ഗാസിയാബാദ്: ഉത്തര്‍പ്രദേശിലെ ഗാസിയാബാദില്‍ ക്ഷേത്രദര്‍ശനം കഴിഞ്ഞ് മടങ്ങുകയായിരുന്ന കുടുംബത്തിന് നേരെ മുസ്‌ളീം യുവാക്കളുടെ അക്രമം. കോട്വാലി പോലീസ് സ്റ്റേഷന്‍ പരിധിയിലെ കേല ഭട്ട എന്ന സ്ഥലത്ത് വെച്ചുണ്ടായ സംഘര്‍ഷത്തില്‍ ഗര്‍ഭിണിയായ സ്ത്രീ ഉള്‍പ്പെടെ ഒമ്പത് പേര്‍ക്ക് പരിക്കേറ്റു. സംഭവത്തില്‍ പത്ത് പേരെ പോലീസ് കസ്റ്റഡിയിലെടുത്തു. വെള്ളിയാഴ്ച വൈകുന്നേരം 6 മണിയോടെയാണ് സംഭവം നടന്നത്. കൈല ഭട്ടയില്‍ താമസിക്കുന്ന ടിങ്കു സിംഗും കുടുംബവും ദേവി ക്ഷേത്രത്തില്‍ പ്രാര്‍ത്ഥന കഴിഞ്ഞ് മടങ്ങുകയായിരുന്നു.
യാത്രാമധ്യേ റോഡിലൂടെ നടക്കുന്നതിനെച്ചൊല്ലി മറ്റൊരു വിഭാഗവുമായുണ്ടായ തര്‍ക്കമാണ് വലിയ അക്രമത്തില്‍ കലാശിച്ചത്. ഉമര്‍ റേഷന്‍ കടയ്‌ക്ക് സമീപം വെച്ച് ഒരു സംഘം യുവാക്കള്‍ ഇഷ്ടികകളും കല്ലുകളും ഉപയോഗിച്ച് കുടുംബത്തെ ആക്രമിക്കുകയായിരുന്നുവെന്ന് പോലീസ് പറഞ്ഞു. ആക്രമണത്തില്‍ പരിക്കേറ്റ ഒമ്പത് പേരെയും ഉടന്‍ തന്നെ അടുത്തുള്ള ആശുപത്രിയില്‍ പ്രവേശിപ്പിച്ചു. സംഭവം നടന്നയുടന്‍ സിറ്റി ഡെപ്യൂട്ടി പോലീസ് കമ്മീഷണര്‍ ധവാല്‍ ജയ്‌സ്വാളിന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി സ്ഥിതിഗതികള്‍ ശാന്തമാക്കി.
അക്രമത്തില്‍ പങ്കുണ്ടെന്ന് സംശയിക്കുന്ന 10 പേരെ പോലീസ് ഇതിനോടകം കസ്റ്റഡിയിലെടുത്തിട്ടുണ്ട്. ഐപിസിയിലെ പ്രസക്തമായ വകുപ്പുകള്‍ പ്രകാരം പ്രതികള്‍ക്കെതിരെ കേസെടുത്തു. സ്ത്രീകളെ ഉപദ്രവിച്ചതായും വസ്ത്രങ്ങള്‍ വലിച്ചുകീറിയതായും കുടുംബം പരാതിപ്പെട്ടിട്ടുണ്ട്. ‘റോഡിലൂടെ നടക്കുന്നതിനെച്ചൊല്ലിയുണ്ടായ നിസാര തര്‍ക്കമാണ് കല്ലേറിലും അക്രമത്തിലും അവസാനിച്ചത്. നിലവില്‍ പ്രദേശത്ത് സമാധാനം നിലനില്‍ക്കുന്നുണ്ട്. കുറ്റവാളികള്‍ക്കെതിരെ കര്‍ശന നടപടി സ്വീകരിക്കും.’ – ധവാല്‍ ജയ്‌സ്വാള്‍ പറഞ്ഞു.
പ്രദേശത്ത് സംഘര്‍ഷാവസ്ഥ ഒഴിവാക്കാന്‍ കൂടുതല്‍ പോലീസിനെ വിന്യസിച്ചിട്ടുണ്ട്. അക്രമത്തിന് പിന്നില്‍ കൃത്യമായ ആസൂത്രണമുണ്ടോ എന്ന് പോലീസ് അന്വേഷിച്ചുവരികയാണ്. കൂടുതല്‍ പ്രതികള്‍ക്കായി തിരച്ചില്‍ ഊര്‍ജ്ജിതമാക്കി.
