ആഗ്ര: തന്റെ ആദ്യ ഔദ്യോഗിക ഇന്ത്യ സന്ദര്‍ശനത്തിന്റെ ഭാഗമായി യു.എസ് വിദേശകാര്യ സെക്രട്ടറി മാര്‍ക്കോ റൂബിയോ ആഗ്രയിലെ പ്രശസ്തമായ താജ്മഹല്‍ സന്ദര്‍ശിച്ചു. പൊതുവേദിയിലെ തിളക്കങ്ങളില്‍ നിന്നും മാധ്യമശ്രദ്ധയില്‍ നിന്നും മാറിനില്‍ക്കാന്‍ ആഗ്രഹിക്കുന്ന ഭാര്യ ജനറ്റിനൊപ്പമാണ് അദ്ദേഹം എത്തിയത്. താജ്മഹലില്‍ ഇരുവരും 45 മിനിറ്റോളം ചിലവഴിച്ചു. ‘ഇത് ലോകത്തിലെ അത്ഭുതങ്ങളില്‍ ഒന്നാണ്,’ താജ്മഹലിനെക്കുറിച്ച് റൂബിയോ പറഞ്ഞു. ‘നാം സന്ദര്‍ശിക്കുന്ന രാജ്യങ്ങളുടെ സംസ്‌കാരത്തോട് ആദരവ് കാണിക്കേണ്ടത് പ്രധാനമാണെന്ന് ഞാന്‍ കരുതുന്നു,’ അദ്ദേഹം കൂട്ടിച്ചേര്‍ത്തു.
ചൂടിനെ പോലും വകവെക്കാതെയാണ് അദ്ദേഹം താജ്മഹാള്‍ സന്ദര്‍ശിച്ചത്. അദ്ദേഹത്തിന്റെ ഭാര്യക്കൊപ്പം ചിത്രങ്ങളും പകര്‍ത്തിയിരുന്നു. 1992-ല്‍ ഡയാന രാജകുമാരി തനിയെ ഇരുന്ന് ചിത്രം പകര്‍ത്തി പ്രശസ്തമായ അതേ ബെഞ്ചിലിരുന്നാണ് ഇരുവരും ഫോട്ടോയെടുത്തത്. ട്രംപിന്റെ മുന്‍ സഹായിയും നിലവിലെ യു.എസ് അംബാസഡറുമായ സെര്‍ജിയോ ഗോറും ദമ്പതികള്‍ക്കൊപ്പം ചിത്രങ്ങളില്‍ പങ്കുചേര്‍ന്നു.
സുരക്ഷാ ക്രമീകരണങ്ങളുടെ ഭാഗമായി താജ്മഹലിലേക്കുള്ള തിരക്കേറിയ റോഡുകള്‍ റൂബിയോയുടെ സന്ദര്‍ശനത്തിനായി ഒഴിപ്പിച്ചിരുന്നു. മറ്റ് വിനോദസഞ്ചാരികളെ 100 മീറ്റര്‍ അകലെയാണ് നിര്‍ത്തിയിരുന്നത്. എങ്കിലും, വൈസ് പ്രസിഡന്റ് ജെ.ഡി വാന്‍സിന്റെ സന്ദര്‍ശന വേളയില്‍ ഏര്‍പ്പെടുത്തിയതുപോലെയുള്ള പൂര്‍ണ്ണമായ അടച്ചുപൂട്ടല്‍ ഇത്തവണ ഉണ്ടായിരുന്നില്ല. പേര്‍ഷ്യന്‍ വാസ്തുവിദ്യയുടെ ശക്തമായ സ്വാധീനമുള്ള താജ്മഹലിലെ താഴികക്കുടങ്ങളും നാല് വശങ്ങളുള്ള ചാര്‍ബാഗ് തോട്ടങ്ങളും റൂബിയോയ്‌ക്ക് ഇറാനിയന്‍ സംസ്‌കാരത്തിന്റെ സ്വാധീനം കൂടി അനുസ്മരിപ്പിക്കുന്നതായിരുന്നു.
പതിനേഴാം നൂറ്റാണ്ടില്‍ മുഗള്‍ ചക്രവര്‍ത്തിയായ ഷാജഹാന്‍, പ്രസവത്തെ തുടര്‍ന്ന് മരണപ്പെട്ട തന്റെ പ്രിയ പത്‌നി മുംതാസ് മഹലിന്റെ ഓര്‍മ്മയ്‌ക്കായി നിര്‍മ്മിച്ച ശവകുടീരമാണ് താജ്മഹല്‍. ഏകദേശം ഒന്നര വര്‍ഷത്തെ തന്റെ ഔദ്യോഗിക ജീവിതത്തിനിടയില്‍ ഹ്രസ്വവും ബിസിനസ്സ് കേന്ദ്രീകൃതവുമായ യാത്രകള്‍ മാത്രം ഇഷ്ടപ്പെടുന്ന റൂബിയോയ്‌ക്ക് ഈ സന്ദര്‍ശനം തികച്ചും വ്യത്യസ്തമായ ഒന്നായിരുന്നു. ഔദ്യോഗിക യോഗങ്ങള്‍ക്ക് പുറത്തുള്ള പരിപാടികളില്‍ അദ്ദേഹം വളരെ അപൂര്‍വ്വമായേ പങ്കെടുക്കാറുള്ളൂ.
ചൊവ്വാഴ്ച ന്യൂഡല്‍ഹിയില്‍ നടക്കുന്ന ക്വാഡ് (ഓസ്ട്രേലിയ, ഇന്ത്യ, ജപ്പാന്‍, യുണൈറ്റഡ് സ്റ്റേറ്റ്സ്) കൂട്ടായ്മയുടെ യോഗത്തിന് മുന്നോടിയായി ലഭിച്ച ഒരു ദിവസത്തെ ഇടവേള വിനിയോഗിക്കുകയായിരുന്നു താനെന്ന് റൂബിയോ വ്യക്തമാക്കി. തിങ്കളാഴ്ച കൊട്ടാരങ്ങളുടെ നഗരമായ ജയ്പൂരിലെ ആംബര്‍ കോട്ടയും അദ്ദേഹം സന്ദര്‍ശിക്കും. ചൈനയുടെ വളര്‍ച്ചയ്‌ക്കെതിരെ സമാന ചിന്താഗതിയുള്ള പങ്കാളിയായി മുന്‍ യു.എസ് ഭരണകൂടങ്ങള്‍ കണ്ടിരുന്ന ഇന്ത്യയുമായുള്ള ബന്ധം പുനരുജ്ജീവിപ്പിക്കുക എന്ന ലക്ഷ്യത്തോടെയാണ് റൂബിയോ നാല് ദിവസത്തെ സന്ദര്‍ശനത്തിനായി ഇന്ത്യയിലെത്തിയത്.
