ന്യൂഡല്ഹി: ഡല്ഹിയിലെ സാധാരണക്കാരായ വീട്ടമ്മമാരുടെ കാത്തിരിപ്പിന് വിരാമമിട്ടുകൊണ്ട് ബിജെപി സര്ക്കാരിന്റെ സ്വപ്ന പദ്ധതിയായ ‘ഡല്ഹി ലക്ഷ്മി യോജന’ യാഥാര്ത്ഥ്യമാകുന്നു. സാമ്പത്തികമായി പിന്നാക്കം നില്ക്കുന്ന ലക്ഷക്കണക്കിന് സ്ത്രീകള്ക്ക് പ്രതിമാസം 2,500 രൂപ നേരിട്ട് ലഭ്യമാക്കുന്ന പദ്ധതിയുടെ രജിസ്ട്രേഷന് ജൂണ് മാസം മുതല് ആരംഭിക്കാനാണ് സര്ക്കാര് തീരുമാനം. ഡല്ഹി നിയമസഭാ തിരഞ്ഞെടുപ്പ് വേളയില് ബിജെപി നല്കിയ പ്രധാന വാഗ്ദാനങ്ങളിലൊന്നാണ് ഇതോടെ നടപ്പിലാകുന്നത്. മുന്പ് ‘മഹിളാ സമൃദ്ധി യോജന’ എന്ന് അറിയപ്പെട്ടിരുന്ന പദ്ധതി, കൂടുതല് ആകര്ഷകമായ രീതിയില് പരിഷ്കരിച്ചാണ് ‘ഡല്ഹി ലക്ഷ്മി യോജന’ എന്ന പേരില് അവതരിപ്പിച്ചിരിക്കുന്നത്.
മുഖ്യമന്ത്രി രേഖാ ഗുപ്തയുടെ നേതൃത്വത്തിലുള്ള സര്ക്കാര്, 2026-27 സാമ്പത്തിക വര്ഷത്തെ ബജറ്റില് 5,100 കോടി രൂപയാണ് ഈ പദ്ധതിക്കായി മാത്രം നീക്കിവെച്ചിരിക്കുന്നത്. കൃത്യമായ വിവരശേഖരണത്തിലൂടെ അര്ഹരായ ഏകദേശം 17 ലക്ഷത്തോളം സ്ത്രീകള്ക്ക് ഈ ആനുകൂല്യം ലഭിക്കുമെന്ന് സര്ക്കാര് ഉറപ്പാക്കുന്നു. ഇടനിലക്കാരില്ലാതെ തുക നേരിട്ട് ഗുണഭോക്താക്കളുടെ അക്കൗണ്ടിലെത്തും
ആര്ക്കെല്ലാം അപേക്ഷിക്കാം?
പദ്ധതിയുടെ ഭാഗമാകാന് താഴെ പറയുന്ന യോഗ്യതകള് ഉണ്ടായിരിക്കണം:
അപേക്ഷക ഡല്ഹിയിലെ സ്ഥിരതാമസക്കാരിയായിരിക്കണം.
ദാരിദ്ര്യരേഖയ്ക്ക് താഴെയുള്ള കുടുംബങ്ങളിലെ അംഗമായിരിക്കണം.
ഡല്ഹി വിലാസത്തിലുള്ള ആധാര് കാര്ഡ് നിര്ബന്ധമാണ്.
തയ്യാറാക്കി വെക്കേണ്ട രേഖകള്
അപേക്ഷാ നടപടികള് വേഗത്തിലാക്കാന് താഴെ പറയുന്നവ മുന്കൂട്ടി കരുതുക:
ആധാര് കാര്ഡ് (ഡല്ഹി വിലാസം രേഖപ്പെടുത്തിയത്).
ബിപിഎല് സര്ട്ടിഫിക്കറ്റ് അല്ലെങ്കില് റേഷന് കാര്ഡ്.
ആധാറുമായി ബന്ധിപ്പിച്ച ബാങ്ക് പാസ് ബുക്ക്.
ആക്ടീവ് ആയ മൊബൈല് നമ്പര്.
പാസ്പോര്ട്ട് സൈസ് ഫോട്ടോ.
രജിസ്ട്രേഷന് എങ്ങനെ?
വനിതാ ശിശുക്ഷേമ വകുപ്പിന്റെ കീഴിലുള്ള പ്രത്യേക പോര്ട്ടല് വഴിയാണ് രജിസ്ട്രേഷന് നടക്കുക. ജൂണ് മാസത്തോടെ പോര്ട്ടല് സജ്ജമാകുമെന്നും അപേക്ഷ സമര്പ്പിക്കേണ്ട രീതിയെക്കുറിച്ചുള്ള വ്യക്തമായ മാര്ഗ്ഗനിര്ദ്ദേശങ്ങള് ഉടന് പുറത്തിറക്കുമെന്നും സര്ക്കാര് അറിയിച്ചു.
മുഖ്യമന്ത്രിയുടെ വാക്കുകള്: ‘വിലക്കയറ്റത്തിന്റെ കാലത്ത് സാധാരണക്കാരായ സഹോദരിമാര്ക്ക് കൈത്താങ്ങാകുക എന്നതാണ് ലക്ഷ്മി യോജനയിലൂടെ ലക്ഷ്യമിടുന്നത്. സ്ത്രീകളുടെ സാമ്പത്തിക സ്വതന്ത്ര്യത്തിലേക്കുള്ള വലിയൊരു ചുവടുവെപ്പാണിത്.’
മുന് വര്ഷം വിവരശേഖരണത്തിലെ പോരായ്മകള് കാരണം വൈകിയ പദ്ധതി, ഇത്തവണ അതീവ ജാഗ്രതയോടെയാണ് നടപ്പിലാക്കുന്നത്. രേഖകളില് തെറ്റുകളില്ലെന്ന് ഉറപ്പുവരുത്തുന്നത് ആനുകൂല്യം തടസ്സമില്ലാതെ ലഭിക്കാന് സഹായിക്കും. കേന്ദ്ര-സംസ്ഥാന സര്ക്കാരുകളുടെ ക്ഷേമ പദ്ധതികള് സാധാരണക്കാരിലേക്ക് എത്തിക്കുന്നതിലെ ബിജെപി സര്ക്കാരിന്റെ വലിയ വിജയമായിട്ടാണ് ഇതിനെ രാഷ്ട്രീയ നിരീക്ഷകര് വിലയിരുത്തുന്നത്.
