തിരുവനന്തപുരം: കേരളത്തിന്റെ പുതിയ മുഖ്യമന്ത്രിയായി ചുമതലയേറ്റ വി. ഡി. സതീശന് അഭിനന്ദനങ്ങളുമായി പ്രധാനമന്ത്രി നരേന്ദ്രമോദി. ജനക്ഷേമ മുൻഗണനകൾ മുൻനിർത്തിയുള്ള പ്രവർത്തനങ്ങൾക്ക് കേന്ദ്ര സർക്കാരിന്റെ ഭാഗത്തുനിന്നും എല്ലാവിധ പിന്തുണയും സഹകരണവും ഉണ്ടാകുമെന്ന് പ്രധാനമന്ത്രി ഉറപ്പുനൽകി. ഔദ്യോഗിക സോഷ്യൽ മീഡിയ പ്ലാറ്റ്‌ഫോമായ എക്സിലൂടെ ഇംഗ്ലീഷിലും മലയാളത്തിലുമാണ് പ്രധാനമന്ത്രി തന്റെ ആശംസകൾ പങ്കുവെച്ചത്.
‘ടീം ഇന്ത്യ’ എന്ന വിശാലമായ സങ്കൽപ്പവുമായാണ് കേന്ദ്ര സർക്കാർ മുന്നോട്ട് പോകുന്നതെന്ന് പ്രധാനമന്ത്രി നരേന്ദ്രമോദി തന്റെ സന്ദേശത്തിൽ ഓർമ്മിപ്പിച്ചു. ഈ സങ്കൽപ്പത്തിന്റെ അവിഭാജ്യ ഘടകമാണ് രാജ്യത്തെ ഓരോ സംസ്ഥാനവും. സംസ്ഥാനം ഭരിക്കുന്നത് ഏത് രാഷ്‌ട്രീയ പാർട്ടിയാണെങ്കിലും വികസന കാര്യങ്ങളിലോ ജനക്ഷേമ പദ്ധതികളുടെ കാര്യത്തിലോ യാതൊരുവിധ വേർതിരിവോ വിവേചനമോ പ്രധാനമന്ത്രിയുടെ ഭാഗത്തുനിന്നോ കേന്ദ്ര സർക്കാരിന്റെ ഭാഗത്തുനിന്നോ ഉണ്ടാകില്ലെന്നും അദ്ദേഹം വ്യക്തമാക്കി.
കേരളത്തിലെ ജനങ്ങളുടെ ക്ഷേമത്തിനായും സംസ്ഥാനത്തിന്റെ പുരോഗതിക്കായും കേന്ദ്ര ഗവൺമെന്റിന്റെ പൂർണ്ണ പിന്തുണയും സഹകരണവും തുടർന്നും ഉണ്ടാകും.
