിലായിരുന്നു കുഞ്ഞാലിക്കുട്ടിയെ വേദിയിലിരുത്തി കൊണ്ട് ഈ പരാമര്‍ശം.
മെയ് നാലാം തിയ്യതി വോട്ടെണ്ണല്‍ കഴിയുമ്പോള്‍ കുഞ്ഞാലിക്കുട്ടി മുഖ്യമന്ത്രി ആയിട്ടു വരട്ടെയെന്നായിരുന്നു പരാമര്‍ശം. മുസ്ലിം ലീഗ് പ്രസിഡന്റ് പാണക്കാട് സാദിഖലി തങ്ങളടക്കം മുതിര്‍ന്ന മുസ്ലിം ലീഗ് നേതാക്കള്‍ പലരും ആ വേദിയിൽ സന്നിഹിതരായിരുന്നെങ്കിലും എസ്എംഎഫ് സംസ്ഥാന ഭാരവാഹിയുടെ പരാമര്‍ശം ആരും തിരുത്തിയില്ല.
വേദിയിലുണ്ടായിരുന്ന പികെ കുഞ്ഞാലിക്കുട്ടി അടക്കമുള്ള നേതാക്കള്‍ പുഞ്ചിരിയോടെയാണ് പ്രസംഗത്തോട് പ്രതികരിച്ചത്. യുഡിഎഫ് അധികാരത്തില്‍ വന്നാല്‍ കുഞ്ഞാലിക്കുട്ടി വഹിക്കേണ്ട സ്ഥാനത്തെക്കുറിച്ച് നിരവധി ചർച്ചകൾ നടക്കുന്നുണ്ട്. മുസ്ലിം ലീഗിന് ഉപമുഖ്യമന്ത്രി സ്ഥാനം എന്നുള്ള വാദം പ്രചരിക്കുന്നുണ്ട്. അതിനിടെയാണ് സുന്നി മഹല്ല് ഫെഡറേഷന്റെ വേദിയില്‍ നിന്നും ഇത്തരമൊരു പരാമര്‍ശം.
