വടകര: കോഴിക്കോട് നാദാപുരം റോഡിൽ 26 ദിവസം മാത്രം പ്രായമുള്ള ആൺകുഞ്ഞിനെ വീട്ടിനുള്ളിൽ മരിച്ച നിലയിൽ കണ്ടെത്തി. നാദാപുരം റോഡ് ബൈത്തുൽ ജദീദിൽ, സയിദ് അഹമ്മദ് മുജാഹിർ ആണ് മരണപ്പെട്ടത്.
മുലപ്പാൽ നൽകിയ ശേഷം കുഞ്ഞിനെ വീട്ടുകാർ ഉറക്കിക്കിടത്തിയിരുന്നു. കുറച്ചുസമയത്തിന് ശേഷം പരിശോധിച്ചപ്പോഴാണ് കുഞ്ഞിനെ ചലനമറ്റ നിലയിൽ കണ്ടെത്തിയത്. പരിഭ്രാന്തരായ ബന്ധുക്കൾ ഉടൻ തന്നെ കുഞ്ഞുമായി വടകരയിലെ ബേബി മെമ്മോറിയൽ ഹോസ്പിറ്റലിൽ എത്തിച്ചെങ്കിലും അതിനോടകം തന്നെ മരണം സംഭവിച്ചിരുന്നു.
കുഞ്ഞിന്റെ പെട്ടെന്നുള്ള മരണത്തിനുള്ള കാരണം വ്യക്തമല്ല. സംഭവമറിഞ്ഞ് ചോമ്പാല പോലീസ് സ്ഥലത്തെത്തി പ്രാഥമിക നടപടികൾ സ്വീകരിച്ചു. മരണകാരണം കൃത്യമായി കണ്ടെത്താനായി ഇൻക്വസ്റ്റ് നടപടികൾക്ക് ശേഷം മൃതദേഹം കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി. പോസ്റ്റ്മോർട്ടത്തിന് ശേഷമേ യഥാർത്ഥ മരണകാരണം വ്യക്തമാകൂ എന്ന് പോലീസ് അറിയിച്ചു.
