ന്യൂഡല്‍ഹി: ഇസ്രായേല്‍-ഇറാന്‍ സംഘര്‍ഷത്തെത്തുടര്‍ന്ന് ആഗോള സാമ്പത്തിക രംഗത്തുണ്ടായ അസ്ഥിരത മറികടക്കാന്‍ രാജ്യത്തെ ജനങ്ങളുടെ സഹകരണം തേടി പ്രധാനമന്ത്രി നരേന്ദ്ര മോദി. വര്‍ദ്ധിച്ചുവരുന്ന ഇന്ധനവിലയും വിദേശനാണ്യ ശേഖരത്തിലുണ്ടാകുന്ന കുറവും കണക്കിലെടുത്ത് നിയന്ത്രണങ്ങള്‍ പാലിക്കാന്‍ അദ്ദേഹം ജനങ്ങളോട് ആഭ്യര്‍ത്ഥിച്ചു. ഒരു വര്‍ഷത്തേക്ക് വിവാഹങ്ങള്‍ക്കും മറ്റും സ്വര്‍ണ്ണം വാങ്ങുന്നത് ഒഴിവാക്കണമെന്ന നിര്‍ദ്ദേശമാണ് ഇതില്‍ ഏറ്റവും ശ്രദ്ധേയം.
വിദേശനാണ്യം പുറത്തേക്ക് പോകുന്നത് തടയാന്‍ അടുത്ത ഒരു വര്‍ഷത്തേക്ക് വിവാഹ ആവശ്യങ്ങള്‍ക്കായി പോലും പുതിയ സ്വര്‍ണ്ണം വാങ്ങുന്നത് പരമാവധി ഒഴിവാക്കണം. അന്താരാഷ്‌ട്ര വിപണിയില്‍ അസംസ്‌കൃത എണ്ണവില ബാരലിന് 126 ഡോളറിലേക്ക് ഉയര്‍ന്ന സാഹചര്യത്തില്‍ അനാവശ്യ യാത്രകള്‍ ഒഴിവാക്കി ഇന്ധനം ലാഭിക്കണം. ഇന്ധന ഉപഭോഗം കുറയ്‌ക്കുന്നതിനായി തൊഴിലിടങ്ങളില്‍ ‘വര്‍ക്ക് ഫ്രം ഹോം’ രീതിയും വീഡിയോ കോണ്‍ഫറന്‍സിംഗും വീണ്ടും സജീവമാക്കാന്‍ അദ്ദേഹം ആഹ്വാനം ചെയ്തു.
പശ്ചിമേഷ്യയിലെ യുദ്ധസാഹചര്യം വിതരണ ശൃംഖലകളെ ഗുരുതരമായി ബാധിച്ചിരിക്കുകയാണ്. ഇന്ത്യയിലെ എണ്ണക്കമ്പനികള്‍ പ്രതിമാസം ഏകദേശം 30,000 കോടി രൂപയുടെ നഷ്ടം നേരിടുന്നുണ്ടെന്നാണ് കണക്കുകള്‍. പ്രധാന എണ്ണ ഇറക്കുമതി പാതയായ ഹോര്‍മുസ് കടലിടുക്കിലെ ഗതാഗത തടസ്സം ഗ്യാസ്, വളം വിതരണത്തെയും പ്രതിസന്ധിയിലാക്കിയിട്ടുണ്ട്.
ദേശീയ കടമ എന്ന നിലയില്‍ ഈ നിര്‍ദ്ദേശങ്ങള്‍ പാലിക്കാന്‍ ഓരോ പൗരനും തയ്യാറാകണമെന്ന് പ്രധാനമന്ത്രി ഓര്‍മ്മിപ്പിച്ചു. അന്താരാഷ്‌ട്ര തലത്തിലുള്ള വെല്ലുവിളികള്‍ക്കിടയിലും രാജ്യത്തിന്റെ സാമ്പത്തിക ഭദ്രത ഉറപ്പാക്കാന്‍ ജനങ്ങളുടെ പിന്തുണ അനിവാര്യമാണെന്ന് അദ്ദേഹം കൂട്ടിച്ചേര്‍ത്തു.
