ഫ്രഞ്ച് ഓപ്പണില്‍ വന്‍ അട്ടിമറി; ഏഴാം സീഡ് ടെയ്ലര്‍ ഫ്രിറ്റ്സിനെ വീഴ്‌ത്തി ഇരുപത്തൊന്നുകാരന്‍ നിഷേശ് ബസവറെഡ്ഡി

പാരീസ്: ഫ്രഞ്ച് ഓപ്പണ്‍ ടെന്നീസ് ടൂര്‍ണമെന്റിന്റെ ആദ്യ റൗണ്ടില്‍ വന്‍ അട്ടിമറി. മുന്‍നിര താരം അമേരിക്കയുടെ ടെയ്ലര്‍ ഫ്രിറ്റ്സിനെ അട്ടിമറിച്ച് അമേരിക്കന്‍ യുവതാരം നിഷേശ് ബസവറെഡ്ഡി രണ്ടാം റൗണ്ടില്‍ കടന്നു. കടുത്ത പോരാട്ടം കണ്ട മത്സരത്തില്‍ ഏഴാം സീഡായ ഫ്രിറ്റ്സിനെ ഒന്നിനെതിരെ മൂന്ന് സെറ്റുകള്‍ക്കാണ് 21-കാരനായ വൈല്‍ഡ് കാര്‍ഡ് താരം നിഷേശ് പരാജയപ്പെടുത്തിയത്. സ്‌കോര്‍: 7-6(5), 76(5), 67(9), 61.

മുട്ടിനേറ്റ പരിക്കിനെ തുടര്‍ന്ന് രണ്ട് മാസത്തെ ഇടവേളയ്‌ക്ക് ശേഷമാണ് ഫ്രിറ്റ്സ് കഴിഞ്ഞ ആഴ്ച ജനീവ ഓപ്പണിലൂടെ കോര്‍ട്ടിലേക്ക് തിരിച്ചെത്തിയത്. എന്നാല്‍ അവിടെയും ആദ്യ റൗണ്ടില്‍ താരം പരാജയപ്പെട്ടിരുന്നു. കോര്‍ട്ട് സുസെയ്ന്‍ ലെന്‍ഗ്ലനില്‍ നടന്ന ഇന്നത്തെ മത്സരത്തിലും കളിയിലുടനീളം ഫ്രിറ്റ്സിന് താളം കണ്ടെത്താന്‍ ബുദ്ധിമുട്ടേണ്ടി വന്നു. റോളണ്ട് ഗാരോസിലെ (ഫ്രഞ്ച് ഓപ്പണ്‍) തന്റെ ആദ്യ പ്രധാന പോരാട്ടത്തില്‍ ഒട്ടും പതറാതെ കളിച്ചതാണ് നിഷേശിന് വിജയം സമ്മാനിച്ചത്. മൂന്നാം സെറ്റ് നഷ്ടമായിട്ടും തളരാതെ പോരാടിയ നിഷേശിനെ ഗാലറിയിലെ കാണികള്‍ എഴുന്നേറ്റു നിന്ന് കൈയടിച്ചാണ് വരവേറ്റത്.

‘മൂന്നാം സെറ്റ് കൈവിട്ടിട്ടും ഈ മത്സരം ജയിക്കാന്‍ കഴിഞ്ഞതില്‍ എനിക്ക് വലിയ സന്തോഷമുണ്ട്. എല്ലാവര്‍ക്കും നന്ദി. ഇത്തരം വലിയ ടൂര്‍ണമെന്റുകളില്‍ എല്ലാ കളിക്കാരും അവരുടെ ഏറ്റവും മികച്ച പ്രകടനമാണ് പുറത്തെടുക്കുന്നത്. ഇന്ന് എനിക്ക് അതിന് സാധിച്ചുവെന്നത് വലിയ കാര്യമാണ്.’ നിഷേശ് ബസവറെഡ്ഡി പറഞ്ഞു.

ടൈബ്രേക്കറിലേക്ക് നീണ്ട ആവേശകരമായ ഒന്നാം സെറ്റ് സ്വന്തമാക്കിയ നിഷേശ്, രണ്ടാം സെറ്റിലും മികച്ച പ്രകടനം തുടര്‍ന്നു. മനോഹരമായ ഡ്രോപ്പ് ഷോട്ടുകളിലൂടെ ഫ്രിറ്റ്സിനെ സമ്മര്‍ദ്ദത്തിലാക്കാന്‍ ലോക 148-ാം റാങ്കുകാരനായ നിഷേശിന് കഴിഞ്ഞു. രണ്ടാം സെറ്റിന്റെ ടൈബ്രേക്കറിലും കരുത്തുറ്റ സെര്‍വുകളിലൂടെ വിജയം നേടിയതോടെ താരം മത്സരത്തില്‍ 2-0ത്തിന് മുന്നിലെത്തി.

തുടര്‍ന്ന് മൂന്നാം സെറ്റില്‍ ഫ്രിറ്റ്സ് ശക്തമായി തിരിച്ചടിച്ചു. ഒരു മാച്ച് പോയിന്റ് രക്ഷപെടുത്തി ടൈബ്രേക്കറിലൂടെ മൂന്നാം സെറ്റ് ഫ്രിറ്റ്സ് സ്വന്തമാക്കിയെങ്കിലും, നാലാം സെറ്റില്‍ നിഷേശ് പൂര്‍ണ്ണ ആധിപത്യം പുലര്‍ത്തി. ഫ്രിറ്റ്സിന് ഒരവസരവും നല്‍കാതെ 6-1 എന്ന സ്‌കോറിനാണ് നിഷേശ് നാലാം സെറ്റും മത്സരവും കൈപ്പിടിയിലൊതുക്കിയത്. കരിയറിലെ തന്റെ ആദ്യത്തെ ടോപ്പ്-10 വിജയമാണ് നിഷേശ് ഇന്ന് സ്വന്തമാക്കിയത്.

‘ഞാന്‍ മികച്ച നിലവാരത്തിലാണ് കളിക്കുന്നതെന്ന് എനിക്കറിയാമായിരുന്നു. നാലാം സെറ്റിന്റെ തുടക്കത്തില്‍ തന്നെ ശക്തമായി തിരിച്ചുവരാന്‍ എനിക്ക് കഴിഞ്ഞു. എന്റെ കരിയറിലെ തന്നെ ഏറ്റവും മികച്ച സെറ്റായിരുന്നു അത്,’ നിഷേശ് കൂട്ടിച്ചേര്‍ത്തു. രണ്ടാം റൗണ്ടില്‍ അലക്‌സാണ്ടര്‍ ഷെവ്‌ചെങ്കോ അല്ലെങ്കില്‍ അലക്‌സ് മിഷേല്‍സന്‍ എന്നിവരില്‍ ഒരാളുമായി നിഷേശ് ഏറ്റുമുട്ടും.