ന്യൂഡല്‍ഹി: ഇന്ത്യന്‍ ക്രിക്കറ്റിലെ ഏറ്റവും സ്വാധീനമുള്ള നായകരിലൊരാളായ രോഹിത് ശര്‍മ്മയ്‌ക്ക് രാജ്യത്തിന്റെ നാലാമത്തെ ഉയര്‍ന്ന സിവിലിയന്‍ ബഹുമതിയായ പദ്മശ്രീ സമ്മാനിച്ച് രാഷ്‌ട്രം ആദരിച്ചു. ന്യൂഡല്‍ഹിയിലെ രാഷ്ട്രപതി ഭവനില്‍ നടന്ന ചടങ്ങില്‍ രാഷ്ട്രപതി ദ്രൗപദി മുര്‍മുവില്‍ നിന്നാണ് മുന്‍ ഇന്ത്യന്‍ നായകന്‍ പുരസ്‌കാരം ഏറ്റുവാങ്ങിയത്. ലളിതമായ നടപ്പും പുഞ്ചിരിയോടെയുള്ള സ്വീകരണവും ചടങ്ങിലെ ശ്രദ്ധേയ നിമിഷങ്ങളായി.
ജനുവരിയില്‍ പ്രഖ്യാപിച്ച പദ്മ പുരസ്‌കാര പട്ടികയില്‍ ഉള്‍പ്പെട്ടിരുന്ന രോഹിത്തിന് ഔദ്യോഗിക ചടങ്ങിലാണ് ബഹുമതി കൈമാറിയത്. ക്രിക്കറ്റിനോടുള്ള സമര്‍പ്പണത്തിനും രാജ്യത്തിനായി നേടിയ ചരിത്ര നേട്ടങ്ങള്‍ക്കും ലഭിച്ച അംഗീകാരമായാണ് ഈ പുരസ്‌കാരം വിലയിരുത്തപ്പെടുന്നത്.
ക്യാപ്റ്റനെന്ന നിലയില്‍ ഇന്ത്യയെ ടി20 ലോകകപ്പ് കിരീടത്തിലേക്ക് നയിച്ചതും പിന്നീട് ചാമ്പ്യന്‍സ് ട്രോഫി വിജയത്തിലേക്ക് കൈപിടിച്ചുയര്‍ത്തിയതുമാണ് രോഹിത്തിന്റെ നേതൃത്വത്തിലെ പ്രധാന പൊന്‍തൂവലുകള്‍. 2013-ലെ ചാമ്പ്യന്‍സ് ട്രോഫി ജേതാവായ ടീമിലും അദ്ദേഹം നിര്‍ണായക സാന്നിധ്യമായിരുന്നു.
#WATCH | Delhi | Former Captain of the Indian Cricket Team, Rohit Sharma, awarded the Padma Shri by President Droupadi Murmu
(Video source: Rashtrapati Bhavan) pic.twitter.com/ckz1kc4poF
— ANI (@ANI) June 23, 2026
2023 ഏകദിന ലോകകപ്പില്‍ ആക്രമണോത്സുക ബാറ്റിംഗിലൂടെ ഇന്ത്യയ്‌ക്ക് തകര്‍പ്പന്‍ തുടക്കങ്ങള്‍ സമ്മാനിച്ച രോഹിത് ടൂര്‍ണമെന്റില്‍ 597 റണ്‍സ് നേടി റണ്‍വേട്ടക്കാരില്‍ രണ്ടാം സ്ഥാനത്തെത്തി. അതേസമയം, 2019 ലോകകപ്പില്‍ അഞ്ച് സെഞ്ചുറികളുമായി 648 റണ്‍സ് നേടി ലോക റെക്കോര്‍ഡ് കുറിച്ച പ്രകടനവും അദ്ദേഹത്തിന്റെ കരിയറിലെ ഏറ്റവും മികച്ച അധ്യായങ്ങളിലൊന്നായി തുടരുന്നു.
അതേ ചടങ്ങില്‍ ഇന്ത്യന്‍ ടെന്നീസ് ഇതിഹാസം വിജയ് അമൃത്രാജിന് പദ്മഭൂഷണും മുന്‍ ഇന്ത്യന്‍ വനിതാ ഹോക്കി നായിക സവിത പുനിയയ്‌ക്ക് പദ്മശ്രീയും സമ്മാനിച്ചു. ടോക്കിയോ ഒളിമ്പിക്‌സില്‍ ഇന്ത്യയുടെ ചരിത്രപരമായ പ്രകടനത്തില്‍ നിര്‍ണായക പങ്കുവഹിച്ച സവിത, പുരസ്‌കാരം ഏറ്റുവാങ്ങിയ ശേഷം തന്റെ ദീര്‍ഘകാല ഹോക്കി യാത്രയെ ഓര്‍ത്തെടുത്ത് വികാരാധീനയായി.
രോഹിത് ശര്‍മ്മയുടെ പദ്മശ്രീ നേട്ടം വ്യക്തിപരമായ ബഹുമതിയെന്നതിലുപരി, ഇന്ത്യന്‍ ക്രിക്കറ്റിന്റെ ആഗോള മികവിനും പുതിയ തലമുറ താരങ്ങള്‍ക്ക് പ്രചോദനമാകുന്ന അദ്ദേഹത്തിന്റെ സംഭാവനകള്‍ക്കും ലഭിച്ച ദേശീയ അംഗീകാരമായാണ് കായികലോകം കാണുന്നത്.
