കോട്ടയം: കോട്ടയം ജില്ലാ ജനറല്‍ ആശുപത്രിയിലെ ഔഷധ സസ്യങ്ങള്‍ക്കിടയില്‍ കഞ്ചാവ് ചെടി വളര്‍ന്ന നിലയില്‍ കണ്ടെത്തി. ആശുപത്രിയിലെ നേത്രപരിശോധനാ വിഭാഗത്തിന് സമീപമുള്ള തോട്ടത്തിലാണ് രണ്ടുമാസത്തോളം പഴക്കമുള്ളതും ആറ് സെന്റീമീറ്ററിലധികം ഉയരമുള്ളതുമായ ചെടി കണ്ടെത്തിയത്. വിവരമറിഞ്ഞ് സ്ഥലത്തെത്തിയ എക്‌സൈസ് സംഘം കഞ്ചാവ് ചെടി പിഴുതെടുത്ത് നശിപ്പിച്ചു.
വ്യാഴാഴ്ച ഉച്ചയോടെ ആശുപത്രിയിലെത്തിയ ഒരു യുവാവാണ് ഔഷധത്തോട്ടത്തില്‍ സംശയാസ്പദമായ രീതിയില്‍ ഒരു ചെടി ശ്രദ്ധിച്ചത്. തുടര്‍ന്ന് ഇയാള്‍ വിവരം ആശുപത്രി വികസന സമിതി അംഗവും ബി.ജെ.പി നേതാവുമായ അരുണ്‍ മൂലേടത്തിനെ അറിയിക്കുകയായിരുന്നു. അരുണ്‍ ഈ ചെടിയുടെ ചിത്രം പകര്‍ത്തി എക്‌സൈസ് ഉദ്യോഗസ്ഥനായ എം. പ്രവീണ്‍ ശിവാനന്ദന് അയച്ചുകൊടുത്തതോടെയാണ് ഇത് കഞ്ചാവ് ചെടി തന്നെയെന്ന് സ്ഥിരീകരിച്ചത്.
തുടര്‍ന്ന് കോട്ടയം എക്‌സൈസ് എന്‍ഫോഴ്‌സ്‌മെന്റ് സ്‌ക്വാഡ് സര്‍ക്കിള്‍ ഇന്‍സ്‌പെക്ടര്‍ ടോണി ജോസഫിന്റെ നേതൃത്വത്തിലുള്ള ഉദ്യോഗസ്ഥ സംഘം ആശുപത്രിയിലെത്തി തുടര്‍നടപടികള്‍ സ്വീകരിച്ചു. അസി. എക്‌സൈസ് ഇന്‍സ്‌പെക്ടര്‍മാരായ എന്‍. ഹരിഹരന്‍ പോറ്റി, ബി. ആനന്ദ് രാജ്, നൗഷാദ് എം., പ്രിവന്റീവ് ഓഫീസര്‍മാരായ മാനുവേല്‍, എം. പ്രവീണ്‍ ശിവാനന്ദ്, സിവില്‍ എക്‌സൈസ് ഓഫീസര്‍ ഡ്രൈവര്‍ ബിബിന്‍ ജോയി എന്നിവരടങ്ങുന്ന സംഘമാണ് പരിശോധന നടത്തിയത്.
ചെടി നശിപ്പിച്ചതിന് ശേഷം സമാനമായ രീതിയില്‍ മറ്റെവിടെയെങ്കിലും കഞ്ചാവ് വളരുന്നുണ്ടോ എന്നറിയാന്‍ എക്‌സൈസ് സംഘം പ്രദേശമാകെ വിശദമായ പരിശോധന നടത്തി. ആശുപത്രിയിലെത്തിയ രോഗികളുടെ കൂട്ടിരിപ്പുകാരില്‍ നിന്നോ അല്ലെങ്കില്‍ അവിടെ ജോലി ചെയ്യുന്ന നിര്‍മ്മാണ തൊഴിലാളികളില്‍ നിന്നോ അബദ്ധത്തില്‍ വീണ കഞ്ചാവ് വിത്ത് മുളച്ചുപൊന്തിയതാകാം എന്നാണ് പ്രാഥമിക നിഗമനം.
എങ്കിലും, ആരെങ്കിലും ഇത് മനപ്പൂര്‍വ്വം വെച്ചുപിടിപ്പിച്ചതാണോ എന്ന കാര്യവും എക്‌സൈസ് അന്വേഷിക്കുന്നുണ്ട്. ഇതിന്റെ ഭാഗമായി ആശുപത്രി പരിസരം കേന്ദ്രീകരിച്ച് നിരീക്ഷണവും അന്വേഷണവും ശക്തമാക്കുമെന്ന് എക്‌സൈസ് അധികൃതര്‍ വ്യക്തമാക്കി.
