കോട്ടയം: മുൻ ഗതാഗത മന്ത്രിയും എൽ ഡി എഫ് നേതാവുമായ കെ.ബി ഗണേഷ് കുമാറിനെ എൻഎസ്‌എസ് ഡയറക്ടർ ബോർഡിൽ നിന്ന് ഒഴിവാക്കി. ഡയറക്ടർ ബോർഡ് അംഗത്വം എൻഎസ്‌എസ് നേതൃത്വം പുതുക്കി നൽകിയില്ല. പകരം ബി.ആർ.കെ ബാബുവിനെ ബോർഡിലേക്ക് ഉൾപ്പെടുത്തി.
ഒമ്പതംഗ ഡയറക്ടർ ബോർഡിലെ അംഗങ്ങളുടെ കാലാവധി അവസാനിച്ചതിനെ തുടർന്നാണ് പുനഃസംഘടന നടന്നത്. കാലാവധി കഴിഞ്ഞ മറ്റ് എട്ട് അംഗങ്ങൾക്കും അംഗത്വം പുതുക്കി നൽകിയപ്പോൾ ഗണേഷ് കുമാറിനെ മാത്രം ഒഴിവാക്കുകയായിരുന്നു.
ഗണേഷ് കുമാറും എൻഎസ്‌എസ് നേതൃത്വവും തമ്മിലുള്ള സമീപകാല ഭിന്നതകളാണ് ഈ തീരുമാനത്തിന് പിന്നിലെ പ്രധാന കാരണമെന്ന സൂചന ശക്തമാണ്. പത്തനാപുരം താലൂക്ക് യൂണിയനുമായി ബന്ധപ്പെട്ട തർക്കങ്ങളും സംഘടനയ്‌ക്കുള്ളിലെ അഭിപ്രായവ്യത്യാസങ്ങളും ഗണേഷിന് തിരിച്ചടിയായെന്നാണ് വിലയിരുത്തൽ.
എല്ലാ നടപടികളും സംഘടനയുടെ ജനാധിപത്യ മര്യാദകൾ പാലിച്ചാണെന്ന് സംഭവത്തിൽ പ്രതികരിച്ച എൻഎസ്‌എസ് ജനറൽ സെക്രട്ടറി ജി സുകുമാരൻ നായർ, വ്യക്തമാക്കി. “വർഷങ്ങളായി അവസരം ലഭിക്കാത്തവർക്ക് കൂടി അവസരം നൽകേണ്ടതുണ്ട്. ഓരോ താലൂക്ക് യൂണന്റെ പ്രവർത്തനവും വിലയിരുത്തിയാണ് മാറ്റങ്ങൾ വരുത്തുന്നത്. ഇത്തവണ ഒരാളെ മാത്രമാണ് മാറ്റിയത്,” എന്ന് അദ്ദേഹം പറഞ്ഞു.
എൻഎസ്‌എസിന്റെ പരമോന്നത ഭരണസമിതിയിൽ നിന്ന് ഗണേഷ് കുമാർ പുറത്താകുന്നത് അദ്ദേഹത്തിന്റെ സംഘടനാ സ്വാധീനത്തിന് വലിയ തിരിച്ചടിയായാണ് രാഷ്‌ട്രീയ നിരീക്ഷകർ കാണുന്നത്.
