വാഷിങ്ടൺ ഡി.സി: ഹോർമൂസ് കടലിടുക്കിന്റെ നിയന്ത്രണം ഏതെങ്കിലും ഒരു രാജ്യത്തിന് മാത്രമായി വിട്ടുകൊടുക്കാൻ അനുവദിക്കില്ലെന്ന് വ്യക്തമാക്കി അമേരിക്കൻ പ്രസിഡന്റ് ഡൊണാൾഡ് ട്രംപ്. കടലിടുക്ക് തുറക്കുന്നതുമായി ബന്ധപ്പെട്ട് ഇറാനുമായി നടക്കുന്ന ചർച്ചകളെക്കുറിച്ച് സംസാരിക്കവെയാണ് ഒമാന് ട്രംപ് കടുത്ത ഭാഷയിൽ മുന്നറിയിപ്പ് നൽകിയത്. ഹോർമൂസ് കടലിടുക്ക് ലോകത്തെ എല്ലാ രാജ്യങ്ങൾക്കുമായി തുറന്നുകിടക്കേണ്ടതാണെന്നും ഏതെങ്കിലും ഒരു പ്രത്യേക രാജ്യം മാത്രം നിരീക്ഷിക്കേണ്ട ഒന്നല്ല ഇതെന്നും അദ്ദേഹം വ്യക്തമാക്കി.
ഹോർമൂസ് കടലിടുക്കിൽ തങ്ങളുടെ ഭാഗത്തുനിന്നും ശക്തമായ നിരീക്ഷണം ഉണ്ടാകുമെന്നും എന്നാൽ മറ്റൊരു രാജ്യത്തെയും ഇതിന്റെ പൂർണ്ണ നിയന്ത്രണം ഏറ്റെടുക്കാൻ അനുവദിക്കില്ലെന്നും ട്രംപ് കൂട്ടിച്ചേർത്തു. ഈ വിഷയത്തിൽ ഒമാൻ മറ്റെല്ലാവരെയും പോലെ സാധാരണ രീതിയിൽ പെരുമാറണമെന്നും അല്ലാത്തപക്ഷം ഒമാനെ തകർക്കേണ്ടി വരുമെന്നുമുള്ള അതീവ ഗുരുതരമായ ഭീഷണിയാണ് അമേരിക്കൻ പ്രസിഡന്റ് മുഴക്കിയിരിക്കുന്നത്.
