ബെംഗളൂരു: പ്രധാനമന്ത്രി നരേന്ദ്ര മോദി പങ്കെടുത്ത ചടങ്ങുകള്‍ നടന്ന സ്ഥലത്തിന് തൊട്ടടുത്ത് സ്‌ഫോടകവസ്തുക്കള്‍ കണ്ടെടുത്തത് സുരക്ഷാ ഏജന്‍സികളെ പരിഭ്രാന്തരാക്കി. കനകപുര റോഡിന് സമീപമുള്ള താതഗുണിയില്‍ നിന്നാണ് രണ്ട് ജലാറ്റിന്‍ സ്റ്റിക്കുകള്‍ പോലീസ് കണ്ടെടുത്തത്. പ്രധാനമന്ത്രി സന്ദര്‍ശിച്ച ആര്‍ട്ട് ഓഫ് ലിവിംഗ് സെന്ററില്‍ നിന്ന് വെറും മൂന്ന് കിലോമീറ്റര്‍ മാത്രം അകലെയാണിത്. സംഭവത്തില്‍ ഒരാളെ പോലീസ് കസ്റ്റഡിയിലെടുത്തിട്ടുണ്ട്.
പ്രധാനമന്ത്രിയുടെ സന്ദര്‍ശനത്തോടനുബന്ധിച്ച് കാഗ്ഗലിപുര പോലീസ് സ്റ്റേഷന്‍ പരിധിയില്‍ നടത്തിയ കര്‍ശനമായ തിരച്ചിലിനിടയിലാണ് റോഡരികില്‍ ഉപേക്ഷിക്കപ്പെട്ട നിലയില്‍ സ്‌ഫോടകവസ്തുക്കള്‍ ശ്രദ്ധയില്‍പ്പെട്ടത്. ഉടന്‍ തന്നെ ബോംബ് സ്‌ക്വാഡും ഫോറന്‍സിക് ഉദ്യോഗസ്ഥരും സ്ഥലത്തെത്തി പരിശോധനകള്‍ പൂര്‍ത്തിയാക്കി.
സ്‌ഫോടകവസ്തുക്കള്‍ കണ്ടെത്തിയതിന് പിന്നാലെ കോറമംഗല സ്വദേശിയായ ഒരാളെ പോലീസ് കസ്റ്റഡിയിലെടുത്തു. ആര്‍ട്ട് ഓഫ് ലിവിംഗ് സെന്ററിലും എച്ച്.എ.എല്ലിലും സ്‌ഫോടനം നടക്കുമെന്ന് ഇയാള്‍ നേരത്തെ അധികൃതര്‍ക്ക് സന്ദേശം നല്‍കിയിരുന്നതായാണ് വിവരം. ഇയാളെ നിലവില്‍ രഹസ്യ കേന്ദ്രത്തില്‍ ചോദ്യം ചെയ്തു വരികയാണ്. ഇയാള്‍ക്ക് പിന്നില്‍ മറ്റാരെങ്കിലും ഉണ്ടോ എന്ന് പോലീസ് അന്വേഷിക്കുന്നുണ്ട്.
ആര്‍ട്ട് ഓഫ് ലിവിംഗ് ഫൗണ്ടേഷന്റെ 45-ാം വാര്‍ഷികാഘോഷങ്ങളില്‍ പങ്കെടുക്കാനാണ് പ്രധാനമന്ത്രി നരേന്ദ്ര മോദി ബെംഗളൂരുവിലെത്തിയത്. ആശ്രമത്തിലെ പുതിയ ധ്യാനമന്ദിരം ഉദ്ഘാടനം ചെയ്ത അദ്ദേഹം എച്ച്.എ.എല്‍ വിമാനത്താവളത്തിന് സമീപം നടന്ന ബിജെപി റാലിയെയും അഭിസംബോധന ചെയ്തു. അതീവ സുരക്ഷാ മേഖലയില്‍ സ്‌ഫോടകവസ്തുക്കള്‍ കണ്ടെത്തിയത് ഗൗരവകരമായാണ് അധികൃതര്‍ കാണുന്നത്.
