വാഷിംഗ്ടണ്: വൈറ്റ് ഹൗസ് സുരക്ഷാ ചെക്ക്പോസ്റ്റിന് സമീപമെത്തി ഉദ്യോഗസ്ഥര്ക്ക് നേരെ വെടിയുതിര്ത്ത അക്രമി സുരക്ഷാ സേനയുടെ പ്രത്യാക്രമണത്തില് കൊല്ലപ്പെട്ടു. ശനിയാഴ്ച വൈകുന്നേരം ആറ് മണിയോടെയാണ് (പ്രാദേശിക സമയം) നാടകീയമായ സംഭവങ്ങള് അരങ്ങേറിയത്. പ്രാഥമിക അന്വേഷണങ്ങള് പ്രകാരം, ചെക്ക്പോസ്റ്റിന് സമീപമെത്തിയ അക്രമി തന്റെ ബാഗില് നിന്ന് ആയുധമെടുത്ത് ഡ്യൂട്ടിയിലുണ്ടായിരുന്ന ഉദ്യോഗസ്ഥര്ക്ക് നേരെ വെടിയുതിര്ക്കുകയായിരുന്നുവെന്ന് യു.എസ് സീക്രട്ട് സര്വീസ് അറിയിച്ചു.
ഉടന് തന്നെ സീക്രട്ട് സര്വീസ് ഉദ്യോഗസ്ഥര് തിരിച്ചടിക്കുകയും അക്രമിക്ക് വെടിയേല്ക്കുകയും ചെയ്തു. ഗുരുതരമായി പരിക്കേറ്റ ഇയാളെ ഉടന് തന്നെ അടുത്തുള്ള ആശുപത്രിയില് എത്തിച്ചെങ്കിലും മരണം സംഭവിക്കുകയായിരുന്നു. വെടിവെപ്പില് വഴിയാത്രക്കാരനായ ഒരാള്ക്കും പരിക്കേറ്റിട്ടുണ്ട്. എന്നാല് ഇയാള്ക്ക് അക്രമിയുടെ വെടിയേറ്റതാണോ അതോ ഉദ്യോഗസ്ഥര് തിരിച്ചു വെടിവെച്ചപ്പോള് കൊണ്ടതാണോ എന്ന് വ്യക്തമല്ല. സംഭവസമയത്ത് പ്രസിഡന്റ് ഡൊണാള്ഡ് ട്രംപ് വൈറ്റ് ഹൗസിനുള്ളില് ഉണ്ടായിരുന്നുവെങ്കിലും അദ്ദേഹം പൂര്ണ്ണ സുരക്ഷിതനാണെന്നും സീക്രട്ട് സര്വീസ് ഉദ്യോഗസ്ഥര്ക്ക് ആര്ക്കും പരിക്കേറ്റിട്ടില്ലെന്നും അധികൃതര് വ്യക്തമാക്കി.
വെടിയൊച്ച കേട്ടതിനെ തുടര്ന്ന് വൈറ്റ് ഹൗസില് ജോലിയിലുണ്ടായിരുന്ന മാധ്യമപ്രവര്ത്തകരോട് പ്രസ് ബ്രീഫിംഗ് റൂമിനുള്ളിലേക്ക് മാറാന് സുരക്ഷാ ജീവനക്കാര് നിര്ദ്ദേശം നല്കി. വൈറ്റ് ഹൗസിന് ഒരു ബ്ലോക്ക് അകലെയുള്ള 17-ാം സ്ട്രീറ്റിലും പെന്സില്വാനിയ അവന്യൂവിലും വെടിവെപ്പ് നടന്നതായി വിവരമുണ്ടെന്നും അന്വേഷണം പുരോഗമിക്കുകയാണെന്നും സീക്രട്ട് സര്വീസ് എക്സ് പ്ലാറ്റ്ഫോമിലൂടെ അറിയിച്ചു.
വെടിവെപ്പ് നടന്ന സ്ഥലത്തെ സുരക്ഷാ നടപടികള് തുടരുകയാണെന്നും വിവരങ്ങള് അപ്പപ്പോള് പൊതുജനങ്ങളെ അറിയിക്കുമെന്നും എഫ്.ബി.ഐ ഡയറക്ടര് കാഷ് പട്ടേല് വ്യക്തമാക്കി. വൈറ്റ് ഹൗസ് കോംപ്ലക്സിന് തൊട്ടുപുറത്തുള്ള ഫുട്പാത്തില് വെടിവെപ്പ് നടന്നതിന്റെ തെളിവുകള് വ്യക്തമായിരുന്നു. പ്രദേശം മഞ്ഞ ക്രൈം സീന് ടേപ്പ് ഉപയോഗിച്ച് വളയുകയും സീക്രട്ട് സര്വീസ് ഉദ്യോഗസ്ഥര് തെളിവുകള് ശേഖരിക്കുകയും ചെയ്തു.
എബിസി ന്യൂസിന്റെ സീനിയര് വൈറ്റ് ഹൗസ് കറസ്പോണ്ടന്റ് സെലീന വാങ് വെടിയൊച്ച കേട്ട് ഭയന്ന് മാറുന്നതിന്റെ ദൃശ്യങ്ങള് എക്സില് പങ്കുവെച്ചു. ട്രംപിന്റെ ഇറാന് നയത്തെക്കുറിച്ച് റിപ്പോര്ട്ട് റെക്കോര്ഡ് ചെയ്യുന്നതിനിടയിലാണ് ഡസന് കണക്കിന് വെടിയൊച്ചകള് കേട്ടതെന്നും അവര് പറഞ്ഞു. ഈ വീഡിയോ ലക്ഷക്കണക്കിന് ആളുകളാണ് ഇതിനോടകം കണ്ടത്. വൈറ്റ് ഹൗസിന് സമീപം സമീപകാലത്തുണ്ടാകുന്ന മൂന്നാമത്തെ വലിയ സുരക്ഷാ പ്രതിസന്ധിയാണിത്.
കഴിഞ്ഞ നവംബറില് ഇതേ സ്ഥലത്തിനടുത്ത് വെച്ചുണ്ടായ വെടിവെപ്പില് വെസ്റ്റ് വെര്ജീനിയ നാഷണല് ഗാര്ഡിലെ ഉദ്യോഗസ്ഥയായ സാറാ ബെക്സ്ട്രോം കൊല്ലപ്പെടുകയും ആന്ഡ്രൂ വുള്ഫ് എന്ന ഉദ്യോഗസ്ഥന് ഗുരുതരമായി പരിക്കേല്ക്കുകയും ചെയ്തിരുന്നു. റഹ്മാനുള്ള ലകാന്വാല് എന്നയാളാണ് ഈ കേസില് പ്രതി. ഏപ്രില് 25-ന് വാഷിംഗ്ടണിലെ ഒരു ഹോട്ടലില് നടന്ന വൈറ്റ് ഹൗസ് കറസ്പോണ്ടന്റ്സ് അസോസിയേഷന് ഡിന്നറിനിടെ പ്രസിഡന്റ് ട്രംപിനെ വധിക്കാന് ശ്രമം നടന്നിരുന്നു. ഈ കേസില് പ്രതിയായ കോള് ടോമാസ് അലന് ഇപ്പോള് ഫെഡറല് കസ്റ്റഡിയിലാണ്.
മേയ് 4-ന് വാഷിംഗ്ടണ് സ്മാരകത്തിന് സമീപം ഉദ്യോഗസ്ഥര്ക്ക് നേരെ വെടിയുതിര്ത്ത ടെക്സസ് സ്വദേശിയായ മൈക്കല് മാര്ക്സിനെ സീക്രട്ട് സര്വീസ് വെടിവെച്ചിട്ടിരുന്നു. അതിനു പിന്നാലെയാണ് ഇപ്പോള് വീണ്ടും വെടിവെപ്പ് ഉണ്ടായിരിക്കുന്നത്.
