ലഖ്നൗ: ഉത്തർപ്രദേശിൽ ബുധനാഴ്ചയുണ്ടായ ശക്തമായ കൊടുങ്കാറ്റിലും മഴയിലും വ്യാപക നാശനഷ്ടം. സംസ്ഥാനത്തുടനീളം 111 പേർക്ക് ജീവൻ നഷ്ടപ്പെട്ടതായാണ് ഔദ്യോഗിക കണക്കുകൾ സൂചിപ്പിക്കുന്നത്. പ്രയാഗ്രാജിലാണ് ഏറ്റവും കൂടുതൽ നാശനഷ്ടങ്ങൾ റിപ്പോർട്ട് ചെയ്തത്; ഇവിടെ മാത്രം 21 പേർ മരിച്ചു. ഭദോഹിയിൽ 17 മരണങ്ങളും റിപ്പോർട്ട് ചെയ്തിട്ടുണ്ട്.
ദുരന്തത്തിൽ റഷ്യൻ പ്രസിഡന്റ് വ്ലാഡിമിർ പുടിൻ അനുശോചനം രേഖപ്പെടുത്തി. കർണാടകയിലെ വിജയപുരയിൽ വീടിന്റെ മേൽക്കൂര തകർന്ന് വീണ് ഒരു കുടുംബത്തിലെ നാലുപേർ ദാരുണമായി കൊല്ലപ്പെട്ടു.
മറുവശത്ത്, രാജ്യത്തിന്റെ പകുതിയിലധികം ഭാഗങ്ങളും ഉഷ്ണതരംഗത്തിന്റെ പിടിയിലാണ്. മഹാരാഷ്ട്ര, രാജസ്ഥാൻ, മധ്യപ്രദേശ്, ഉത്തർപ്രദേശ് എന്നിവിടങ്ങളിൽ താപനില 40 ഡിഗ്രി സെൽഷ്യസ് കടന്നു. മഹാരാഷ്ട്രയിലെ അക്കോളയിലാണ് രാജ്യത്തെ ഏറ്റവും ഉയർന്ന താപനില (45.9°C) രേഖപ്പെടുത്തിയത്. ജൽഗാവ്, വാർധ, അമരാവതി എന്നിവിടങ്ങളിലും ചൂട് 45 ഡിഗ്രിക്ക് മുകളിലെത്തി. രാജസ്ഥാനിലെ ഫലോഡി, ജയ്സാൽമീർ, ബാർമർ എന്നിവിടങ്ങളിലും ഉത്തർപ്രദേശിലെ ബന്ദയിലും സമാനമായ കടുത്ത ചൂടാണ് അനുഭവപ്പെടുന്നത്.
മെയ് 16ന് പഞ്ചാബ്, ഹരിയാന, ഡൽഹി, രാജസ്ഥാൻ, പശ്ചിമ ഉത്തർപ്രദേശ് എന്നിവിടങ്ങളിൽ മഴയ്ക്കും ശക്തമായ കാറ്റിനും സാധ്യതയുണ്ട്. ജമ്മു കശ്മീർ, ഹിമാചൽ പ്രദേശ്, ഉത്തരാഖണ്ഡ് എന്നിവിടങ്ങളിൽ ആലിപ്പഴ വർഷത്തോടു കൂടിയ മഴയ്ക്ക് സാധ്യതയുള്ളതിനാൽ മലയോര മേഖലകളിൽ ജാഗ്രത വേണം. ബീഹാർ, ജാർഖണ്ഡ്, പശ്ചിമ ബംഗാൾ, ഛത്തീസ്ഗഡ് എന്നിവിടങ്ങളിൽ ഇടിമിന്നലോടു കൂടിയ മഴയ്ക്ക് സാധ്യതയുണ്ട്.
മെയ് 17ന് രാജസ്ഥാനിൽ അതിശക്തമായ ഉഷ്ണതരംഗത്തിന് സാധ്യതയുണ്ടെന്ന് മുന്നറിയിപ്പുണ്ട്. ഡൽഹി, മധ്യപ്രദേശ്, പഞ്ചാബ്, തെലങ്കാന, മഹാരാഷ്ട്ര തുടങ്ങിയ സംസ്ഥാനങ്ങളിലും ഉഷ്ണതരംഗം തുടരും. അതേസമയം, കേരളം, കർണാടക, തമിഴ്നാട് തുടങ്ങി ദക്ഷിണേന്ത്യൻ സംസ്ഥാനങ്ങളിലും വടക്കുകിഴക്കൻ സംസ്ഥാനങ്ങളിലും ശക്തമായ മഴയ്ക്ക് സാധ്യതയുണ്ട്. കേരളത്തിൽ മെയ് 17-ന് കനത്ത മഴ പെയ്യാൻ സാധ്യതയുള്ളതിനാൽ ജനങ്ങൾ മുൻകരുതൽ സ്വീകരിക്കേണ്ടതാണ്.
