ന്യൂഡൽഹി: നടിയും പ്രമുഖ ബിജെപി നേതാവുമായ ഖുശ്ബുവിന്റെയും സംവിധായകൻ സുന്ദർ സി.യുടെയും മൂത്ത മകളും യുവനടിയുമായ അവന്തിക വിവാഹിതയാകുന്നു. ശ്രാവൺ ശ്രീനിവാസനാണ് അവന്തികയുടെ കൈപിടിക്കുന്നത്. ഈ വലിയ സന്തോഷം പങ്കുവെക്കാനും വിവാഹത്തിന് ക്ഷണിക്കാനുമായി ഖുശ്ബുവും കുടുംബവും നേരിട്ടെത്തിയത് സാക്ഷാൽ പ്രധാനമന്ത്രി നരേന്ദ്ര മോദിയുടെ മുന്നിലേക്കാണ്.
ഡൽഹിയിലെത്തി പ്രധാനമന്ത്രിക്ക് നേരിട്ട് വിവാഹ ക്ഷണക്കത്ത് കൈമാറിയ വിശേഷം ഖുശ്ബു തന്നെയാണ് സോഷ്യൽ മീഡിയയിലൂടെ പങ്കുവെച്ചത്. ഖുശ്ബു, ഭർത്താവ് സുന്ദർ സി., മകൾ അവന്തിക, പ്രതിശ്രുത വരൻ ശ്രാവൺ ശ്രീനിവാസൻ എന്നിവർ പ്രധാനമന്ത്രിക്കൊപ്പം നിൽക്കുന്ന ചിത്രവും അവർ പങ്കുവെച്ചിട്ടുണ്ട്. ഏറെ തിരക്കുകൾക്കിടയിലും തങ്ങളെ കാണാൻ സമയം അനുവദിച്ചതിനും, പ്രതിശ്രുത വരനും വധുവിനും നൽകിയ അനുഗ്രഹങ്ങൾക്കും ഖുശ്ബു പ്രധാനമന്ത്രിയോട് ഹൃദയം നിറഞ്ഞ നന്ദി രേഖപ്പെടുത്തി.
നിലവിൽ സിനിമ-സീരിയൽ രംഗത്തും ഒപ്പം രാഷ്‌ട്രീയത്തിലും ഒരുപോലെ സജീവമാണ് ഖുശ്ബു. അമ്മയുടെ വഴിയിലൂടെ സിനിമയിലെത്തിയ അവന്തിക അഭിനയിച്ച പുതിയ തമിഴ്, മലയാളം ചിത്രങ്ങൾ റിലീസിന് തയ്യാറെടുക്കുകയാണ്. ഇവർക്ക് പുറമെ ഖുശ്ബുവിന്റെ ഇളയ മകൾ ആനന്ദിത സിനിമയിൽ നിർമാണരംഗത്താണ് ശ്രദ്ധ കേന്ദ്രീകരിക്കുന്നത്.
