ഷില്ലോങ്: വടക്കുകിഴക്കന് സംസ്ഥാനങ്ങളില് തീവ്രവാദം ഇപ്പോള് ഒരു പ്രശ്നമല്ലാത്തതിനാല്, ഇനി മുതല് ക്രമസമാധാന പരിപാലനത്തില് നിന്ന് പൗരന്മാരുടെ അവകാശങ്ങള് സംരക്ഷിക്കുന്നതിലേക്ക് ശ്രദ്ധ കേന്ദ്രീകരിക്കാന് കേന്ദ്ര ആഭ്യന്തര മന്ത്രി അമിത് ഷാ വടക്കുകിഴക്കന് സംസ്ഥാനങ്ങളിലെ മുഖ്യമന്ത്രിമാര്ക്ക് നിര്ദ്ദേശം നല്കി. പുതിയ തലമുറയ്ക്കായി ആര്ട്ടിഫിഷ്യല് ഇന്റലിജന്സ്, മെഷീന് ലേണിംഗ്, ബ്ലോക്ക്ചെയിന് ഇന്ഫ്രാസ്ട്രക്ചര് എന്നിവ നിര്മ്മിക്കാനും അദ്ദേഹം സംസ്ഥാനങ്ങളോട് ആവശ്യപ്പെട്ടു. അഗര്വുഡ്, വിദേശ വ്യാപാരം, ഹെല്ത്ത് ടൂറിസം എന്നിവയില് വടക്കുകിഴക്കന് മേഖലയുടെ സാധ്യതകള് വിപണനം ചെയ്യാന് നിര്ദ്ദേശം നല്കിയതായും അമിത് ഷാ പറഞ്ഞു.
ഷില്ലോങ്ങില് നടന്ന നോര്ത്ത് ഈസ്റ്റേണ് കൗണ്സിലിന്റെ 73ാമത് പ്ലീനറി സമ്മേളനത്തില് സംസാരിക്കുകയായിരുന്നു ആഭ്യന്തര മന്ത്രി. നരേന്ദ്ര മോദി സര്ക്കാര് വടക്കുകിഴക്കന് മേഖലയിലെ അക്രമങ്ങളുടെ യുഗത്തിന് അറുതി വരുത്തിയെന്നും തര്ക്കങ്ങളുടെ കേന്ദ്രമായിരുന്ന ഈ പ്രദേശത്തെ അവസരങ്ങളുടെ കേന്ദ്രമാക്കി മാറ്റിയെന്നും അദ്ദേഹം പറഞ്ഞു. സമ്മേളനത്തിന് ശേഷം സമൂഹമാധ്യമമായ ‘എക്സില്’ പങ്കുവെച്ച കുറിപ്പില്, ജനങ്ങളുടെ ആഗ്രഹങ്ങള് നിറവേറ്റുന്നതിനും സംസ്കാരം പ്രോത്സാഹിപ്പിക്കുന്നതിനും ഒപ്പം വടക്കുകിഴക്കന് മേഖലയുടെ വികസനത്തിനായുള്ള തന്ത്രപരമായ ആസൂത്രണ സ്ഥാപനമായാണ് എന്.ഇ.സി ഇപ്പോള് പ്രവര്ത്തിക്കുന്നതെന്ന് അമിത് ഷാ വ്യക്തമാക്കി.
കൂടുതല് ശക്തവും സമൃദ്ധവുമായ ഒരു വടക്കുകിഴക്കന് മേഖല കെട്ടിപ്പടുക്കാനുള്ള തങ്ങളുടെ തീരുമാനത്തില് എല്ലാ നേതാക്കളും ഒറ്റക്കെട്ടാണെന്ന് എന്.ഇ.സി സമ്മേളനത്തില് പങ്കെടുത്ത വടക്കുകിഴക്കന് മേഖല വികസന മന്ത്രി ജ്യോതിരാദിത്യ സിന്ധ്യ പറഞ്ഞു. വടക്കുകിഴക്കന് മേഖലയിലെ ഗവര്ണര്മാര്, മുഖ്യമന്ത്രിമാര്, നയരൂപകര്ത്താക്കള് എന്നിവരുള്പ്പെടെയുള്ള പ്രമുഖ നേതാക്കള് ഈ പ്ലീനറി സമ്മേളനത്തില് പങ്കെടുത്തു. ഗവര്ണര്മാരും മുഖ്യമന്ത്രിമാരും ഉപമുഖ്യമന്ത്രിമാരും മുതിര്ന്ന ഉദ്യോഗസ്ഥരും പ്ലീനറി ചര്ച്ചകള്ക്കായി ഒത്തുകൂടിയതായി എന്.ഇ.സി എക്സിലൂടെ അറിയിച്ചു.
വടക്കുകിഴക്കന് മേഖലയുടെ വളര്ച്ച, കണക്റ്റിവിറ്റി, സമൃദ്ധി എന്നിവയ്ക്കായുള്ള തങ്ങളുടെ കൂട്ടായ പ്രതിജ്ഞാബദ്ധത എല്ലാ നേതാക്കളും ആവര്ത്തിച്ചു. സമ്മേളനത്തെക്കുറിച്ച് സംസാരിച്ച ആതിഥേയനായ മേഘാലയ മുഖ്യമന്ത്രി കോണ്റാഡ് കെ. സാങ്മ, കേന്ദ്ര ആഭ്യന്തര മന്ത്രിയും ഡോണര് മന്ത്രിയും നല്കിയ നിര്ദ്ദേശങ്ങള്ക്കനുസരിച്ച് വടക്കുകിഴക്കന് സംസ്ഥാനങ്ങളിലെ എട്ട് മുഖ്യമന്ത്രിമാരും പൊതുവായ ലക്ഷ്യം കൈവരിക്കാന് ഒന്നിച്ച് പ്രവര്ത്തിക്കുമെന്ന് വ്യക്തമാക്കി.
മുഖ്യമന്ത്രിമാരുടെ ഉന്നതതല ടാസ്ക് ഫോഴ്സ് കൈവരിച്ച പുരോഗതിയെക്കുറിച്ച് പ്ലീനറി സമ്മേളനം ചര്ച്ച ചെയ്തു. കാര്ഷിക സംബന്ധമായ ടാസ്ക് ഫോഴ്സ്, ടൂറിസം ടാസ്ക് ഫോഴ്സ്, ഇന്ഫ്രാസ്ട്രക്ചര്, കായികം എന്നിവയുള്പ്പെടെ വടക്കുകിഴക്കന് മേഖലയ്ക്ക് പ്രാധാന്യമുള്ള വിഷയങ്ങള് സമ്മേളനത്തില് അവതരിപ്പിച്ചു.
