ന്യൂഡൽഹി : പിണറായി വിജയന്റെ മകൾ വീണ വിജയൻ ഉൾപ്പെട്ട സി എം ആര്‍ എല്‍-എക്‌സാലോജിക് മാസപ്പടി കേസില്‍ സുപ്രീംകോടതിയില്‍ തടസ ഹര്‍ജി. ഹൈക്കോടതിയില്‍ സിബിഐ അന്വേഷണം ആവശ്യപ്പെട്ട് ഹര്‍ജി നല്‍കിയ എം.ആര്‍ അജയനാണ് തടസ ഹര്‍ജി നല്‍കിയത്. ഇ ഡി അന്വേഷണത്തിന് അനുമതി നല്‍കിയ ഹൈക്കോടതി ഉത്തരവിനെതിരെ സിഎംആര്‍ എല്‍ അപ്പീല്‍ നല്‍കുമെന്നത് കണക്കിലെടുത്താണ് നീക്കം. അഭിഭാഷക അശ്വതി എം കെ മുഖേനയാണ് ഹര്‍ജി സമര്‍പ്പിച്ചത്.
ഇഡി അന്വേഷണത്തിനെതിരെ സിഎംആര്‍എല്‍ അപ്പീല്‍ നല്‍കിയാല്‍ തന്റെ വാദവും കേള്‍ക്കണമെന്നാണ് ആവശ്യം.മാസപ്പടി കേസില്‍ ഇഡി അന്വേഷണം തുടരാന്‍ ഹൈക്കോടതി ഉത്തരവിട്ടിരുന്നു.
എക്‌സാലോജിക് കമ്പനി കരിമണല്‍ കമ്പനിയ്‌ക്കായി പ്രത്യേക സേവനങ്ങളൊന്നും ചെയ്യാതെ രണ്ട് കോടി എഴുപത്തി എട്ട് ലക്ഷത്തിആയിരം രൂപ വീണയ്‌ക്കും കമ്പനിയ്‌ക്കുമായി ഐടി സേവനങ്ങള്‍ക്ക് എന്ന പേരില്‍ നല്‍കിയിട്ടുണ്ട്. 2016 മുതല്‍ 2021 വരെയുള്ള കാലയളവിലായിരുന്നു ഇത്.
