ന്യൂഡല്‍ഹി: യുഎഇയിലെ ഫുജൈറ പെട്രോളിയം ഇന്‍ഡസ്ട്രീസ് സോണിന് നേരെ ഇറാന്‍ നടത്തിയ ആക്രമണത്തെ ഇന്ത്യ ശക്തമായി അപലപിച്ചു. ആക്രമണത്തില്‍ മൂന്ന് ഇന്ത്യന്‍ പൗരന്മാര്‍ക്ക് പരിക്കേറ്റ പശ്ചാത്തലത്തില്‍, വിദേശകാര്യ മന്ത്രാലയം ഔദ്യോഗികമായി തങ്ങളുടെ പ്രതിഷേധം രേഖപ്പെടുത്തി. യുഎസ്-ഇറാന്‍ സംഘര്‍ഷം പശ്ചിമേഷ്യയില്‍ ആഗോള തലത്തില്‍ തന്നെ ആശങ്കയുണ്ടാക്കുന്ന സാഹചര്യത്തിലാണ് ഇന്ത്യയുടെ ഈ ഇടപെടല്‍.
സിവിലിയന്‍ ഇന്‍ഫ്രാസ്ട്രക്ചറുകള്‍ക്കും സാധാരണക്കാര്‍ക്കും നേരെയുള്ള ആക്രമണങ്ങള്‍ ഒരു തരത്തിലും നീതീകരിക്കാനാവില്ലെന്ന് വിദേശകാര്യ മന്ത്രാലയ വക്താവ് രണ്‍ധീര്‍ ജയ്സ്വാള്‍ എക്‌സില്‍ കുറിച്ചു. ഇത്തരം ശത്രുതാപരമായ പ്രവണതകള്‍ അവസാനിപ്പിക്കണമെന്നും അദ്ദേഹം ആവശ്യപ്പെട്ടു. മേഖലയില്‍ സമാധാനം ഉറപ്പാക്കാന്‍ ആവശ്യമായ പ്രധാന കാര്യങ്ങള്‍ വിദേശകാര്യ മന്ത്രാലയം ചൂണ്ടിക്കാട്ടി. തോക്കുകള്‍ കൊണ്ട് പ്രശ്‌നങ്ങള്‍ പരിഹരിക്കുന്നതിന് പകരം ക്രിയാത്മകമായ ചര്‍ച്ചകളിലൂടെ സമാധാനം പുനഃസ്ഥാപിക്കണം.
അന്താരാഷ്‌ട്ര നിയമങ്ങള്‍ പാലിച്ച് ഹോര്‍മുസ് കടലിടുക്കിലൂടെയുള്ള വ്യാപാരവും ചരക്ക് നീക്കവും തടസ്സമില്ലാതെ നടക്കുമെന്ന് ഉറപ്പുവരുത്തണം. പശ്ചിമേഷ്യന്‍ സംഘര്‍ഷങ്ങള്‍ ലഘൂകരിക്കാനുള്ള ഏത് സമാധാന ശ്രമങ്ങള്‍ക്കും ഇന്ത്യയുടെ പൂര്‍ണ്ണ സഹകരണം ഉണ്ടാകും. മേഖലയിലെ സുരക്ഷാ സാഹചര്യങ്ങള്‍ ഇന്ത്യ സൂക്ഷ്മമായി നിരീക്ഷിച്ചു വരികയാണ്. പരിക്ക് പറ്റിയ ഇന്ത്യന്‍ പൗരന്മാര്‍ക്ക് ആവശ്യമായ സഹായങ്ങള്‍ ഉറപ്പാക്കുമെന്നും മന്ത്രാലയം വ്യക്തമാക്കി.
