ന്യൂഡല്ഹി: രാജ്യത്തെ അനധികൃത കുടിയേറ്റവും അതുമൂലമുണ്ടാകുന്ന ‘അസ്വാഭാവിക ജനസംഖ്യാപരമായ മാറ്റങ്ങളും’ പരിശോധിക്കുന്നതിനായി ഉന്നതാധികാര സമിതി രൂപീകരിച്ചതായി കേന്ദ്ര ആഭ്യന്തരമന്ത്രി അമിത് ഷാ. ഈ പ്രശ്നം ഇന്ത്യയുടെ പരമാധികാരം, ദേശീയ സുരക്ഷ, സാമൂഹിക സന്തുലിതാവസ്ഥ, ഗോത്രവര്ഗ്ഗ സമൂഹങ്ങളുടെ സംരക്ഷണം എന്നിവയ്ക്ക് വലിയ വെല്ലുവിളിയാണെന്ന് അദ്ദേഹം ചൂണ്ടിക്കാട്ടി. കഴിഞ്ഞ വര്ഷത്തെ സ്വാതന്ത്ര്യദിന പ്രസംഗത്തില് പ്രധാനമന്ത്രി നരേന്ദ്ര മോദി നല്കിയ വാഗ്ദാനമാണ് ഇപ്പോള് നടപ്പിലാക്കുന്നതെന്ന് എക്സിലൂടെ അമിത് ഷാ വ്യക്തമാക്കി.
‘അനധികൃത കടന്നുകയറ്റവും മറ്റ് കാരണങ്ങള് മൂലവുമുള്ള അസ്വാഭാവിക ജനസംഖ്യാ വ്യതിയാനവും ഏതൊരു രാജ്യത്തിന്റെയും വര്ത്തമാനകാലത്തിനും ഭാവിഷിത്തിനും വലിയ വെല്ലുവിളിയാണ്. ഈ വെല്ലുവിളി നേരിടാന് 2025 ഓഗസ്റ്റ് 15-ന് പ്രധാനമന്ത്രി നരേന്ദ്ര മോദി ജി ‘ജനസംഖ്യാപരമായ മാറ്റങ്ങളെക്കുറിച്ചുള്ള ഉന്നതാധികാര സമിതി’ പ്രഖ്യാപിച്ചിരുന്നു. സര്ക്കാര് ഇപ്പോള് ഈ കമ്മിറ്റിക്ക് രൂപം നല്കിയ വിവരം സന്തോഷപൂര്വ്വം അറിയിക്കുന്നു,’ അമിത് ഷാ എക്സില് കുറിച്ചു.
വിരമിച്ച സുപ്രീം കോടതി ജസ്റ്റിസ് പ്രകാശ് പ്രഭാകര് നാവ്ലേക്കര് അധ്യക്ഷനായ സമിതിയില് പ്രമുഖ വ്യക്തികളാണ് അംഗങ്ങളായിട്ടുള്ളത്. ജസ്റ്റിസ് പ്രകാശ് പ്രഭാകര് നാവ്ലേക്കര് (റിട്ട.) ചെയര്മാന്, ദുര്ഗ്ഗാ ശങ്കര് മിശ്ര (മുന് ഐ.എ.എസ് ഉദ്യോഗസ്ഥന്), ബാലാജി ശ്രീവാസ്തവ (മുന് ഐ.പി.എസ് ഉദ്യോഗസ്ഥന്), ഡോ. ഷാമിക രവി (സാമ്പത്തിക ശാസ്ത്രജ്ഞ) എന്നിവരും, സെന്സസ് കമ്മീഷണര് ജോയിന്റ് സെക്രട്ടറി (ഫോറിനേഴ്സ്-I), ആഭ്യന്തര മന്ത്രാലയം മെമ്പര് സെക്രട്ടറി എന്നിവരും ഉണ്ടായിരിക്കും.
അനധികൃത കുടിയേറ്റവും മറ്റ് അസ്വാഭാവിക കാരണങ്ങളും മൂലം ഇന്ത്യയിലുടനീളം ഉണ്ടാകുന്ന ജനസംഖ്യാപരമായ മാറ്റങ്ങളെക്കുറിച്ച് സമിതി സമഗ്രമായ വിലയിരുത്തല് നടത്തുമെന്ന് ആഭ്യന്തരമന്ത്രി അറിയിച്ചു. വിവിധ മത-സാമൂഹിക വിഭാഗങ്ങള്ക്കിടയിലുണ്ടാകുന്ന അസ്വാഭാവിക ജനസംഖ്യാ വ്യതിയാനങ്ങളുടെ രീതികള് വിശകലനം ചെയ്യുകയും, ഇതിന് കൃത്യമായ സമയപരിധിക്കുള്ളില് ആസൂത്രിതമായ പരിഹാരം സമര്പ്പിക്കുകയും ചെയ്യുക എന്നതാണ് സമിതിയുടെ ലക്ഷ്യം.
രാജസ്ഥാനിലെ ബിക്കാനീര് ജില്ലയിലുള്ള അതിര്ത്തി രക്ഷാസേനയുടെ (ബി.എസ്.എഫ്) സാഞ്ചു ഔട്ട്പോസ്റ്റ് സന്ദര്ശിച്ച ദിവസമാണ് അമിത് ഷാ ഈ സുപ്രധാന പ്രഖ്യാപനം നടത്തിയത്. കടന്നുകയറ്റം, കള്ളക്കടത്ത്, ഡ്രോണുകള് വഴിയുള്ള മയക്കുമരുന്ന് കടത്ത് തുടങ്ങിയ പുതിയ സുരക്ഷാ വെല്ലുവിളികള് മുന്നിര്ത്തിയാണ് അന്താരാഷ്ട്ര അതിര്ത്തിയില് നിന്ന് ബി.എസ്.എഫിന്റെ അധികാരപരിധി 50 കിലോമീറ്ററായി കേന്ദ്രം വ്യാപിപ്പിച്ചതെന്ന് അദ്ദേഹം സേനാംഗങ്ങളെ അഭിസംബോധന ചെയ്ത് പറഞ്ഞു.
അതിര്ത്തി കടന്നുള്ള കടന്നുകയറ്റം മൂലമുണ്ടാകുന്ന ജനസംഖ്യാപരമായ മാറ്റങ്ങള്ക്കെതിരെ അതീവ ജാഗ്രത പാലിക്കണമെന്നും അതിര്ത്തി ഗ്രാമങ്ങളിലെ പ്രവര്ത്തനങ്ങള് ഏജന്സികള് സൂക്ഷ്മമായി നിരീക്ഷിക്കണമെന്നും അദ്ദേഹം ആവശ്യപ്പെട്ടു.
