ന്യൂഡല്ഹി: ചോദ്യപ്പേപ്പര് ചോര്ച്ചയുമായി ബന്ധപ്പെട്ട വിവാദങ്ങള്ക്കൊടുവില് ഈ വര്ഷത്തെ നീറ്റ് യുജി മെഡിക്കല് പ്രവേശന പരീക്ഷ റദ്ദാക്കാന് കേന്ദ്ര സര്ക്കാര് ഉത്തരവിട്ടു. മെയ് 3-ന് നടന്ന പരീക്ഷയില് വന്തോതിലുള്ള ക്രമക്കേടുകള് നടന്നതായി അന്വേഷണ ഏജന്സികള് കണ്ടെത്തിയതിനെ തുടര്ന്നാണ് ഈ നിര്ണ്ണായക നടപടി. റദ്ദാക്കിയ പരീക്ഷയ്ക്ക് പകരം പുതിയ തീയതി ഉടന് പ്രഖ്യാപിക്കും. ഇതിനായുള്ള ഔദ്യോഗിക വിജ്ഞാപനം ഉടന് പുറത്തിറങ്ങും.
മുന്പ് പരീക്ഷയെഴുതിയ വിദ്യാര്ത്ഥികള് വീണ്ടും അപേക്ഷിക്കുകയോ ഫീസ് അടയ്ക്കുകയോ വേണ്ടതില്ല. പരീക്ഷാ തീയതി നിശ്ചയിക്കുന്ന മുറയ്ക്ക് വിദ്യാര്ത്ഥികള്ക്ക് പുതിയ ഹാള്ടിക്കറ്റുകള് ലഭ്യമാക്കും. ക്രമക്കേടിന് പിന്നിലെ ഗൂഢാലോചന പുറത്തുകൊണ്ടുവരാന് കേസ് സിബിഐ ഏറ്റെടുത്തു. പരീക്ഷാ നടപടികളില് അസ്വാഭാവികമായ ഇടപെടലുകളും കൃത്രിമത്വവും നടന്നതായി നാഷണല് ടെസ്റ്റിംഗ് ഏജന്സി സ്ഥിരീകരിച്ചു.
അന്വേഷണ ഏജന്സികള് സമര്പ്പിച്ച റിപ്പോര്ട്ടുകളുടെ അടിസ്ഥാനത്തിലാണ് പരീക്ഷ റദ്ദാക്കാന് സര്ക്കാര് തയ്യാറായത്. ‘ദേശീയതലത്തിലുള്ള പരീക്ഷാ സംവിധാനത്തിന്റെ സുതാര്യത ഉറപ്പുവരുത്തുന്നതിനും വിദ്യാര്ത്ഥികള്ക്ക് സിസ്റ്റത്തിലുള്ള വിശ്വാസം വീണ്ടെടുക്കുന്നതിനുമാണ് പുനഃപരീക്ഷ നടത്തുന്നത് എന്ന് കേന്ദ്ര സര്ക്കാര് വക്താവ് പറഞ്ഞു.
ലക്ഷക്കണക്കിന് വിദ്യാര്ത്ഥികളുടെ ഭാവിയെ ബാധിക്കുന്ന വിഷയമായതിനാല്, അര്ഹരായവര്ക്ക് മാത്രം പ്രവേശനം ലഭിക്കുന്നു എന്ന് ഉറപ്പാക്കാനാണ് ഈ കടുത്ത നടപടിയെന്ന് അധികൃതര് വ്യക്തമാക്കി. പരീക്ഷാ നടത്തിപ്പില് വീഴ്ച വരുത്തിയവര്ക്കെതിരെ കര്ശന നടപടിയുണ്ടാകുമെന്നും എന്ടിഎ അറിയിച്ചു.
