തൃശൂർ: മാപ്രാണം വാതിൽമാടത്ത് അറ്റക്കുറ്റപണിക്കിടെ ഷോക്കേറ്റ് കെ എസ് ഇ ബി ലൈൻമാൻ മരിച്ചു. കരുവന്നൂർ മേജർ സെക്ഷനിലെ ലൈൻമാൻ മനോജ് (48) ആണ് മരിച്ചത്. ആറാട്ടുപുഴ കൊക്കരിപ്പളം സ്വദേശിയാണ്.
11 കെവി ലൈനിന്റെ അറ്റകുറ്റപണികൾ നടത്തുന്നതിനിടെ ചൊവ്വാഴ്ച്ച രാവിലെയാണ് അപകടം നടന്നത്. ഗുരുതരമായി പരിക്കേറ്റ മനോജ് പോസ്റ്റില് നിന്ന് ഷോക്കേറ്റ് താഴേക്ക് വീഴുകയായിരുന്നു. സഹപ്രവര്ത്തകരും നാട്ടുകാരും ചേര്ന്ന് ഉടന് തന്നെ സമീപത്തെ ആശുപത്രിയിലെത്തിലും അവിടെ നിന്ന് തൃശൂരിലെ സ്വകാര്യ ആശുപത്രിയിലേക്കും കൊണ്ടുപോയിരുന്നുവെങ്കിലും ജീവന് രക്ഷിക്കാനായില്ല.
നാല് വര്ഷമായി കരുവന്നൂര് കെഎസ്ഇബിയില് ലൈന്മാനായി ജോലി ചെയ്യുകയായിരുന്നു. മൃതദേഹം തൃശൂര് എലൈറ്റ് ആശുപത്രിയില് സൂക്ഷിച്ചിരിക്കുകയാൻ്. പോലീസും വൈദ്യുതി വകുപ്പ് ഉദ്യോഗസ്ഥരും തുടര് നടപടികള് സ്വീകരിച്ചു വരുന്നു. ഭാര്യ: രതി. മക്കള്: പൂജ (പ്ലസ് വണ് വിദ്യാര്ഥിനി), അര്ജുന് (നാലാം ക്ലാസ് വിദ്യാര്ഥി)
