വിതുര: രോഗികളും ജീവനക്കാരും എപ്പോഴും തിരക്കേറുന്ന വിതുര താലൂക്ക് ആശുപത്രിയിലെ ക്യാഷ്വാലിറ്റിക്കുള്ളില് അണലി കുഞ്ഞിനെ കണ്ടെത്തി. ഇന്ന് രാവിലെയായിരുന്നു സംഭവം. ആശുപത്രി പ്രവര്ത്തനങ്ങള്ക്കിടെ അപ്രതീക്ഷിതമായാണ് സ്റ്റെപ്പിനടിയിലെ ദ്വാരത്തില് പാമ്പ് ഒളിച്ചിരിക്കുന്നത് ജീവനക്കാരുടെ ശ്രദ്ധയില്പ്പെട്ടത്.
പാമ്പിനെ കണ്ട ഉടന് തന്നെ ജീവനക്കാര് പരിഭ്രാന്തരാകാതെ ദ്വാരം പഞ്ഞി ഉപയോഗിച്ച് അടച്ചു. തുടര്ന്ന് പരുത്തിപ്പള്ളിയിലെ വനംവകുപ്പിന്റെ റാപ്പിഡ് റെസ്പോണ്സ് ടീമിനെ വിവരമറിയിച്ചു. ആര്.ആര്.ടി അംഗമായ റോഷിനി സ്ഥലത്തെത്തി അതീവ ജാഗ്രതയോടെയാണ് അണലി കുഞ്ഞിനെ പിടികൂടിയത്. ക്യാഷ്വാലിറ്റിയിലെ പടികള്ക്കിടയിലുള്ള വിടവില് നിന്നാണ് പാമ്പിനെ കണ്ടെത്തിയത്.
പിടികൂടിയത് അണലി കുഞ്ഞായതിനാല് തന്നെ പരിസരപ്രദേശങ്ങളില് കൂടുതല് പാമ്പുകള് ഉണ്ടാകാനുള്ള സാധ്യത തള്ളിക്കളയാനാവില്ലെന്ന് വനംവകുപ്പ് ഉദ്യോഗസ്ഥര് അറിയിച്ചു. ആശുപത്രി പരിസരത്ത് ആര്.ആര്.ടി ടീം വിശദമായ പരിശോധന തുടരുകയാണ്. ആശുപത്രി പോലെ അതീവ സുരക്ഷ വേണ്ടയിടങ്ങളില് പാമ്പുകള് എത്തുന്നത് രോഗികളിലും ബന്ധുക്കളിലും വലിയ ആശങ്കയുണ്ടാക്കിയിട്ടുണ്ട്. സ്റ്റെപ്പുകള്ക്കിടയിലെ ദ്വാരങ്ങളും മറ്റും അടച്ച് സുരക്ഷിതമാക്കണമെന്ന് ആവശ്യമുയര്ന്നിട്ടുണ്ട്.
