ന്യൂഡല്‍ഹി: ഔദ്യോഗിക ജീവിതത്തില്‍ നിന്നും വിരമിച്ച ശേഷം ഭാര്യയുമൊത്ത് ലോകം ചുറ്റി സഞ്ചരിക്കാനായി മാറ്റിവെച്ച സമ്പാദ്യത്തില്‍ നിന്നും 25 ലക്ഷം രൂപ രാജ്യത്തിന്റെ അതിര്‍ത്തി കാക്കുന്ന ജവാന്മാര്‍ക്കായി കൈമാറി നാഗ്പൂര്‍ സ്വദേശിയായ ശ്രീകാന്ത് സഹസ്രബുദ്ധെ. തനിച്ചായ ജീവിതത്തിലെ വലിയൊരു സ്വപ്നം രാജ്യനന്മയ്‌ക്കായി സമര്‍പ്പിച്ച ഇദ്ദേഹത്തിന് സമൂഹമാധ്യമങ്ങളില്‍ ഒന്നടങ്കം വന്‍ കയ്യടിയാണ് ലഭിച്ചുകൊണ്ടിരിക്കുന്നത്. ശ്രീകാന്ത് സഹസ്രബുദ്ധെയും അദ്ദേഹത്തിന്റെ പരേതയായ ഭാര്യയും പഞ്ചാബ് നാഷണല്‍ ബാങ്കിലെ വിരമിച്ച ഉദ്യോഗസ്ഥരാണ്.
തന്റെ ജീവിതത്തിലുണ്ടായ അപ്രതീക്ഷിത വിയോഗമാണ് ഇത്തരമൊരു മാതൃകാപരമായ തീരുമാനത്തിലേക്ക് അദ്ദേഹത്തെ നയിച്ചത്. തന്റെ തീരുമാനത്തെക്കുറിച്ച് സഹസ്രബുദ്ധെ പറയുന്നത് ഇങ്ങനെ,
‘ഞാനും എന്റെ ഭാര്യയും പഞ്ചാബ് നാഷണല്‍ ബാങ്കില്‍ നിന്നാണ് വിരമിച്ചത്. സര്‍വീസില്‍ നിന്നും ലഭിച്ച പി.എഫ് തുകയും മറ്റ് സമ്പാദ്യങ്ങളും ഉപയോഗിച്ച് ലോകം മുഴുവന്‍ യാത്ര ചെയ്യണമെന്നതായിരുന്നു ഞങ്ങളുടെ വലിയ ആഗ്രഹം. എന്നാല്‍ നിര്‍ഭാഗ്യവശാല്‍ 10 വര്‍ഷങ്ങള്‍ക്ക് മുന്‍പ് എന്റെ ഭാര്യ എന്നെ തനിച്ചാക്കി പോയി. അതോടെ ആ സ്വപ്നം പൂര്‍ത്തിയാകാതെ അവശേഷിച്ചു.’
ഭാര്യയുടെ മരണശേഷം ഒറ്റയ്‌ക്കൊരു യാത്രയ്‌ക്ക് മനസ്സ് അനുവദിക്കാതിരുന്ന സാഹചര്യത്തിലാണ് അകോല സ്വദേശിയായ ഒരാള്‍ തന്റെ സമ്പാദ്യത്തില്‍ നിന്നും ഒരു കോടി രൂപ ജീവകാരുണ്യ പ്രവര്‍ത്തനങ്ങള്‍ക്കായി നീക്കിവെച്ച വാര്‍ത്ത സഹസ്രബുദ്ധെ അറിയുന്നത്. ഇതാണ് അദ്ദേഹത്തിന്റെ ചിന്തകളെ മാറ്റിമറിച്ചത്. ഒരു കോടി രൂപ നല്‍കാനില്ലെങ്കിലും തന്റെ കയ്യിലുള്ള തുകയില്‍ നിന്നും ഒരു പങ്ക് ജീവകാരുണ്യത്തിനായി നല്‍കാന്‍ അദ്ദേഹം തീരുമാനിച്ചു.
പി.എഫ് ഇനത്തിലും അല്ലാതെയും ഏതാണ്ട് 50 ലക്ഷത്തോളം രൂപ അദ്ദേഹത്തിന്റെ പക്കല്‍ സമ്പാദ്യമായുണ്ടായിരുന്നു. ഇതില്‍ നിന്നുമാണ് സ്വപ്‌നയാത്രയ്‌ക്കായി മാറ്റിവെച്ച തുകയുടെ പകുതിയായ 25 ലക്ഷം രൂപ ഇന്ത്യന്‍ സൈന്യത്തിന് സംഭാവനയായി നല്‍കുവാന്‍ അദ്ദേഹം തീരുമാനിച്ചത്.
‘എന്റെ ഭാര്യയോടൊപ്പം ലോകം ചുറ്റി സഞ്ചരിച്ചിരുന്നെങ്കില്‍ എനിക്ക് എത്രത്തോളം സന്തോഷം ലഭിക്കുമായിരുന്നോ, അത്രയും വലിയ സന്തോഷവും സംതൃപ്തിയും ഈ പ്രവര്‍ത്തിയിലൂടെ ഇപ്പോള്‍ എനിക്ക് ലഭിക്കുന്നുണ്ട്,’ സഹസ്രബുദ്ധെ കൂട്ടിച്ചേര്‍ത്തു. എന്തായാലും ഈ മുതിര്‍ന്ന പൗരന്റെ രാജ്യസ്‌നേഹത്തിനും കാരുണ്യത്തിനും മുന്നില്‍ പ്രണാമം അര്‍പ്പിക്കുകയാണ് സോഷ്യല്‍ മീഡിയ.
