ഇടുക്കി: മംഗളാദേവി കണ്ണകി ക്ഷേത്രത്തിലെ ചിത്ര പൗര്ണ്ണമി ഉത്സവത്തിനെത്തിയ തീര്ത്ഥാടകര്ക്ക് ഇടിമിന്നലേറ്റു. വെള്ളിയാഴ്ച വൈകുന്നേരം അഞ്ച് മണിയോടെ കാനനപാതയിലെ ഒന്പതാം വളവില് വെച്ചാണ് അപകടമുണ്ടായത്. ഡ്യൂട്ടിയിലുണ്ടായിരുന്ന ഒരു പോലീസുകാരനും തമിഴ്നാട് സ്വദേശികളായ തീര്ത്ഥാടകരുമടക്കം 11 പേര്ക്കാണ് പരിക്കേറ്റത്. ഉത്സവത്തിന് ശേഷം മലയിറങ്ങി വരുന്നതിനിടെയാണ് അപ്രതീക്ഷിതമായി ശക്തമായ ഇടിമിന്നലുണ്ടായത്.
മിന്നലിന്റെ ആഘാതത്തില് പാതയിലുണ്ടായിരുന്നവര് നിലത്തു വീഴുകയായിരുന്നു. ഇടുക്കി ജില്ലാ ആസ്ഥാനത്തെ സി.പി.ഒ അന്സാറിന്റെ ഇടത് കൈമുട്ടിന് വീഴ്ചയില് പൊട്ടലേറ്റു. അദ്ദേഹത്തെ ഉടന് തന്നെ പാലായിലെ സ്വകാര്യ ആശുപത്രിയിലേക്ക് മാറ്റി. തിരുവനന്തപുരം സ്വദേശി വിഷ്ണു, കമ്പം സ്വദേശി ധനലക്ഷ്മി, ചിന്നമന്നൂര് സ്വദേശികളായ ലോകമണി, പൊന്നു സ്വമി, തൃശ്ശൂര് സ്വദേശികളായ രമ്യ, ബ്രോണ്സ്കി, കട്ടപ്പന സ്വദേശികളായ ഗിരീഷ്, ശ്രീലക്ഷ്മി, ഏറ്റുമാനൂര് സ്വദേശികളായ അശ്വതി, അഭിനന്ദ് എന്നവര്ക്കാണ് പരിക്കേറ്റത്.
ആരുടെയും പരിക്ക് ഗുരുതരമല്ലെന്നും എല്ലാവരും പ്രാഥമിക ചികിത്സയ്ക്ക് ശേഷം നിരീക്ഷണത്തിലാണെന്നും അധികൃതര് അറിയിച്ചു. സംസ്ഥാനത്ത് വേനല്മഴ ശക്തമാകുന്ന സാഹചര്യത്തില് ഇടിമിന്നലിനെതിരെ അതീവ ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിര്ദ്ദേശിച്ചു. കാര്മേഘം കണ്ടുതുടങ്ങുമ്പോള് തന്നെ സുരക്ഷിതമായ കെട്ടിടങ്ങളിലേക്ക് മാറണം. ഇടിമിന്നല് ദൃശ്യമായില്ലെങ്കിലും അപകടസാധ്യത നിലനില്ക്കുന്നുണ്ട്. മൈതാനങ്ങള്, മരച്ചുവടുകള്, മലമുകളിലെ പാറക്കൂട്ടങ്ങള് എന്നിവിടങ്ങളില് നില്ക്കുന്നത് ഒഴിവാക്കണം.
ഇടിമിന്നല് സമയത്ത് ഇലക്ട്രോണിക് ഉപകരണങ്ങളുടെ പ്ലഗ്ഗുകള് ഊരിയിടുകയും ലാന്ഡ് ഫോണ് ഉപയോഗിക്കുന്നത് ഒഴിവാക്കുകയും ചെയ്യുക. മനുഷ്യജീവനും വൈദ്യുത ശൃംഖലകള്ക്കും വലിയ നാശനഷ്ടമുണ്ടാക്കാന് ശേഷിയുള്ളതിനാല് ഇടിമിന്നല് സമയത്ത് ജാഗ്രത കൈവിടരുതെന്ന് അധികൃതര് ഓര്മ്മിപ്പിച്ചു.
