പാരീസ്: ഗ്രാന്‍ഡ്സ്ലാം ടൂര്‍ണമെന്റുകളില്‍ നിന്നുള്ള വരുമാന വിഹിതം കളിക്കാര്‍ക്ക് വീതിച്ചുനല്‍കുന്നതുമായി ബന്ധപ്പെട്ട തര്‍ക്കങ്ങളെത്തുടര്‍ന്ന്, വരാനിരിക്കുന്ന ഫ്രഞ്ച് ഓപ്പണില്‍ വേറിട്ട പ്രതിഷേധത്തിനൊരുങ്ങി പ്രമുഖ ടെന്നീസ് താരങ്ങള്‍. ടൂര്‍ണമെന്റിന് മുന്നോടിയായുള്ള ഔദ്യോഗിക വാര്‍ത്താസമ്മേളനങ്ങളില്‍ താരങ്ങള്‍ പരമാവധി 15 മിനിറ്റ് മാത്രമേ സംസാരിക്കൂ. സമയം കഴിഞ്ഞയുടന്‍ അവര്‍ ഹാളില്‍ നിന്ന് ഇറങ്ങിപ്പോകും.
ഫ്രഞ്ച് ഓപ്പണിന്റെ ആകെ വരുമാനത്തില്‍ നിന്ന് നിലവില്‍ താരങ്ങള്‍ക്ക് ലഭിക്കുന്ന വിഹിതം ഏകദേശം 15 ശതമാനം മാത്രമാണ്. ഈ ശതമാനക്കണക്കിനെ പ്രതീകാത്മകമായി സൂചിപ്പിക്കാനാണ് 15 മിനിറ്റ് മാത്രം മാധ്യമങ്ങളോട് സംസാരിക്കാന്‍ കളിക്കാര്‍ തീരുമാനിച്ചിരിക്കുന്നത്. ഐക്യദാര്‍ഢ്യം പ്രഖ്യാപിച്ച് പ്രമുഖ താരങ്ങള്‍ ഈ പ്രതിഷേധത്തില്‍ പങ്കുചേരുമെങ്കിലും ഇത് നിര്‍ബന്ധിതമല്ല. ഏകദേശം ഇരുനൂറോളം കളിക്കാരെ ഈ പ്രതിഷേധത്തെക്കുറിച്ച് മുന്‍കൂട്ടി അറിയിച്ചിട്ടുണ്ട്. ടൂര്‍ണമെന്റിന്റെ പ്രധാന മത്സരങ്ങള്‍ ഞായറാഴ്ച ആരംഭിക്കാനിരിക്കെ, വെള്ളി, ശനി ദിവസങ്ങളിലെ മീഡിയാ ദിനങ്ങളിലാണ് ഈ പ്രതിഷേധം നടക്കുക.
ഇത്തവണ ഫ്രഞ്ച് ഓപ്പണില്‍ റെക്കോര്‍ഡ് സമ്മാനത്തുകയാണ് (61.723 മില്യണ്‍ യൂറോ) പ്രഖ്യാപിച്ചിരിക്കുന്നത്. കഴിഞ്ഞ വര്‍ഷത്തേക്കാള്‍ 9.54 ശതമാനത്തിന്റെ വര്‍ദ്ധനവ് ഇതിലുണ്ടെങ്കിലും, ആകെ വരുമാനത്തിന്റെ അടിസ്ഥാനത്തില്‍ നോക്കുമ്പോള്‍ ഈ തുക കുറവാണെന്നാണ് കളിക്കാരുടെ വാദം. വരുമാനത്തിന്റെ 22 ശതമാനമെങ്കിലും സമ്മാനത്തുകയായി തങ്ങള്‍ക്ക് വേണമെന്ന് ആവശ്യപ്പെട്ട് ആദ്യ പത്ത് റാങ്കിലുള്ള പ്രമുഖ താരങ്ങള്‍ ഒപ്പിട്ട കത്ത് ഫ്രഞ്ച് ഓപ്പണ്‍ അധികൃതര്‍ക്ക് കൈമാറിയിട്ടുണ്ട്.
സമ്മാനത്തുക വര്‍ദ്ധിപ്പിക്കുന്നതിന് പുറമെ കളിക്കാരുടെ പെന്‍ഷന്‍ ഫണ്ടിലേക്ക് കൂടുതല്‍ തുക വകയിരുത്തുക, ടൂര്‍ണമെന്റുമായി ബന്ധപ്പെട്ട തീരുമാനങ്ങള്‍ എടുക്കുന്ന സമിതികളില്‍ കളിക്കാര്‍ക്ക് കൂടുതല്‍ പ്രാതിനിധ്യം നല്‍കുക, മികച്ച ആരോഗ്യ പരിരക്ഷ ഉറപ്പാക്കുക എന്നിവയും താരങ്ങള്‍ ആവശ്യപ്പെടുന്നു. ‘വരുമാനവുമായി താരതമ്യം ചെയ്യുമ്പോള്‍ ഞങ്ങള്‍ക്ക് ലഭിക്കുന്ന ശതമാനം ഇപ്പോഴും തൃപ്തികരമല്ല. ഓസ്ട്രേലിയന്‍ ഓപ്പണുമായി മാത്രമല്ല, എല്ലാ ഗ്രാന്‍ഡ്സ്ലാമുകളുമായും ഈ വിഷയത്തില്‍ ഇനിയും ചര്‍ച്ചകള്‍ നടത്തേണ്ടതുണ്ട്. വരുമാന വിഹിതത്തില്‍ പുരോഗതിയുണ്ടെന്നത് ശരിയാണെങ്കിലും ഞങ്ങള്‍ പ്രതീക്ഷിച്ച തലത്തില്‍ എത്തിയിട്ടില്ല,’ എന്ന് ലോക നാലാം നമ്പര്‍ താരം കോകോ ഗോഫ് ജനുവരിയില്‍ വ്യക്തമാക്കിയിരുന്നു.
ഡബ്ല്യുടിഎ മുന്‍ ചെയര്‍മാനും ചീഫ് എക്‌സിക്യൂട്ടീവുമായ ലാറി സ്‌കോട്ടിന്റെ നേതൃത്വത്തിലാണ് കളിക്കാര്‍ ചര്‍ച്ചകള്‍ നടത്തുന്നത്. ഈ ആഴ്ച അവസാനം ഫ്രഞ്ച് ഓപ്പണ്‍ ടൂര്‍ണമെന്റ് ഡയറക്ടര്‍ അമേലി മോറെസ്‌മോ, എഫ്എഫ്ടി പ്രസിഡന്റ് ഗില്ലെസ് മൊറെട്ടണ്‍ എന്നിവരുമായി അദ്ദേഹം കൂടിക്കാഴ്ച നടത്തും. വരും ആഴ്ചകളില്‍ വിംബിള്‍ഡണ്‍, യുഎസ് ഓപ്പണ്‍ അധികൃതരുമായും സമാനമായ ചര്‍ച്ചകള്‍ നടക്കും. പരിഹാരമുണ്ടായില്ലെങ്കില്‍ ഭാവിയില്‍ ടൂര്‍ണമെന്റുകള്‍ ബഹിഷ്‌കരിക്കുന്നതിലേക്ക് വരെ കാര്യങ്ങള്‍ നീങ്ങിയേക്കുമെന്ന് പ്രമുഖ താരം അരീന സബലെങ്ക നേരത്തെ സൂചന നല്‍കിയിരുന്നു.
താരങ്ങളുടെ പ്രതിഷേധ തീരുമാനത്തില്‍ ഫ്രഞ്ച് ടെന്നീസ് ഫെഡറേഷന്‍ ഖേദം പ്രകടിപ്പിച്ചു. മാധ്യമങ്ങള്‍, ബ്രോഡ്കാസ്റ്റര്‍മാര്‍, ടെന്നീസ് ആരാധകര്‍ എന്നിവരെയെല്ലാം ഈ തീരുമാനം ബാധിക്കുമെന്ന് എഫ്എഫ്ടി പ്രസ്താവനയില്‍ പറഞ്ഞു. ടൂര്‍ണമെന്റില്‍ നിന്ന് ലഭിക്കുന്ന വരുമാനം ടെന്നീസ് കളിയുടെ വികസനത്തിനും അടിസ്ഥാന സൗകര്യങ്ങള്‍ മെച്ചപ്പെടുത്തുന്നതിനുമാണ് ഉപയോഗിക്കുന്നതെന്നാണ് ഗ്രാന്‍ഡ്സ്ലാം അധികൃതരുടെ വാദം. എങ്കിലും പ്രശ്‌നങ്ങള്‍ പരിഹരിക്കുന്നതിനായി നാളെ കളിക്കാരുടെ പ്രതിനിധികളുമായി ഔദ്യോഗിക ചര്‍ച്ചയ്‌ക്ക് തയ്യാറാണെന്നും, തീരുമാനങ്ങള്‍ എടുക്കുന്നതില്‍ കളിക്കാര്‍ക്ക് കൂടുതല്‍ പങ്കാളിത്തം നല്‍കുന്നതിനെക്കുറിച്ച് സംസാരിക്കാന്‍ ഒരുക്കമാണെന്നും എഫ്എഫ്ടി അറിയിച്ചിട്ടുണ്ട്.
