സിക്കാര്: നീറ്റ്-യുജി ചോദ്യപേപ്പര് ചോര്ച്ചാക്കേസില് രാജസ്ഥാനിലെ സിക്കാര് ജില്ലയില് നിന്ന് ഒരു കുടുംബത്തിലെ മൂന്ന് പേരെ സിബിഐ അറസ്റ്റ് ചെയ്തു. ദിനേഷ് ബിവാല്, സഹോദരന് മംഗിലാല് ബിവാല്, മംഗിലാലിന്റെ മകന് വികാസ് എന്നിവരാണ് പിടിയിലായത്. പരീക്ഷയ്ക്ക് മുന്പ് തന്നെ ചോദ്യപേപ്പര് ചോര്ത്തി നല്കുന്ന വലിയൊരു മാഫിയയുടെ കടുക്കണ്ണികളാണ് ഇവരെന്ന് അന്വേഷണ ഉദ്യോഗസ്ഥര് സ്ഥിരീകരിച്ചു.
സ്വന്തം മകന് മെഡിക്കല് പ്രവേശനം ഉറപ്പാക്കാന് 10 ലക്ഷം രൂപ നല്കിയാണ് ദിനേഷ് ബിവാല് ചോദ്യപേപ്പര് സംഘടിപ്പിച്ചത്. പരീക്ഷയ്ക്ക് മുന്പ് തന്നെ ഒറിജിനലിനോട് സാമ്യമുള്ള ‘ഗസ് പേപ്പര്’ എന്ന പേരില് ചോദ്യങ്ങള് മകന് നല്കിയെങ്കിലും ഫലം തിരിച്ചടിയായി. 720 മാര്ക്കിന്റെ പരീക്ഷയില് വെറും 107 മാര്ക്ക് മാത്രമാണ് ദിനേഷിന്റെ മകന് ഋഷി ബിവാല് നേടിയത്. പത്താം ക്ലാസില് 44 ശതമാനം മാത്രം മാര്ക്കുള്ള ഋഷി, പന്ത്രണ്ടാം ക്ലാസില് ഗ്രേസ് മാര്ക്കിന്റെ സഹായത്തോടെയാണ് കഷ്ടിച്ച് ജയിച്ചത്.
പഠനത്തില് അത്യന്തം പിന്നാക്കമായിട്ടും മകനെ ഡോക്ടറാക്കാനുള്ള കുടുംബത്തിന്റെ അതിമോഹമാണ് ഒടുവില് ജയിലഴികള്ക്ക് പിന്നിലെത്തിച്ചത്. സിക്കാറിലെ ഒരു ഫ്ലാറ്റ് കേന്ദ്രീകരിച്ചായിരുന്നു ഇവരുടെ പ്രവര്ത്തനങ്ങള്. ചോദ്യപേപ്പര് വിതരണം ചെയ്യുന്നതിനും ഉദ്യോഗാര്ത്ഥികളെ ഏകോപിപ്പിക്കുന്നതിനുമുള്ള ഹബ്ബായി ഈ ഫ്ലാറ്റിനെ മാറ്റിയിരുന്നു. പരീക്ഷാ മാഫിയയുടെ കുറിയര്മാരായി പ്രവര്ത്തിച്ച ഈ കുടുംബം നിരവധി വിദ്യാര്ത്ഥികള്ക്ക് ചോദ്യങ്ങള് എത്തിച്ചു നല്കിയതായും കണ്ടെത്തിയിട്ടുണ്ട്.
കേസില് പ്രതിയായ ഋഷി ബിവാല് നിലവില് ഒളിവിലാണ്. ഇയാള്ക്കായി സിബിഐ തിരച്ചില് ഊര്ജ്ജിതമാക്കി. സംഭവവുമായി ബന്ധപ്പെട്ട് നൂറ്റമ്പതോളം വിദ്യാര്ത്ഥികള് ഇപ്പോള് സിബിഐയുടെ നിരീക്ഷണത്തിലാണ്. ചോദ്യപേപ്പര് ചോര്ച്ചയുമായി ബന്ധപ്പെട്ട വലിയൊരു ശൃംഖലയെ വരും ദിവസങ്ങളില് പുറത്തുകൊണ്ടുവരുമെന്ന് സിബിഐ അറിയിച്ചു. രാജസ്ഥാനിലെ പ്രമുഖ കോച്ചിംഗ് സെന്ററുകള്ക്ക് ഈ തട്ടിപ്പില് പങ്കുണ്ടോ എന്നും അന്വേഷണ ഏജന്സി പരിശോധിച്ചുവരികയാണ്.
