കാസര്കോട്: മഞ്ചേശ്വരം നിയമസഭാ തിരഞ്ഞെടുപ്പിലെ പരാജയം തുറന്നുസമ്മതിച്ച് എന്ഡിഎ സ്ഥാനാര്ത്ഥിയും ബിജെപി മുന് സംസ്ഥാന അധ്യക്ഷനുമായ കെ. സുരേന്ദ്രന്. തോല്വിക്ക് ന്യായീകരണങ്ങള് നല്കാനില്ലെന്നും പരാജയത്തിന്റെ കാരണങ്ങള് വോട്ടര്മാര്ക്ക് തന്നെ വിലയിരുത്താമെന്നും അദ്ദേഹം തന്റെ ഫെയ്സ്ബുക്ക് കുറിപ്പിലൂടെ വ്യക്തമാക്കി.
തിരഞ്ഞെടുപ്പ് ഫലം എന്തുതന്നെയായാലും മഞ്ചേശ്വരത്തെ ജനങ്ങളുമായുള്ള ബന്ധം തുടരുമെന്ന് അദ്ദേഹം ഉറപ്പുനല്കി. മരണം വരെ മഞ്ചേശ്വരത്തുകാര്ക്കൊപ്പം താന് ഉണ്ടാകുമെന്ന് പറഞ്ഞ സുരേന്ദ്രന്, വികസന കാര്യങ്ങളില് വിവേചനം അനുഭവിക്കുന്നവര്ക്കും സമൂഹത്തിന്റെ താഴെത്തട്ടിലുള്ളവര്ക്കും വേണ്ടി ഏതു സമയത്തും മുന്പന്തിയില് ഉണ്ടാകുമെന്നും കൂട്ടിച്ചേര്ത്തു.
മലയാളത്തിന് പുറമെ കന്നഡ ഭാഷയിലും സുരേന്ദ്രന് കുറിപ്പ് പങ്കുവെച്ചിട്ടുണ്ട്. ‘നന്ദി പ്രിയപ്പെട്ട മഞ്ചേശ്വരം’ എന്ന് കുറിച്ചുകൊണ്ടാണ് അദ്ദേഹം തന്റെ വാക്കുകള് അവസാനിപ്പിച്ചത്. വരും ദിവസങ്ങളില് മണ്ഡലത്തിലെ വികസന മുരടിപ്പിനും അവഗണനയ്ക്കുമെതിരെ ജനപക്ഷത്തുനിന്ന് പ്രവര്ത്തിക്കുമെന്ന സൂചനയും അദ്ദേഹം കുറിപ്പിലൂടെ നല്കുന്നു.
ഫേയ്സ്ബുക്ക് പോസ്റ്റിന്റെ പൂര്ണരൂപം:
തെരഞ്ഞെടുപ്പില് വീണ്ടും തോറ്റു. തോറ്റതിനു ന്യായീകരണങ്ങളില്ല. തോറ്റതെങ്ങനെയെന്നു വോട്ടര്മാര്ക്കു അവരുടെ ഇഷ്ടാനുസരണം വിലയിരുത്താം. ഒരു കാര്യം ഉറപ്പ്. മഞ്ചേശ്വരത്തുകാരോടൊപ്പം മരണം വരെ ഉണ്ടാവും. പാവപ്പെട്ടവരുടേയും പാര്ശ്വവല്ക്കരിക്കപ്പെട്ടവരുടേയും അവഗണിക്കപ്പെട്ടവരുടേയും വികസനകാര്യങ്ങളില് വിവേചനം നേരിട്ടവരുടേയും കൂടെ ഏതാവശ്യത്തിനും ഏതു സമയത്തും. നന്ദി പ്രിയപ്പെട്ട മഞ്ചേശ്വരം…
