ധര്മ്മശാല: ഐ.പി.എല് 2026-ന്റെ കലാശപ്പോരാട്ടത്തിന് ആര് നേരിട്ട് യോഗ്യത നേടുമെന്നറിയാനുള്ള ആദ്യ ക്വാളിഫയര് മത്സരത്തില് നിലവിലെ ചാമ്പ്യന്മാരായ റോയല് ചലഞ്ചേഴ്സ് ബെംഗളൂരുവും ഗുജറാത്ത് ടൈറ്റന്സും ഇന്ന് നേര്ക്കുനേര്. ധര്മ്മശാലയിലെ മനോഹരമായ എച്ച്.പി.സി.എ സ്റ്റേഡിയത്തില് ഇന്ന് വൈകുന്നേരമാണ് ഈ ആവേശപ്പോരാട്ടം നടക്കുക. ഇന്നത്തെ മത്സരത്തില് വിജയിക്കുന്നവര്ക്ക് മെയ് 31-ന് അഹമ്മദാബാദില് നടക്കുന്ന ഫൈനലിലേക്ക് നേരിട്ട് പ്രവേശിക്കാം. തോല്ക്കുന്നവര്ക്ക് മെയ് 29-ന് ചണ്ഡീഗഢില് നടക്കുന്ന ക്വാളിഫയര് 2-ലൂടെ ഫൈനലിലെത്താന് ഒരു അവസരം കൂടി ലഭിക്കുമെങ്കിലും, കനത്ത പോരാട്ടത്തിലൂടെ നേരിട്ട് ഫൈനല് ഉറപ്പിക്കാനായിരിക്കും ഇരുടീമുകളുടെയും ശ്രമം.
ലീഗ് ഘട്ടത്തില് 14 മത്സരങ്ങളില് നിന്ന് 18 പോയിന്റുമായി തുല്യത പാലിച്ച ഇരുടീമുകളെയും നെറ്റ് റണ്റേറ്റിന്റെ നേരിയ വ്യത്യാസത്തിലാണ് (ആര്.സി.ബി: 0.783, ജി.ടി: 0.695) ഒന്നും രണ്ടും സ്ഥാനക്കാരായി നിര്ണ്ണയിച്ചത്. രജത് പടീദാറിന്റെ ശാന്തവും ശക്തവുമായ നായകത്വത്തിന് കീഴില് ഇറങ്ങുന്ന ആര്.സി.ബി കഴിഞ്ഞ സീസണിലെ ചാമ്പ്യന്മാരാണ്. കഴിഞ്ഞ വര്ഷം അഹമ്മദാബാദില് പഞ്ചാബ് കിങ്സിനെ തോല്പ്പിച്ച് തങ്ങളുടെ 18 വര്ഷത്തെ കിരീട വരള്ച്ച അവസാനിപ്പിച്ച ആര്.സി.ബി, അതേ മണ്ണില് വീണ്ടുമൊരു കിരീടധാരണമാണ് ലക്ഷ്യമിടുന്നത്.
മറുഭാഗത്ത്, അവസാന ലീഗ് മത്സരത്തില് ചെന്നൈ സൂപ്പര് കിങ്സിനെ 89 റണ്സിന് തകര്ത്തതിന്റെ ആത്മവിശ്വാസത്തിലാണ് ശുഭ്മന് ഗില്ലിന്റെ ഗുജറാത്ത് ടൈറ്റന്സ് വരുന്നത്. 2022-ല് തങ്ങളുടെ കന്നി കിരീടം നേടിയ അഹമ്മദാബാദിലെ നരേന്ദ്ര മോദി സ്റ്റേഡിയം ഗുജറാത്തിന്റെ സ്വന്തം കോട്ടയാണ്. ഇരുടീമുകളും ഇതുവരെ നേര്ക്കുനേര് വന്നപ്പോള് 4-4 എന്ന നിലയില് തുല്യശക്തികളാണ്. എന്നാല് ഈ സീസണില് ധര്മ്മശാലയില് കളിച്ച പരിചയസമ്പത്ത് ആര്.സി.ബിക്ക് അനുകൂലമായേക്കാം. ഗുജറാത്ത് ടൈറ്റന്സ് ഈ മൈതാനത്ത് ആദ്യമായാണ് കളിക്കുന്നത്.
ഈ മത്സരത്തിലെ ഏറ്റവും വലിയ ആകര്ഷണം ഇന്ത്യന് ബാറ്റിങ്ങിലെ ‘കിങ്’ വിരാട് കോഹ്ലിയും ‘പ്രിന്സ്’ ശുഭ്മന് ഗില്ലും തമ്മിലുള്ള പോരാട്ടമാണ്. ഈ സീസണില് 13 മത്സരങ്ങളില് നിന്ന് 616 റണ്സുമായി ഗില് റണ്വേട്ടക്കാരില് രണ്ടാം സ്ഥാനത്തുണ്ട്. കോഹ്ലി 14 മത്സരങ്ങളില് നിന്ന് ഒരു സെഞ്ചുറിയും 4 അര്ധസെഞ്ചുറികളുമടക്കം 557 റണ്സ് നേടിയിട്ടുണ്ട്. ഗുജറാത്തിനെതിരെ 76.66 എന്ന മികച്ച ബാറ്റിങ് ശരാശരിയാണ് കോഹ്ലിക്കുള്ളത്. ധര്മ്മശാലയിലെ ഉയര്ന്ന പ്രദേശത്തെ കാലാവസ്ഥയും പിച്ചിലെ അധിക ബൗണ്സും പേസ് ബൗളര്മാരെ വന്തോതില് തുണയ്ക്കുന്നതാണ്. ഇവിടുത്തെ പിച്ചില് വീണ വിക്കറ്റുകളില് മുക്കാല് പങ്കും പേസര്മാര്ക്കാണ് ലഭിച്ചിട്ടുള്ളത്.
പര്പ്പിള് ക്യാപ് കൈവശമുള്ള ഭുവനേശ്വര് കുമാര് (24 വിക്കറ്റ്), ജോഷ് ഹേസല്വുഡ്, രാസിഖ് സലാം ദാര് എന്നിവരടങ്ങുന്നതാണ് ആര്.സി.ബിയുടെ പേസ് നിര. ഇതിനെ പ്രതിരോധിക്കാന് കഗിസോ റബാഡ (24 വിക്കറ്റ്), മുഹമ്മദ് സിറാജ് (17 വിക്കറ്റ്), പ്രസീദ് കൃഷ്ണ, ജേസണ് ഹോള്ഡര് എന്നിവരുമായാണ് ഗുജറാത്ത് എത്തുന്നത്. റബാഡ കോഹ്ലിയെ ട്വന്റി-20-യില് അഞ്ച് തവണ പുറത്താക്കിയിട്ടുണ്ടെന്നതും, ഭുവനേശ്വര് കുമാറിനെതിരെ ഗില്ലിനുള്ള കുറഞ്ഞ സ്ട്രൈക്ക് റേറ്റും മത്സരത്തിലെ നിര്ണ്ണായക ഘടകങ്ങളാകും.
സാധ്യതയുള്ള ഇലവന്:
റോയല് ചലഞ്ചേഴ്സ് ബെംഗളൂരു: വെങ്കിടേഷ് അയ്യര്, വിരാട് കോഹ്ലി, ദേവ്ദത്ത് പടിക്കല്, രജത് പടീദാര് (ക്യാപ്റ്റന്), ജിതേഷ് ശര്മ്മ, ടിം ഡേവിഡ്, റൊമാരിയോ ഷെപ്പേര്ഡ്, ക്രുനാല് പാണ്ഡ്യ, ഭുവനേശ്വര് കുമാര്, രാസിഖ് സലാം ദാര്, ജോഷ് ഹേസല്വുഡ്.
ഗുജറാത്ത് ടൈറ്റന്സ്: സായ് സുദര്ശന്, ശുഭ്മന് ഗില് (ക്യാപ്റ്റന്), ജോസ് ബട്ലര്, വാഷിംഗ്ടണ് സുന്ദര്, ജേസണ് ഹോള്ഡര്, രാഹുല് തെവാട്ടിയ, നിഷാന്ത് സിന്ധു, റാഷിദ് ഖാന്, അര്ഷാദ് ഖാന്, കഗിസോ റബാഡ, മുഹമ്മദ് സിറാജ്.
