ചെന്നൈ: ചെന്നൈ സബർബൻ റെയിൽ ശൃംഖലയുടെ വികസനത്തിന് വൻ വേഗത പകർന്ന് പുതിയ പ്രഖ്യാപനം. അരക്കോണം – ചെങ്കൽപട്ട് റെയിൽവേ ലൈൻ ഇരട്ടിപ്പിക്കൽ പദ്ധതിക്ക് ഇന്ത്യൻ റെയിൽവേ 993 കോടി രൂപ അനുവദിച്ചു. ചെന്നൈ ബീച്ച്, താംബരം, ചെങ്കൽപട്ട്, അരക്കോണം എന്നിവയെ പരസ്പരം ബന്ധിപ്പിക്കുന്ന ചെന്നൈ സബർബൻ സർക്കുലർ റെയിൽ ശൃംഖലയിലെ നിർണായകമായ 68 കിലോമീറ്റർ ദൈർഘ്യമുള്ള പാതയാണ് ഇതോടെ യാഥാർത്ഥ്യമാകാൻ പോകുന്നത്.
യാത്രാക്ലേശം പരിഹരിക്കുന്നതിനൊപ്പം ട്രെയിനുകളുടെ സമയകൃത്യത ഉറപ്പാക്കാനും ഈ പദ്ധതി വലിയ പങ്കുവഹിക്കുമെന്ന് റെയിൽവേ മന്ത്രി അശ്വിനി വൈഷ്ണവ് വ്യക്തമാക്കി. കനത്ത തിരക്കനുഭവപ്പെടുന്ന ചെന്നൈ സബർബൻ റെയിൽ ശൃംഖലയിലെ തിരക്ക് കുറയ്‌ക്കാനും പ്രവർത്തനക്ഷമത വർദ്ധിപ്പിക്കാനും ഈ ഇരട്ടിപ്പിക്കൽ സഹായിക്കും. യാത്രക്കാർക്ക് കൂടുതൽ മെച്ചപ്പെട്ട സേവനം നൽകുന്നതിനൊപ്പം ചരക്കുനീക്കം സുഗമമാക്കാനും പുതിയ പാത വഴി സാധിക്കും. സിമന്റ്, ഓട്ടോമൊബൈൽസ്, ധാന്യങ്ങൾ, ഇരുമ്പ്, ഉരുക്ക് തുടങ്ങിയ അവശ്യസാധനങ്ങളുടെ ഗതാഗതത്തിന് ഈ കോറിഡോർ വലിയ രീതിയിൽ പ്രയോജനം ചെയ്യുമെന്നാണ് വിലയിരുത്തൽ.
