ന്യൂഡല്ഹി: കണ്ണൂരില് നിന്നും സൗദി അറേബ്യയിലെ ജിദ്ദയിലേക്ക് പുറപ്പെട്ട എയര് ഇന്ത്യ എക്സ്പ്രസ് വിമാനം യാത്രാമധ്യേ സാങ്കേതിക തകരാര് കണ്ടെത്തിയതിനെ തുടര്ന്ന് പുറപ്പെട്ട വിമാനത്താവളത്തില് തന്നെ തിരിച്ചിറക്കി. ചൊവ്വാഴ്ച രാവിലെയായിരുന്നു സംഭവം. നൂറ്റിയെണ്പതിലധികം യാത്രക്കാരുമായി രാവിലെ 7:40 ഓടെ കണ്ണൂര് അന്താരാഷ്ട്ര വിമാനത്താവളത്തില് നിന്ന് പറന്നുയര്ന്ന വിമാനത്തിലാണ് തകരാര് ശ്രദ്ധയില്പ്പെട്ടത്.
വിമാനം പുറപ്പെട്ട് ഏകദേശം രണ്ട് മണിക്കൂര് കഴിഞ്ഞപ്പോഴാണ് പൈലറ്റുമാര് സാങ്കേതിക പ്രശ്നം തിരിച്ചറിഞ്ഞതെന്ന് വിമാനത്താവള വൃത്തങ്ങള് അറിയിച്ചു. തുടര്ന്ന്, അന്താരാഷ്ട്ര യാത്രയുമായി മുന്നോട്ട് പോകുന്നതിന് പകരം സ്റ്റാന്ഡേര്ഡ് സുരക്ഷാ മാനദണ്ഡങ്ങള് പാലിച്ചുകൊണ്ട് വിമാനം കണ്ണൂരിലേക്ക് തന്നെ തിരിച്ചുവിടാന് പൈലറ്റുമാര് തീരുമാനിക്കുകയായിരുന്നു. വിമാനം സുരക്ഷിതമായി റണ്വേയിലിറക്കിയതായും യാത്രക്കാരെല്ലാം സുരക്ഷിതരാണെന്നും അധികൃതര് വ്യക്തമാക്കി.
അടുത്തിടെ ചെന്നൈ വിമാനത്താവളത്തിലും മറ്റൊരു എയര് ഇന്ത്യ എക്സ്പ്രസ് വിമാനം സമാനമായ രീതിയില് സാങ്കേതിക തകരാറുകളെ തുടര്ന്ന് യാത്രക്കാരെ ബുദ്ധിമുട്ടിച്ച പ്രതിസന്ധിയിലായിരുന്നു. രാത്രി 7:40-ന് പുറപ്പെടേണ്ടിയിരുന്ന ചെന്നൈ-കൊല്ക്കത്ത വിമാനം വൈകിയാണ് യാത്രക്കാരുമായി പുറപ്പെട്ടത്. എന്നാല് റണ്വേയിലൂടെ കുതിച്ചുയരാന് തുടങ്ങുന്നതിനിടെ യാന്ത്രിക തകരാര് ശ്രദ്ധയില്പ്പെട്ട പൈലറ്റ് പെട്ടെന്ന് തന്നെ വിമാനം അടിയന്തരമായി നിര്ത്തിക്കുകയായിരുന്നു.
തുടര്ന്ന് വിമാനം പരിശോധനയ്ക്കായി മാറ്റുകയും പിന്നീട് പുറപ്പെടുമെന്ന് യാത്രക്കാരെ അറിയിക്കുകയും ചെയ്തു. മണിക്കൂറുകള്ക്ക് ശേഷം വീണ്ടും പറന്നുയരാന് ശ്രമിച്ചെങ്കിലും രണ്ടാമതും സാങ്കേതിക തകരാര് വില്ലനായെത്തി. ഇതോടെ വിമാനം വീണ്ടും റണ്വേയില് അടിയന്തരമായി നിര്ത്തേണ്ടി വന്നു. മണിക്കൂറുകളോളം വിമാനത്തിനുള്ളില് കാത്തിരിക്കേണ്ടി വന്ന യാത്രക്കാര് ഇതോടെ വിമാനത്താവളത്തില് പ്രതിഷേധമുയര്ത്തി.
ഒടുവില് യാത്രക്കാരെ പുറത്തിറക്കി ലോഞ്ചുകളിലേക്ക് മാറ്റിയെങ്കിലും പലരും യാത്ര റദ്ദാക്കുകയോ മറ്റ് ദിവസങ്ങളിലേക്ക് മാറ്റുകയോ ചെയ്തു. ദൂരദേശങ്ങളില് നിന്നുള്ള നിരവധി യാത്രക്കാരാണ് അന്ന് രാത്രി മുഴുവന് വിമാനത്താവളത്തില് കുടുങ്ങിയത്. രണ്ട് സംഭവങ്ങളിലും യാത്രക്കാര്ക്ക് പരിക്കുകളൊന്നും സംഭവിച്ചിട്ടില്ലെങ്കിലും, എയര് ഇന്ത്യ എക്സ്പ്രസ് വിമാനങ്ങളില് തുടര്ച്ചയായി ഉണ്ടാകുന്ന സാങ്കേതിക തകരാറുകള് വിമാനങ്ങളുടെ അറ്റകുറ്റപ്പണികളെയും പ്രവര്ത്തന വിശ്വാസ്യതയെയും കുറിച്ചുള്ള ആശങ്കകള് വീണ്ടും ചര്ച്ചകളിലേക്ക് എത്തിച്ചിരിക്കുകയാണ്.
