അമരാവതി: ആന്ധ്രാപ്രദേശിലെ ജനനനിരക്ക് കുറയുന്നതില് ആശങ്ക പ്രകടിപ്പിച്ചുകൊണ്ട്, കൂടുതല് കുട്ടികളുള്ള കുടുംബങ്ങളെ പ്രോത്സാഹിപ്പിക്കുന്നതിനായി വന് സാമ്പത്തിക സഹായം പ്രഖ്യാപിച്ച് മുഖ്യമന്ത്രി ചന്ദ്രബാബു നായിഡു. നരസന്നപേട്ടയില് നടന്ന ‘സുവര്ണ്ണ ആന്ധ്ര-സ്വച്ഛ് ആന്ധ്ര’ പരിപാടിയുടെ ഉദ്ഘാടന വേളയിലാണ് അദ്ദേഹം ഈ വിപ്ലവകരമായ പ്രഖ്യാപനം നടത്തിയത്. പുതിയ പദ്ധതിയനുസരിച്ച്, കുടുംബത്തില് മൂന്നാമതായി ജനിക്കുന്ന കുട്ടിക്ക് 30,000 രൂപയും നാലാമത്തെ കുട്ടിക്ക് 40,000 രൂപയും സര്ക്കാര് നേരിട്ട് നല്കും.
കുട്ടികളെ ഭാരമായി കാണാതെ രാജ്യത്തിന്റെ സമ്പത്തായി കാണണമെന്ന് മുഖ്യമന്ത്രി ജനങ്ങളോട് അഭ്യര്ത്ഥിച്ചു. നേരത്തെ കുടുംബാസൂത്രണത്തിന് വലിയ പ്രാധാന്യം നല്കിയിരുന്ന നായിഡു, ഇപ്പോള് ആ നിലപാടില് മാറ്റം വരുത്തിയതായി പരസ്യമായി സമ്മതിച്ചു. സംസ്ഥാനത്തെ പ്രായമാകുന്ന ജനസംഖ്യയും കുറഞ്ഞുവരുന്ന യുവാക്കളുടെ എണ്ണവുമാണ് ഈ പുതിയ തീരുമാനത്തിന് പിന്നിലെ പ്രധാന കാരണം.
‘മുന്പ് ഞാന് കുടുംബാസൂത്രണത്തിനായി വാദിച്ചിട്ടുണ്ട്. എന്നാല് ഇന്നത്തെ സാഹചര്യം മാറി. കുട്ടികള് നമ്മുടെ സമ്പത്താണ്. ജനസംഖ്യാ സന്തുലിതാവസ്ഥ നിലനിര്ത്താന് കൂടുതല് കുട്ടികള് അനിവാര്യമായിരിക്കുന്നു,’ അദ്ദേഹം പറഞ്ഞു. ഭാരതത്തിലെ ജനസംഖ്യയുടെ കാര്യത്തില് പത്താം സ്ഥാനത്താണ് ആന്ധ്രാപ്രദേശ്. ഏകദേശം 5.40 കോടിയാണ് ജനസംഖ്യ. രാജ്യത്തെ ഏറ്റവും കുറഞ്ഞ വാര്ഷിക ജനസംഖ്യാ വളര്ച്ചാ നിരക്കാണ് (0.29%) സംസ്ഥാനത്തുള്ളത്.
ജനസാന്ദ്രത ചതുരശ്ര കിലോമീറ്ററിന് 304 പേര് മാത്രമാണ്. ജനസംഖ്യാ വളര്ച്ചയെ പ്രോത്സാഹിപ്പിക്കുന്നതിലൂടെ ഭാവിയില് സംസ്ഥാനം നേരിട്ടേക്കാവുന്ന തൊഴില്ശക്തിയുടെ കുറവ് പരിഹരിക്കാനാണ് സര്ക്കാര് ലക്ഷ്യമിടുന്നത്. ഇതിനായി വരും ദിവസങ്ങളില് കൂടുതല് ആനുകൂല്യങ്ങള് പ്രഖ്യാപിച്ചേക്കുമെന്നും സൂചനയുണ്ട്.
