ന്യൂഡൽഹി: ഭാരതത്തിൽ ടെലഗ്രാം ആപ്പിന് താൽക്കാലിക നിയന്ത്രണം ഏർപ്പെടുത്തി കേന്ദ്ര സർക്കാർ. നീറ്റ് യുജി പുനഃപരീക്ഷയുടെ പശ്ചാത്തലത്തിൽ നാഷണൽ ടെസ്റ്റിംഗ് ഏജൻസിയുടെ ശുപാർശപ്രകാരമാണ് താൽക്കാലിക നിരോധനം ഏർപ്പെടുത്തിയത്.
വിവരസാങ്കേതികവിദ്യ നിയമത്തിലെ സെക്ഷൻ 69 എ പ്രകാരമാണ് കേന്ദ്ര ഐടി മന്ത്രാലയം ഉത്തരവിറക്കിയത്. പരീക്ഷാ ദിവസവും അതിനുശേഷമുള്ള നിശ്ചിത ദിവസങ്ങളും ഉൾപ്പെടെ ജൂൺ 22 വരെയാണ് നിയന്ത്രണം. പരീക്ഷയ്‌ക്ക് ശേഷം വ്യാജ ചോദ്യപേപ്പർ ചോർച്ചാ തെളിവുകൾ നിർമ്മിക്കുന്നത് തടയാൻ ജൂൺ 30 വരെ മെസ്സേജ് എഡിറ്റിംഗ് ഫീച്ചറും റദ്ദാക്കി.
നാഷണൽ ടെസ്റ്റിംഗ് ഏജൻസിയുടെയും വിദ്യാഭ്യാസ മന്ത്രാലയത്തിന്റെയും അഭ്യർത്ഥന കൂടി മാനിച്ചാണ് നിർദ്ദേശം പുറപ്പെടുവിച്ചത്. ജൂൺ 21 ന് നടക്കാനിരിക്കുന്ന നീറ്റ് (യുജി) -2026 പരീക്ഷയുമായി ബന്ധപ്പെട്ട സംശയാസ്പദമായ ഉള്ളടക്കം റിപ്പോർട്ട് ചെയ്യുന്നതിന് വിദ്യാർത്ഥികൾക്കും രക്ഷിതാക്കൾക്കും കോച്ചിംഗ് ഇൻസ്റ്റിറ്റ്യൂട്ടുകൾക്കും പൊതുജനങ്ങൾക്കുമായി എൻടിഎ പ്രത്യേക പോർട്ടൽ ആരംഭിച്ചിരുന്നു.
നീറ്റ് പുനഃപരീക്ഷയ്‌ക്ക് കർശന സുരക്ഷയാണ് ഏർപ്പെടുത്തിയിരിക്കുന്നത്.ചോദ്യപേപ്പർ സുരക്ഷിതമായി എത്തിക്കാൻ വ്യോമസേനയുടെ ഹെലികോപ്റ്ററുകളാണ് ഉപയോഗിക്കുന്നത്. ചോദ്യപേപ്പർ തയാറാക്കുന്നവരും പരിഭാഷകരും ജൂൺ 21 വരെ പൂർണ്ണമായും ലോക്ക്ഡൗണിലാണ്. കൂടാതെ പരീക്ഷയുടെ സുഗമമായ നടത്തിപ്പിനായി പരീക്ഷാ കേന്ദ്രങ്ങളുടെ ചുമതല വഹിക്കുന്നവർക്ക് എൻടിഎ പ്രത്യേക പരിശീലനവും നൽകുന്നുണ്ട്.
