തിരുവനന്തപുരം: ചാന്നാങ്കരയിലെ ബിസ്മി ഐസ് പ്ലാന്റില് അമോണിയ വാതകം ചോര്ന്നതിനെ തുടര്ന്ന് ഒരു തൊഴിലാളിക്ക് ശാരീരിക അസ്വസ്ഥത അനുഭവപ്പെട്ടു. വൈകിട്ട് ആറുമണിയോടെയുണ്ടായ സംഭവത്തെ തുടര്ന്ന് പമ്പ് ഓപ്പറേറ്ററായി ജോലി ചെയ്തിരുന്ന അസം സ്വദേശിയെ ഉടന് ആശുപത്രിയിലേക്ക് മാറ്റി. പ്രാഥമിക വിവരങ്ങള് പ്രകാരം, പ്ലാന്റിലെ വാല്വില് ഉണ്ടായ സാങ്കേതിക തകരാറാണ് അമോണിയ ചോര്ച്ചയ്ക്ക് വഴിവെച്ചത്. വിവരം ലഭിച്ചതോടെ കഴക്കൂട്ടത്ത് നിന്ന് അഗ്നിരക്ഷാസേന സ്ഥലത്തെത്തി അടിയന്തര ഇടപെടല് നടത്തി.
രക്ഷാപ്രവര്ത്തനത്തിന്റെ ഭാഗമായി ചോര്ച്ചയുണ്ടാക്കിയ വാല്വ് സുരക്ഷിതമായി അടച്ചതോടെ സ്ഥിതി നിയന്ത്രണവിധേയമാക്കി. സംഭവത്തെ തുടര്ന്ന് പ്രദേശത്ത് ജാഗ്രത ശക്തമാക്കിയിട്ടുണ്ടെന്നും അധികൃതര് അറിയിച്ചു. അമോണിയ ചോര്ച്ചയുടെ സാഹചര്യവും സാങ്കേതിക തകരാറിന്റെ കാരണവും സംബന്ധിച്ച് കൂടുതല് പരിശോധനകള് പുരോഗമിക്കുകയാണെന്ന് ബന്ധപ്പെട്ട വൃത്തങ്ങള് അറിയിച്ചു. നിലവില് ആശുപത്രിയില് പ്രവേശിപ്പിച്ച തൊഴിലാളിയുടെ ആരോഗ്യനില തൃപ്തികരമാണെന്നാണ് ലഭിക്കുന്ന വിവരം.
