റിയോ ഡി ജനീറിയോ: സാഹസിക വിനോദങ്ങള്‍ എപ്പോഴും ആവേശമുണര്‍ത്തുന്നവയാണ്, എന്നാല്‍ സുരക്ഷാ മാനദണ്ഡങ്ങളില്‍ വരുത്തുന്ന ചെറിയൊരു വീഴ്ച പോലും എത്രത്തോളം ഭയങ്കരമായ ദുരന്തത്തിന് കാരണമാകുമെന്ന് തെളിയിക്കുന്ന ഒരു ദാരുണ സംഭവമാണ് ബ്രസീലില്‍ റിപ്പോര്‍ട്ട് ചെയ്തിരിക്കുന്നത്. ബ്രസീലിലെ സാവോ പോളോ സംസ്ഥാനത്തെ ലിമേര നഗരത്തിലാണ് 21 വയസ്സുകാരിയായ മരിയ എഡ്വേര്‍ഡ റോഡ്രിഗസ് ഡി ഫ്രീറ്റാസ് എന്ന യുവതിക്ക് സാഹസിക വിനോദത്തിനിടെ ജീവന്‍ നഷ്ടമായത്. റോപ്പ് ജമ്പിങ് നടത്തുന്നതിനിടെ സുരക്ഷാ കയര്‍ ശരീരവുമായി ബന്ധിപ്പിക്കുന്നതില്‍ വരുത്തിയ ഗുരുതരമായ വീഴ്ചയാണ് ദുരന്തത്തില്‍ കലാശിച്ചത്.
അപകട സ്ഥലത്ത് നിന്നുള്ള ദൃശ്യങ്ങളില്‍, അവിടെയുണ്ടായിരുന്ന ജീവനക്കാര്‍ യുവതിയെ പാലത്തിന്റെ അരികിലേക്ക് നയിക്കുന്നതും തുടര്‍ന്ന് താഴേക്ക് വിടുന്നതും കാണാം. എന്നാല്‍ യുവതിയുടെ ജീവന്‍ നിലനിര്‍ത്തേണ്ട സുപ്രധാനമായ സുരക്ഷാ ലൈന്‍ ശരീരത്തില്‍ ഘടിപ്പിച്ചിട്ടില്ലെന്ന കാര്യം അവിടെയുണ്ടായിരുന്ന ജീവനക്കാര്‍ ആരും തന്നെ ശ്രദ്ധിച്ചില്ല. ബ്രസീലിയന്‍ മാധ്യമങ്ങള്‍ റിപ്പോര്‍ട്ട് ചെയ്യുന്നതനുസരിച്ച്, ബഞ്ചി ജമ്പിംഗിന് സമാനമായ ‘റോപ്പ് ജമ്പിങ്’ എന്ന സാഹസിക വിനോദത്തിലാണ് മരിയ ഏര്‍പ്പെട്ടിരുന്നത്.
വലിയ ഉയരത്തില്‍ നിന്ന് സുരക്ഷാ ഉപകരണങ്ങളുടെ സഹായത്തോടെ താഴേക്ക് ചാടുന്ന വിനോദമാണിത്. എന്നാല്‍ സുരക്ഷാ ഉപകരണങ്ങളുമായി ശരിയായി ഘടിപ്പിക്കാതെയാണ് മരിയയെ ഏതാണ്ട് 130 അടി ഉയരത്തില്‍ നിന്ന് താഴേക്ക് വിട്ടത്. ഫിസിക്കല്‍ എഡ്യൂക്കേഷനിലും സ്‌പോര്‍ട്‌സ് മാനേജ്മെന്റിലും പരിശീലനം നേടിയിരുന്ന മരിയ, ജാന്‍ഡിറയിലാണ് താമസിച്ചിരുന്നത്. യാത്രകളെയും ഔട്ട്ഡോര്‍ ആക്റ്റിവിറ്റികളെയും കുറിച്ചുള്ള വിവരങ്ങള്‍ സോഷ്യല്‍ മീഡിയയില്‍ നിരന്തരം പങ്കുവെക്കാറുള്ള മരിയ, അപകടത്തിന് തൊട്ടുമുമ്പും തന്റെ ഈ പുതിയ അനുഭവത്തെക്കുറിച്ച് സോഷ്യല്‍ മീഡിയയില്‍ പോസ്റ്റ് ചെയ്തിരുന്നു.
ചാട്ടത്തിന് പിന്നാലെ ഉണ്ടായ ദാരുണമായ വീഴ്ചയ്‌ക്ക് തൊട്ട് പിന്നാലെ രക്ഷാപ്രവര്‍ത്തകരെ വിവരമറിയിച്ചെങ്കിലും യുവതിയുടെ ജീവന്‍ രക്ഷിക്കാനായില്ല. സംഭവത്തിന് പിന്നാലെ ബ്രസീലിയന്‍ അധികൃതര്‍ ഔദ്യോഗിക അന്വേഷണം ആരംഭിച്ചു. അപകട ദിവസം കൃത്യമായ സുരക്ഷാ മാനദണ്ഡങ്ങള്‍ പാലിച്ചിട്ടുണ്ടോ എന്നും ഉദ്യോഗസ്ഥരുടെ ഭാഗത്തുനിന്ന് വീഴ്ചയുണ്ടായോ എന്നും കണ്ടെത്താനാണ് അന്വേഷണം. അപകടസ്ഥലത്ത് വെച്ച് തന്നെ സംഘാടകരായ ആറ് പേരെ സിവില്‍ പോലീസ് അറസ്റ്റ് ചെയ്തു.
സംഭവത്തില്‍ ക്രിമിനല്‍ കുറ്റം ചുമത്താന്‍ സാധിക്കുമോ എന്ന് കണ്ടെത്താന്‍ പോലീസ് വിശദമായ അന്വേഷണം ആരംഭിച്ചു. ഈ ദാരുണ സംഭവം സാഹസിക വിനോദ കേന്ദ്രങ്ങളിലെ സുരക്ഷാ സംവിധാനങ്ങളെക്കുറിച്ച് വലിയ ചോദ്യമുയര്‍ത്തുന്നുണ്ട്. ബഞ്ചി ജമ്പിംഗ്, ബ്രിഡ്ജ് സ്വിംഗിംഗ്, സിപ്പ് ലൈനിംഗ്, സ്‌കൈഡൈവിംഗ് തുടങ്ങിയ സാഹസിക വിനോദങ്ങള്‍ പൂര്‍ണ്ണമായും അതിശക്തമായ സുരക്ഷാ പ്രോട്ടോക്കോളുകളെയും ഉപകരണങ്ങളുടെ കൃത്യമായ പരിശോധനകളെയും ആശ്രയിച്ചാണ് നിലനില്‍ക്കുന്നത്. ഇതില്‍ ഉണ്ടാകുന്ന ചെറിയൊരു അശ്രദ്ധ പോലും വലിയ ദുരന്തങ്ങള്‍ക്ക് കാരണമാകുമെന്ന് ഈ മേഖലയിലെ വിദഗ്ധര്‍ ചൂണ്ടിക്കാണിക്കുന്നു.
