കൊച്ചി: തന്ത്രശാസ്ത്ര രംഗത്ത് പുരോഗമനാത്മകമായ വിപ്ലവം സൃഷ്ടിച്ച ബ്രഹ്മശ്രീ അനിരുദ്ധൻ തന്ത്രികൾ അന്തരിച്ചു . കേരളത്തിലെ പ്രമുഖ വൈദിക പണ്ഡിതനും ശ്രീ ഗുരുദേവ വൈദിക തന്ത്ര വിദ്യാപീഠത്തിന്റെ ആചാര്യനുമാണ് ബ്രഹ്മശ്രീ അനിരുദ്ധൻ തന്ത്രികൾ.
ജാതിഭേദമന്യേ എല്ലാവർക്കും പൂജാദി കർമ്മങ്ങൾ ചെയ്യാനും വേദ-തന്ത്രാദികൾ അഭ്യസിക്കാനും പരിശീലനം നൽകുന്നതിൽ അദ്ദേഹം വലിയ പങ്കുവഹിച്ചിട്ടുണ്ട്.ഈഴവ സമുദായത്തിൽ ജനിച്ച അദ്ദേഹം, ശ്രീനാരായണഗുരുവിന്റെ ആശയങ്ങൾ പിന്തുടർന്ന് ക്ഷേത്ര പൂജാവിധികളും തന്ത്രശാസ്ത്രവും പഠിപ്പിക്കുന്നതിൽ പ്രശസ്തനാണ്.
കേരളത്തിലെ നിരവധി അബ്രാഹ്മണ ശാന്തിമാർക്കും, പുരോഹിതർക്കും തന്ത്രവിദ്യയിൽ ശാസ്ത്രീയമായ പരിശീലനം നൽകുന്നത് അദ്ദേഹത്തിന്റെ നേതൃത്വത്തിലാണ്. കേരളത്തിൽ ആദ്യമായി ദളിത് വിഭാഗത്തിൽപ്പെട്ടവർ പ്രധാന ശാന്തിമാരായി ചുമതലയേറ്റപ്പോൾ, അവർക്ക് പരിശീലനവും മാർഗ്ഗനിർദ്ദേശവും നൽകിയ തന്ത്രിമാരിൽ പ്രധാനിയായിരുന്നു അദ്ദേഹം. കർമ്മം കൊണ്ട് ബ്രാഹമണ്യം നേടാം എന്ന പാലിയം വിളംബരത്തിന്റെ അന്തസത്തയെ പ്രവൃത്തിയിലൂടെ സാക്ഷാത്കരിച്ച തന്ത്രിയാണ് അനിരുദ്ധൻ തന്ത്രികൾ
