ഗാന്ധിനഗര്: രാജ്യത്തെ പ്രമുഖ ഡയറി ബ്രാന്ഡായ അമുല് പാലിന്റെ വില വര്ദ്ധിപ്പിച്ചു. എല്ലാ വകഭേദങ്ങള്ക്കും ലിറ്ററിന് രണ്ട് രൂപ വീതമാണ് വര്ദ്ധിപ്പിച്ചത്. പുതുക്കിയ നിരക്കുകള് മെയ് 14 വ്യാഴാഴ്ച മുതല് പ്രാബല്യത്തില് വരും. 2025 മെയ് മാസത്തിന് ശേഷം ആദ്യമായാണ് അമുല് പാല് വില വര്ദ്ധിപ്പിക്കുന്നത്. പ്രവര്ത്തനച്ചെലവിലും പാല് ഉല്പ്പാദനച്ചെലവിലും ഉണ്ടായ വര്ദ്ധനവാണ് വില കൂട്ടാന് കാരണമെന്ന് ഗുജറാത്ത് കോ-ഓപ്പറേറ്റീവ് മില്ക്ക് മാര്ക്കറ്റിംഗ് ഫെഡറേഷന് അറിയിച്ചു.
കാലിത്തീറ്റ, പാക്കേജിംഗ് സാമഗ്രികള്, ഇന്ധനം എന്നിവയുടെ വിലയിലുണ്ടായ ഗണ്യമായ വര്ദ്ധനവാണ് പാലിന്റെ വിലയും കൂട്ടാന് ഉണ്ടായ കാരണങ്ങള്. ഉപഭോക്താക്കള് നല്കുന്ന ഓരോ രൂപയുടെയും ഏകദേശം 80 പൈസയും പാല് ഉല്പ്പാദകര്ക്കാണ് ലഭിക്കുന്നത്. വര്ദ്ധിച്ചുവരുന്ന ചെലവുകള്ക്കിടയിലും ഉല്പ്പാദനം നിലനിര്ത്താന് കര്ഷകര്ക്ക് ഈ വര്ദ്ധനവ് സഹായകമാകുമെന്ന് ഫെഡറേഷന് വ്യക്തമാക്കി.
വില കൂടിയത് ഇങ്ങനെ; അമുല് താസ 500 മി.ലി 29രൂപ, അമുല് താസ 1 ലിറ്റര് 57രൂപ, അമുല് ഗോള്ഡ് 500 മി.ലി 35 രൂപ, അമുല് ശക്തി 500 മി.ലി 32 രൂപ, അമുല് ടീ സ്പെഷ്യല് 1 ലിറ്റര് 66 രൂപ,
എരുമപ്പാല് 500 മി.ലി 39 രൂപ എന്നിങ്ങനെയാണ് പുതുക്കിയ വില. അമുല് താസ, ഗോള്ഡ്, ശക്തി, ടീ സ്പെഷ്യല് തുടങ്ങിയ പ്രധാന വകഭേദങ്ങളെല്ലാം പുതിയ വില ഘടനയിലേക്ക് മാറും.
ഏകദേശം 2.5% മുതല് 3.5% വരെയുള്ള വര്ദ്ധനവാണിതെങ്കിലും, ഇത് നിലവിലെ ശരാശരി ഭക്ഷണ പണപ്പെരുപ്പ നിരക്കിനേക്കാള് കുറവാണെന്ന് അമുല് അധികൃതര് ചൂണ്ടിക്കാട്ടി. 36 ലക്ഷത്തോളം വരുന്ന ക്ഷീരകര്ഷകരുടെ വരുമാനം ഉറപ്പാക്കാന് ഈ തീരുമാനം അനിവാര്യമാണെന്നും ഫെഡറേഷന് കൂട്ടിച്ചേര്ത്തു.
