ന്യൂഡല്ഹി: കേരളത്തിലെ കോണ്ഗ്രസ് നേതൃത്വത്തിലെ അനിശ്ചിതത്വത്തെ രൂക്ഷമായ ഭാഷയില് വിമര്ശിച്ച് ബിജെപി ദേശീയ വക്താവ് ഷെഹ്സാദ് പൂനെവാല. മികച്ച പ്രകടനം കാഴ്ചവെച്ചിട്ടും മുഖ്യമന്ത്രി ആരാകുമെന്ന് തീരുമാനിക്കാന് കഴിയാത്ത വിധം കോണ്ഗ്രസ് കടുത്ത ആശയക്കുഴപ്പത്തിലാണെന്ന് അദ്ദേഹം കുറ്റപ്പെടുത്തി. കേരളത്തില് മുഖ്യമന്ത്രി സ്ഥാനത്തേക്ക് ആളെ കണ്ടെത്താന് ബിജെപി വക്താവ് പരിഹാസരൂപേണ പറഞ്ഞത് ഇങ്ങനെയാണ്.
‘ബൈനോക്കുലറിലൂടെ നോക്കിയിട്ടും കേരളത്തില് ഒരു മുഖ്യമന്ത്രി മുഖം കാണാനില്ല.’ ഓരോ വര്ഷവും ഓരോ മുഖ്യമന്ത്രി എന്ന നിലയില് അഞ്ച് വര്ഷത്തേക്ക് അഞ്ച് പേരെ കോണ്ഗ്രസ് വാഴിച്ചേക്കുമെന്നും അദ്ദേഹം പരിഹസിച്ചു. 2026-ലെ നിയമസഭാ തിരഞ്ഞെടുപ്പ് ഫലത്തിന് പിന്നാലെ ബിജെപി ഭരണം പിടിച്ച സംസ്ഥാനങ്ങളിലെ വേഗതയേറിയ തീരുമാനങ്ങളെ പൂനെവാല ചൂണ്ടിക്കാട്ടി.
പശ്ചിമ ബംഗാളിലെ ചരിത്രവിജയത്തിന് പിന്നാലെയും അസമിലെ തുടര്ച്ചയായ മൂന്നാം വട്ട വിജയത്തിന് പിന്നാലെയും ബിജെപി ഉടന് തന്നെ മുഖ്യമന്ത്രിമാരെ പ്രഖ്യാപിച്ചതായി അദ്ദേഹം പറഞ്ഞു. ബിജെപി ഭരിക്കുന്ന സംസ്ഥാനങ്ങളില് സര്ക്കാരുകള് രൂപീകരിച്ച് പ്രവര്ത്തനം തുടങ്ങിയപ്പോള് കേരളത്തിലെ കോണ്ഗ്രസ് ഇപ്പോഴും ചര്ച്ചകളില് തളച്ചിടപ്പെട്ടിരിക്കുകയാണെന്ന് അദ്ദേഹം ഓര്മ്മിപ്പിച്ചു.
വിജയിച്ചിട്ടും ഒരു നേതാവിനെ ഉയര്ത്തിക്കാട്ടാന് കഴിയാത്തത് കോണ്ഗ്രസിന്റെ പരാജയമാണ്. പശ്ചിമ ബംഗാളിലും അസമിലും ബിജെപി കാണിച്ച രാഷ്ട്രീയ വ്യക്തത കേരളത്തിലെ കോണ്ഗ്രസ് നേതൃത്വത്തിനില്ലെന്നും പൂനെവാല കൂട്ടിച്ചേര്ത്തു. തിരഞ്ഞെടുപ്പ് കഴിഞ്ഞ് ദിവസങ്ങള് പിന്നിട്ടിട്ടും കേരളത്തില് മുഖ്യമന്ത്രി പദത്തെ ചൊല്ലിയുള്ള തര്ക്കം തുടരുന്ന പശ്ചാത്തലത്തിലാണ് ബിജെപിയുടെ ഈ കടന്നാക്രമണം.
