വിശാഖപട്ടണം: ഇന്ത്യന് വിക്കറ്റ് കീപ്പര് ബാറ്റര് കെ.എസ്. ഭരത് അന്താരാഷ്ട്ര ക്രിക്കറ്റില് നിന്ന് വിരമിക്കല് പ്രഖ്യാപിച്ചു. 32-കാരനായ ഭരത് 2023-ല് ഓസ്ട്രേലിയയ്ക്കെതിരെ നാഗ്പൂരിലാണ് ഇന്ത്യക്കായി അരങ്ങേറ്റം കുറിച്ചത്. കാറപകടത്തെ തുടര്ന്ന് പ്രമുഖ താരം ഋഷഭ് പന്ത് ടീമിന് പുറത്തായ സാഹചര്യത്തിലാണ് ഭരതിന് പകരക്കാരനായി ടീമിലേക്ക് വിളിവന്നത്.
വിശാഖപട്ടണം സ്വദേശിയായ ഭരത് ഇന്ത്യക്കായി ഏഴ് ടെസ്റ്റ് മത്സരങ്ങളില് കളിക്കുകയും 221 റണ്സ് സംഭാവന ചെയ്യുകയും ചെയ്തിട്ടുണ്ട്. എന്നാല്, ഋഷഭ് പന്തിന്റെ തിരിച്ചുവരവും ധ്രുവ് ജുറെല്, എന്. ജഗദീശന് തുടങ്ങിയ യുവ വിക്കറ്റ് കീപ്പര്മാരുടെ വരവും അന്താരാഷ്ട്ര തലത്തില് ഭരതിന്റെ അവസരങ്ങള് കുറച്ചു.
തുടര്ന്ന് ആന്ധ്രാപ്രദേശിനായി ആഭ്യന്തര ക്രിക്കറ്റില് അദ്ദേഹം കൂടുതല് ശ്രദ്ധ കേന്ദ്രീകരിച്ചു. ഫസ്റ്റ് ക്ലാസ് ക്രിക്കറ്റില് മികച്ച റെക്കോര്ഡുള്ള ഭരത്, 113 മത്സരങ്ങളില് നിന്നായി 11 സെഞ്ചുറികള് ഉള്പ്പെടെ 6,102 റണ്സ് നേടിയിട്ടുണ്ട്. പരിമിത ഓവര് ക്രിക്കറ്റിലും മികച്ച സാന്നിധ്യമായിരുന്ന അദ്ദേഹം 83 ലിസ്റ്റ് എ മത്സരങ്ങളിലും 91 ടി20 മത്സരങ്ങളിലും കളിച്ചിട്ടുണ്ട്.
2023 ലെ ലോക ടെസ്റ്റ് ചാമ്പ്യന്ഷിപ്പ് ഫൈനലില് ഓസ്ട്രേലിയയ്ക്കെതിരെ ഇന്ത്യന് ടീമിലിടം നേടിയതാണ് ഭരതിന്റെ കരിയറിലെ ഏറ്റവും വലിയ നേട്ടം. എന്നാല് ദി ഓവലില് നടന്ന ആ മത്സരത്തില് യഥാക്രമം 5, 23 റണ്സ് മാത്രമാണ് അദ്ദേഹത്തിന് നേടാനായത്. മത്സരത്തില് ഇന്ത്യ 209 റണ്സിന്റെ വന് പരാജയം ഏറ്റുവാങ്ങുകയും ചെയ്തു.
ക്രിക്കറ്റ് കളിക്കുന്നത് തുടരുമെന്ന് ഭരത് വ്യക്തമാക്കിയിട്ടുണ്ടെങ്കിലും തന്റെ അടുത്ത ദൗത്യങ്ങളെക്കുറിച്ചുള്ള വിശദാംശങ്ങള് വെളിപ്പെടുത്തിയിട്ടില്ല. വിരമിക്കല് പ്രഖ്യാപനത്തില് ആന്ധ്ര ക്രിക്കറ്റിന് അദ്ദേഹം പ്രത്യേകം നന്ദി പറഞ്ഞിട്ടുണ്ട്. അതിനാല്, ഇനി ലോകമെമ്പാടുമുള്ള വിവിധ ഫ്രാഞ്ചൈസി ലീഗുകളില് ഭരത് കളിക്കാനാണ് സാധ്യത.
‘എന്റെ കരിയറിലുടനീളം എന്നെ കാണുകയും ഉയര്ന്ന തലത്തില് മികച്ച പ്രകടനം പുറത്തെടുക്കാന് അനുകൂലമായ അന്തരീക്ഷം ഒരുക്കി തരികയും ചെയ്ത ബി.സി.സി.ഐക്കും എല്ലാ പരിശീലകര്ക്കും മാനേജര്മാര്ക്കും നന്ദി. എന്റെ കുട്ടിക്കാലം മുതല് എനിക്ക് പിന്തുണയും പ്രോത്സാഹനവും നല്കിയ ആന്ധ്ര ക്രിക്കറ്റ് അസോസിയേഷനോടും ഡി.ഡി.സി.എയോടും എല്ലാ ഭാരവാഹികളോടും ഞാന് കടപ്പെട്ടിരിക്കുന്നു,’ ഭരത് പ്രസ്താവനയില് പറഞ്ഞു.
2021, 2022 സീസണുകളിലായി ഐ.പി.എല്ലില് 10 മത്സരങ്ങള് ഭരത് കളിച്ചിട്ടുണ്ട്. റോയല് ചലഞ്ചേഴ്സ് ബംഗളൂരു, ഡല്ഹി ക്യാപിറ്റല്സ് എന്നീ ടീമുകളെയാണ് അദ്ദേഹം പ്രതിനിധീകരിച്ചത്. പണക്കൊഴുപ്പുള്ള ഐ.പി.എല് ലീഗില് തനിക്ക് അവസരം നല്കിയതിന് വിരാട് കോലിക്കും, ടെസ്റ്റ് ക്രിക്കറ്റില് തന്നെ വിശ്വസിച്ചതിന് രോഹിത് ശര്മ്മയ്ക്കും രാഹുല് ദ്രാവിഡിനും ഭരത് നന്ദി രേഖപ്പെടുത്തി.
‘ഐ.പി.എല് അരങ്ങേറ്റത്തില് എന്റെ ക്യാപ്റ്റനായിരുന്ന വിരാട് കോലിക്ക് വലിയ നന്ദി. എന്റെ കഴിവ് തെളിയിക്കാനും ശ്രദ്ധിക്കപ്പെടാനും അദ്ദേഹം എനിക്ക് അവസരം നല്കി. എന്റെ ടെസ്റ്റ് അരങ്ങേറ്റത്തിന് അവസരമൊരുക്കിയ ഇന്ത്യന് ക്യാപ്റ്റന് രോഹിത് ശര്മ്മയ്ക്ക് വലിയ നന്ദി, വാക്കുകള്ക്ക് അപ്പുറമാണ് ആ അനുഭവം. ഇന്ത്യ എ ടീം മുതല് ഇന്ത്യന് ടീം വരെയുള്ള എന്റെ യാത്രയില് വഴികാട്ടിയായ കോച്ച് രാഹുല് ദ്രാവിഡ് സാറിനെ മറക്കാനാവില്ല. നിങ്ങളുടെയെല്ലാം പിന്തുണ കൊണ്ടാണ് എനിക്ക് ഇന്ത്യയുടെ ടെസ്റ്റ് ക്രിക്കറ്ററാകാന് കഴിഞ്ഞത്,’ ഭരത് കുറിച്ചു.
