തിരുവനന്തപുരം: സിഎംആര്എല് എക്സാലോജിക് സാമ്പത്തിക ഇടപാട് അന്വേഷണത്തില് നിര്ണായക നീക്കവുമായി എന്ഫോഴ്സ്മെന്റ് ഡയറക്ടറേറ്റ് (ഇഡി). കേസുമായി ബന്ധപ്പെട്ട അന്വേഷണത്തിന്റെ ഭാഗമായി വീണയെ വീണ്ടും ചോദ്യം ചെയ്യാന് വിളിപ്പിച്ച് ഈ മാസം 29ന് ഹാജരാകാന് സമന്സ് നല്കി. അന്വേഷണത്തിന്റെ തുടര്നടപടികള്ക്കായി കൂടുതല് രേഖകളും തെളിവുകളും ശേഖരിക്കുന്നതിലാണ് ഇഡി ഇപ്പോള് ശ്രദ്ധ കേന്ദ്രീകരിച്ചിരിക്കുന്നത്.
അന്വേഷണവുമായി ബന്ധപ്പെട്ട സുപ്രധാന രേഖകള് സീരിയസ് ഫ്രോഡ് ഇന്വെസ്റ്റിഗേഷന് ഓഫീസില് (എസ്എഫ്ഐഒ) നിന്ന് ഇതുവരെ ഇഡിക്ക് ലഭിച്ചിട്ടില്ല. കോടതി അനുവദിച്ച 10 ദിവസത്തെ സമയപരിധി കഴിഞ്ഞിട്ടും രേഖകള് കൈമാറാത്ത സാഹചര്യത്തില്, ആവശ്യമായ വിവരങ്ങള് ലഭ്യമാക്കുന്നതിനായി എസ്എഫ്ഐഒ ഉദ്യോഗസ്ഥരുമായി വീണ്ടും ചര്ച്ച നടത്താനാണ് ഇഡിയുടെ തീരുമാനം. ആകെ 134 രേഖകളാണ് അന്വേഷണസംഘം പ്രതീക്ഷിക്കുന്നത്.
മുമ്പ് ലഭിച്ചിരുന്ന വിവരങ്ങള് പ്രകാരം രേഖകള് ലഭിച്ചതിന് ശേഷമേ വീണയെ വീണ്ടും ചോദ്യം ചെയ്യുന്നതിനുള്ള തീയതി നിശ്ചയിക്കൂ എന്നായിരുന്നു സൂചന. എന്നാല് അന്വേഷണം വേഗത്തിലാക്കുന്ന സാഹചര്യത്തിലാണ് പുതിയ സമന്സ് നല്കിയിരിക്കുന്നത്.
ഇതിനിടെ കേസില് താല്ക്കാലിക സ്വത്ത് മരവിപ്പിക്കല് നടപടികളുമായി ബന്ധപ്പെട്ട തെളിവുകള് ശേഖരിക്കുന്ന പ്രവര്ത്തനവും പുരോഗമിക്കുകയാണ്. വിവിധ ബാങ്കുകളിലായി 242 അക്കൗണ്ടുകളില് സൂക്ഷിച്ചിരുന്ന ഏകദേശം 18 കോടി രൂപയാണ് ഇഡി മരവിപ്പിച്ചത്. ഇതില് വീണയുടെ രണ്ട് ബാങ്ക് അക്കൗണ്ടുകളും എക്സാലോജിക് കമ്പനിയുടെ ഒരു അക്കൗണ്ടും ഉള്പ്പെട്ടിട്ടുണ്ട്.
കേസിലെ സാമ്പത്തിക ഇടപാടുകളുടെ മുഴുവന് ശൃംഖലയും പരിശോധിച്ച് കൂടുതല് വ്യക്തത വരുത്താനാണ് അന്വേഷണ ഏജന്സികളുടെ ശ്രമം. എസ്എഫ്ഐഒയില് നിന്ന് ലഭിക്കാനുള്ള രേഖകളും തുടര്ചോദ്യം ചെയ്യലുകളും അന്വേഷണത്തിന്റെ അടുത്ത ഘട്ടത്തില് നിര്ണായകമാകുമെന്നാണ് വിലയിരുത്തല്.
