ന്യൂഡല്‍ഹി: ഭാരതത്തിന്റെ ദേശീയ മൂല്യങ്ങള്‍ക്കും പരമാധികാര സ്വത്വത്തിനും പ്രാധാന്യം നല്‍കിക്കൊണ്ട് ഇന്ത്യന്‍ സൈന്യത്തിന്റെ വസ്ത്രധാരണ രീതികളില്‍ കേന്ദ്ര സര്‍ക്കാര്‍ സുപ്രധാന മാറ്റങ്ങള്‍ വരുത്താന്‍ തീരുമാനം. സൈന്യത്തെ കൂടുതല്‍ ആധുനികവല്‍ക്കരിക്കുന്നതിന്റെ ഭാഗമായാണ് ഈ പരിഷ്‌കാരം. രാജ്യത്തിന്റെ വികാരങ്ങളെയും വളര്‍ന്നുവരുന്ന സ്വാശ്രയത്വത്തെയും പ്രതിഫലിപ്പിക്കുന്നതാണ് പുതിയ സൈനിക വസ്ത്രങ്ങളെന്ന് പ്രതിരോധ മന്ത്രാലയം പുറത്തിറക്കിയ ലഘുലേഖയില്‍ വ്യക്തമാക്കുന്നു.
കേവലം ഭംഗി കൂട്ടുക എന്നതിനപ്പുറം, സൈനികരുടെ പ്രവര്‍ത്തനക്ഷമത വര്‍ദ്ധിപ്പിക്കാനും വിവിധ കാലാവസ്ഥകള്‍ക്ക് ഇണങ്ങുന്ന രീതിയിലുമാണ് ഈ മാറ്റങ്ങള്‍ രൂപകല്‍പ്പന ചെയ്തിരിക്കുന്നത്. നിലവില്‍ യുദ്ധമുഖത്ത് ധരിക്കുന്ന കോംബാറ്റ് യൂണിഫോം, ഔദ്യോഗിക ചടങ്ങുകള്‍ക്കുള്ള സെറിമോണിയല്‍ യൂണിഫോം, ദൈനംദിന ഡ്യൂട്ടികള്‍ക്കുള്ള സര്‍വീസ് യൂണിഫോം എന്നിങ്ങനെ വിവിധ വിഭാഗങ്ങള്‍ സൈന്യത്തിനുണ്ട്. ഇവയുടെ പ്രാധാന്യം നിലനിര്‍ത്തിക്കൊണ്ടുതന്നെയാണ് പുതിയ പരിഷ്‌കാരങ്ങള്‍ നടപ്പിലാക്കിയിരിക്കുന്നത്.
രാജ്യത്തിന്റെ അതിര്‍ത്തികളിലെ കഠിനമായ തണുപ്പിനെ പ്രതിരോധിക്കാന്‍ സൈനികരെ സജ്ജരാക്കുക എന്ന ലക്ഷ്യത്തോടെയാണ് വിന്റര്‍ യൂണിഫോമുകളില്‍ വലിയ മാറ്റങ്ങള്‍ വരുത്തിയത്. ഇതിന്റെ ഭാഗമായി ‘3എ’ എന്ന പേരില്‍ പുതിയ ശൈത്യകാല യൂണിഫോം അവതരിപ്പിച്ചു. ഇതിനൊപ്പം നല്‍കിയിരിക്കുന്ന പുതിയ വിന്റര്‍ ജാക്കറ്റുകള്‍ നിലവില്‍ വ്യോമസേനയും നാവികസേനയും ഉപയോഗിക്കുന്നവയ്‌ക്ക് സമാനമാണ്. ഇത് കരസേന കൂടി സ്വീകരിച്ചതോടെ മൂന്ന് സായുധ സേനാവിഭാഗങ്ങളും തമ്മില്‍ വസ്ത്രധാരണത്തില്‍ ഒരു ഏകീകരണം സാധ്യമായിരിക്കുകയാണ്.
യുദ്ധപരിശീലനങ്ങളിലും അതിര്‍ത്തിയിലെ കഠിനമായ ഡ്യൂട്ടികളിലും സൈനികര്‍ക്ക് കൂടുതല്‍ ചലനസ്വാതന്ത്ര്യവും സൗകര്യവും നല്‍കുന്നതിനായി കോംബാറ്റ് യൂണിഫോമുകളിലും വിപ്ലവകരമായ മാറ്റങ്ങള്‍ വരുത്തിയിട്ടുണ്ട്. ദൈനംദിന ആവശ്യങ്ങള്‍ക്കും പരിശീലനങ്ങള്‍ക്കും കൂടുതല്‍ എളുപ്പമുള്ളതാക്കാന്‍ പ്രത്യേക ടി-ഷര്‍ട്ട് ഉള്‍പ്പെടുത്തിയുള്ള ‘7എ’ യൂണിഫോം നിലവില്‍ വന്നു. അതിശൈത്യമുള്ള ഉയര്‍ന്ന പര്‍വത മേഖലകളിലും അതിര്‍ത്തി പ്രദേശങ്ങളിലും കാവല്‍ നില്‍ക്കുന്ന ജവാന്മാര്‍ക്ക് ഏറെ ആശ്വാസം പകരുന്ന പുതിയ ശൈത്യകാല കോംബാറ്റ് ജാക്കറ്റും ഇതിന്റെ ഭാഗമായി അവതരിപ്പിച്ചു.
സൈനിക പാരമ്പര്യത്തിന്റെയും പ്രൗഢിയുടെയും പ്രതീകമായ ഔദ്യോഗിക ചടങ്ങുകള്‍ക്കും പരേഡുകള്‍ക്കുമായി ‘1ഇ’ എന്ന പേരില്‍ പുതിയ ശൈത്യകാല സെറിമോണിയല്‍ യൂണിഫോം ഓഫീസര്‍മാര്‍ക്കായി ഏര്‍പ്പെടുത്തിയിട്ടുണ്ട്. പാരമ്പര്യവും ആധുനികതയും ഒരേപോലെ സമ്മേളിക്കുന്ന ഈ പരിഷ്‌കാരങ്ങള്‍ സൈനികരുടെ പ്രൊഫഷണല്‍ പ്രതിച്ഛായ വര്‍ദ്ധിപ്പിക്കുന്നതിനൊപ്പം അവരുടെ യുദ്ധസജ്ജതയും അച്ചടക്കവും കൂടുതല്‍ ശക്തമാക്കാന്‍ സഹായിക്കുമെന്നാണ് വിലയിരുത്തപ്പെടുന്നത്. ഭാവിയിലെ ഏത് വെല്ലുവിളികളെയും നേരിടാന്‍ ഇന്ത്യന്‍ സൈന്യം സജ്ജമാണെന്ന പ്രഖ്യാപനം കൂടിയാണ് ഈ വസ്ത്രധാരണ പരിഷ്‌കാരം.
