ന്യൂഡൽഹി : മെസേജിംഗ് പ്ലാറ്റ്ഫോമായ ടെലിഗ്രാമിന് വലിയ തിരിച്ചടി. താത്കാലിക നിരോധനം നീക്കണമെന്നാവശ്യപ്പെട്ട് കമ്പനി സമർപ്പിച്ച ഹർജി ഡൽഹി ഹൈക്കോടതി തള്ളി. നിരോധനവുമായി ബന്ധപ്പെട്ട കേന്ദ്രസർക്കാരിന്റെ നടപടി നിയമപരമാണെന്ന് കോടതി വ്യക്തമാക്കി.
ജസ്റ്റിസ് തേജസ് കരിയയുടെ ബെഞ്ചാണ് നിർണായക വിധി പ്രസ്താവിച്ചത്. ദേശീയ സുരക്ഷയും അടിയന്തര സാഹചര്യങ്ങളും പരിഗണിച്ചാണ് കേന്ദ്രസർക്കാർ നടപടി സ്വീകരിച്ചതെന്നും, അത് നിയമപരമായ എല്ലാ നടപടിക്രമങ്ങളും പാലിച്ചുകൊണ്ടാണെന്നും കോടതി നിരീക്ഷിച്ചു.
ഐടി ആക്ടിലെ Section 69A പ്രകാരമുള്ള നടപടിക്രമങ്ങൾ പൂർണമായും പാലിച്ചിട്ടുണ്ടെന്ന് കോടതി ചൂണ്ടിക്കാട്ടി. സർക്കാർ ഏർപ്പെടുത്തിയ നിയന്ത്രണം ആവശ്യത്തിനൊത്ത ഏറ്റവും കുറഞ്ഞ പരിധിയിലുള്ള ഇടപെടലാണെന്നും കോടതി വിലയിരുത്തി.
ടെലിഗ്രാം തീവ്രവാദ പ്രവർത്തനങ്ങൾക്കും നിയമവിരുദ്ധ ആശയവിനിമയങ്ങൾക്കും ഉപയോഗിക്കപ്പെടുന്ന പ്രധാന ഡിജിറ്റൽ പ്ലാറ്റ്ഫോമുകളിലൊന്നായി മാറിയെന്നായിരുന്നു കേന്ദ്രസർക്കാരിന്റെ വാദം. ദേശീയ സുരക്ഷയെ ബാധിക്കുന്ന സാഹചര്യം നിലനിൽക്കുന്നതിനാൽ താത്കാലിക നിരോധനം അനിവാര്യമാണെന്നും സർക്കാർ കോടതിയെ അറിയിച്ചു.
ടെലിഗ്രാമിന്റെ വാദങ്ങളും കേന്ദ്രസർക്കാരിന്റെ വിശദീകരണങ്ങളും വിശദമായി കേട്ട ശേഷമാണ് ഹൈക്കോടതി അന്തിമ വിധി പ്രസ്താവിച്ചത്.
ഡിജിറ്റൽ പ്ലാറ്റ്ഫോമുകളുടെ ഉത്തരവാദിത്വവും ദേശീയ സുരക്ഷയും തമ്മിലുള്ള തുല്യതയെ കുറിച്ചുള്ള ചർച്ചകൾ ശക്തമാകുന്നതിനിടെയാണ് ഡൽഹി ഹൈക്കോടതിയുടെ ഈ നിർണായക ഉത്തരവ് വന്നിരിക്കുന്നത്.
