തിരുവനന്തപുരം: മുന്‍ ഗതാഗത മന്ത്രി കെ.ബി. ഗണേഷ് കുമാറിന് 40 വര്‍ഷങ്ങള്‍ക്ക് മുന്‍പ് ലൈസന്‍സ് അനുവദിച്ചതില്‍ ഗുരുതരമായ നിയമലംഘനം നടന്നതായി മോട്ടോര്‍ വാഹന വകുപ്പിന്റെ കണ്ടെത്തല്‍. 18 വയസ്സ് തികയുന്നതിന് മുന്‍പ് അദ്ദേഹത്തിന് ലൈസന്‍സ് ലഭിച്ചുവെന്ന വിവരം പുറത്തുവന്നതോടെ വിഷയത്തില്‍ ഗതാഗത കമ്മീഷണര്‍ സി. നാഗരാജു നിയമോപദേശം തേടാന്‍ തീരുമാനിച്ചു.
വകുപ്പിന്റെ രേഖകള്‍ പ്രകാരം ഗണേഷ് കുമാറിന്റെ ജനനത്തീയതിയും ലൈസന്‍സ് അനുവദിച്ച തീയതിയും തമ്മില്‍ വലിയ പൊരുത്തക്കേടുകളാണുള്ളത്. ജനനത്തീയതി 1966 മെയ് 25 ആണ്. എന്നാല്‍ അദ്ദേഹത്തിന് ലൈസന്‍സ് ലഭിച്ചത് 1984 ഫെബ്രുവരി 13നും. നിയമപരമായി ഗിയറുള്ള വാഹനങ്ങള്‍ ഓടിക്കാന്‍ 18 വയസ്സ് തികയണമെന്നിരിക്കെ, അദ്ദേഹത്തിന് ലൈസന്‍സ് ലഭിക്കുമ്പോള്‍ പ്രായം 17 വയസ്സും 8 മാസവും മാത്രമായിരുന്നു.
ദശകങ്ങള്‍ക്ക് മുന്‍പ് നടന്ന സംഭവമായതിനാലാണ് വകുപ്പ് ഇപ്പോള്‍ നിയമപരമായ വശങ്ങള്‍ പരിശോധിക്കുന്നത്. സാരഥി സോഫ്റ്റ്വെയറിലേക്കുള്ള മാറ്റങ്ങള്‍ക്കിടയിലും ഈ പിഴവ് ഇത്രയും കാലം ശ്രദ്ധിക്കപ്പെടാതെ പോവുകയായിരുന്നു. ലൈസന്‍സിലെ വിവരങ്ങള്‍ ആധാറിലെ പേരുമായി ഒത്തുപോകുന്ന രീതിയിലേക്ക് മാറ്റാനും നടപടികള്‍ ആരംഭിച്ചു. നിലവില്‍ ലൈസന്‍സില്‍ പേരിനൊപ്പം ‘എംഎല്‍എ’ എന്ന് രേഖപ്പെടുത്തിയിട്ടുണ്ട്.
2019-ല്‍ സാരഥി പ്ലാറ്റ്ഫോം നിലവില്‍ വരുന്നതിന് മുന്‍പാണ് പേരിനൊപ്പം സ്ഥാനപ്പേര് കൂടി ചേര്‍ത്തതെന്നാണ് സൂചന. ഇത് മാറ്റി ഔദ്യോഗിക രേഖകളിലെ പേര് മാത്രമാക്കാനാണ് നിര്‍ദ്ദേശം. നിലവില്‍ 2028 ജൂലൈ 10 വരെയാണ് ഗണേഷ് കുമാറിന്റെ ലൈസന്‍സിന് കാലാവധിയുള്ളത്. എന്നാല്‍ പ്രായപരിധി ലംഘിച്ചുകൊണ്ട് ലൈസന്‍സ് എടുത്തുവെന്ന കണ്ടെത്തല്‍ സ്ഥിരീകരിക്കപ്പെട്ടാല്‍ തുടര്‍നടപടികള്‍ എന്താകുമെന്നത് നിയമോപദേശത്തിന് ശേഷം മാത്രമേ വ്യക്തമാകൂ.
സാങ്കേതിക വിദ്യയും സോഫ്റ്റ്വെയറുകളും ഇത്രയേറെ പുരോഗമിച്ചിട്ടും 40 വര്‍ഷമായി ഈ നിയമലംഘനം പരിശോധിക്കപ്പെട്ടില്ല എന്നത് മോട്ടോര്‍ വാഹന വകുപ്പിന്റെ മുന്‍കാല പ്രവര്‍ത്തനങ്ങളിലെ വീഴ്ചയായും വിലയിരുത്തപ്പെടുന്നുണ്ട്.
