കോഴിക്കോട്: രാമനാട്ടുകര എയര്‍പോര്‍ട്ട് റോഡിലെ ഏഷ്യന്‍ പെയിന്റ്സ് ഔട്ട്ലെറ്റിലുണ്ടായ വന്‍ തീപ്പിടിത്തത്തില്‍ ഉടമയ്‌ക്ക് കോടികളുടെ നഷ്ടം. കടയിലുണ്ടായിരുന്ന ഒന്നരക്കോടി രൂപ വിലമതിക്കുന്ന സ്റ്റോക്കും ഒന്‍പതര ലക്ഷത്തോളം രൂപയുടെ പണവും പൂര്‍ണ്ണമായും കത്തിയമര്‍ന്നു. ഞായറാഴ്ച ഉച്ചയ്‌ക്ക് ഒരു മണിയോടെയായിരുന്നു അപകടം. ഞായറാഴ്ചയായതിനാല്‍ രാവിലെ ഒരു മണിക്കൂര്‍ മാത്രം പ്രവര്‍ത്തിച്ച ശേഷം കട പൂട്ടി ഉടമ വീട്ടിലേക്ക് മടങ്ങിയിരുന്നു. ഇതിന് പിന്നാലെയാണ് കടയ്‌ക്കുള്ളില്‍ നിന്ന് തീ ഉയരുന്നത് സമീപത്തെ വ്യാപാരികളുടെ ശ്രദ്ധയില്‍പ്പെട്ടത്.
ഉടന്‍ തന്നെ ഫയര്‍ഫോഴ്സിനെ വിവരമറിയിക്കുകയായിരുന്നു. മീഞ്ചന്തയില്‍ നിന്നും മലപ്പുറത്തു നിന്നുമായി എത്തിയ നാല് യൂണിറ്റ് അഗ്‌നിരക്ഷാ സേന ഒരു മണിക്കൂര്‍ പണിപ്പെട്ടാണ് തീ നിയന്ത്രണവിധേയമാക്കിയത്. കടയുടെ ഡിസ്പ്ലേയില്‍ വെച്ചിരുന്ന ഏതാനും പെയിന്റ് ടിന്നുകള്‍ ഒഴികെ മറ്റെല്ലാം അഗ്‌നിക്കിരയായി. ഒന്നരക്കോടിയുടെ സാമഗ്രികള്‍ക്ക് പുറമെ, 9,35,000 രൂപയുടെ കറന്‍സി നോട്ടുകളും കത്തിപ്പോയതായി കടയുടമ പറഞ്ഞു. ശനി, ഞായര്‍ ദിവസങ്ങളില്‍ ബാങ്ക് അവധിയായതിനാലാണ് ഇത്രയും വലിയ തുക കടയ്‌ക്കുള്ളിലെ ലോക്കറില്‍ സൂക്ഷിക്കേണ്ടി വന്നതെന്ന് അദ്ദേഹം വ്യക്തമാക്കി.
ഷോര്‍ട്ട് സര്‍ക്യൂട്ടാണോ അപകടകാരണമെന്ന് അധികൃതര്‍ പരിശോധിച്ചുവരികയാണ്. തീപ്പിടിത്തത്തിന്റെ കൃത്യമായ കാരണം കണ്ടെത്താന്‍ പോലീസ് അന്വേഷണം ആരംഭിച്ചു.
