ന്യൂഡല്ഹി: അന്താരാഷ്ട്ര ബോക്സിങ് അസോസിയേഷന്റെ ഏറ്റവും പുതിയ ലോക റാങ്കിങ്ങില് ഇന്ത്യന് താരങ്ങള്ക്ക് മിന്നും നേട്ടം. വനിതകളുടെ 57 കിലോഗ്രാം വിഭാഗത്തില് ഇന്ത്യന് താരം ജെയ്സ്മിന് ലംബോറിയ ലോക ഒന്നാം നമ്പറിലേക്ക് ഉയര്ന്നപ്പോള്, ഏഷ്യന് ചാമ്പ്യന്മാരായ പ്രിയ ഗംഗാസ് (60 കിലോഗ്രാം), വിശ്വനാഥ് സുരേഷ് (50 കിലോഗ്രാം) എന്നിവര് തങ്ങളുടെ വിഭാഗങ്ങളില് ആദ്യ മൂന്ന് സ്ഥാനങ്ങളില് ഇടംപിടിച്ചു.
വനിതാ വിഭാഗത്തില് 48 കിലോഗ്രാം വിഭാഗത്തില് മിനാക്ഷി ലോക ഒന്നാം നമ്പര് സ്ഥാനം നിലനിര്ത്തി. ഇതേ വിഭാഗത്തില് പ്രീതി മൂന്നാം സ്ഥാനത്തേക്ക് ഉയര്ന്നു. 70 കിലോഗ്രാം വിഭാഗത്തില് അരുന്ധതി ചൗധരി, 80 കിലോഗ്രാമില് പൂജ റാണി, പ്ലസ് 80 കിലോഗ്രാമില് നൂപുര് എന്നിവര് ലോക രണ്ടാം റാങ്ക് സ്വന്തമാക്കി. ഇന്ത്യയുടെ പ്രമുഖ താരങ്ങളായ നിഖാത് സരീന് (51 കിലോഗ്രാം), ലൗവ്ലിന ബോര്ഗോഹെയ്ന് (75 കിലോഗ്രാം) എന്നിവര് ലോകത്തെ മുന്നിര താരങ്ങള്ക്കിടയിലുള്ള തങ്ങളുടെ സ്ഥാനം നിലനിര്ത്തിയിട്ടുണ്ട്.
പുരുഷ വിഭാഗത്തില്, അന്താരാഷ്ട്ര തലത്തില് തുടര്ച്ചയായി മികച്ച പ്രകടനം പുറത്തെടുത്ത സച്ചിന് സിവാച്ചും നരേന്ദര് ബെര്വാളും ആദ്യ അഞ്ച് സ്ഥാനങ്ങളില് ഇടംപിടിച്ചു. 70 കിലോഗ്രാം വിഭാഗത്തില് ഹിതേഷ് ഗുലിയ ആറാം റാങ്കും, 65 കിലോഗ്രാമില് അവിനാഷ് ജംവാള് എട്ടാം റാങ്കും നിലനിര്ത്തി. ഇവര്ക്ക് പുറമെ 75 കിലോഗ്രാം വിഭാഗത്തില് ആകാശും, 85 കിലോഗ്രാം വിഭാഗത്തില് ലോകേഷും ആദ്യ പത്ത് റാങ്കുകാരുടെ പട്ടികയില് ഇടം നേടിയിട്ടുണ്ട്.
