ന്യൂയോര്ക്ക്: ലോകകപ്പില് സൂപ്പര് സ്ട്രൈക്കര് ഏര്ലിങ് ഹാളണ്ടിന്റെ നിര്ണായക ഗോളില് ഐവറി കോസ്റ്റിനെ കീഴടക്കി നോര്വെ പ്രീക്വാര്ട്ടറിലേക്ക്. ഒന്നിനെതിരെ രണ്ട് ഗോളുകള്ക്കാണ് നോര്വെയുടെ ജയം. മത്സരത്തിന്റെ 86-ാം മിനിറ്റില് ഹാളണ്ട് നേടിയ വിജയഗോളാണ് നോര്വെയെ അടുത്ത റൗണ്ടിലെത്തിച്ചത്. പ്രീക്വാര്ട്ടറില് അഞ്ചു തവണ ലോകചാമ്പ്യന്മാരായ ബ്രസീലിനെയാണ് നോര്വെ നേരിടുക.
മത്സരത്തിന്റെ തുടക്കത്തില് ആക്രമണ ഫുട്ബോള് പുറത്തെടുത്തത് ഐവറി കോസ്റ്റായിരുന്നു. നോര്വെ ഗോള്മുഖത്ത് തുടര്ച്ചയായി സമ്മര്ദം സൃഷ്ടിച്ചെങ്കിലും ഗോള്കീപ്പര് ഓര്ജാന് നൈലന്ഡിന്റെ മികച്ച സേവുകള് ടീമിനെ രക്ഷിച്ചു. 35-ാം മിനിറ്റില് ഇമ്മാനുവല് അഗ്ബദൗവിന്റെ ശ്രമം നൈലന്ഡ് തകര്പ്പന് സേവിലൂടെ തടഞ്ഞു.
ആക്രമണങ്ങള്ക്കിടെ 39-ാം മിനിറ്റില് വിങ്ങര് അന്റോണിയോ നൂസയാണ് നോര്വെയെ മുന്നിലെത്തിച്ചത്. ബോക്സിന്റെ ഇടതുവശത്തുനിന്നുള്ള ശക്തമായ ഷോട്ട് വലയിലെത്തിച്ച് നൂസ ആദ്യപകുതിയില് ടീമിന് ലീഡ് സമ്മാനിച്ചു.
രണ്ടാം പകുതിയില് സമനിലയ്ക്കായി ആക്രമണം ശക്തമാക്കിയ ഐവറി കോസ്റ്റ് 74-ാം മിനിറ്റില് ലക്ഷ്യം കണ്ടു. പകരക്കാരനായി ഇറങ്ങിയ അമദ് ഡിയാലോ നോര്വെ പ്രതിരോധത്തെ ഡ്രിബിള് ചെയ്ത് മറികടന്ന് മനോഹരമായ ഫിനിഷിലൂടെ സമനില നേടി. നേരത്തെ ടോര്ബോണ് ഹെഗ്ഗമിന്റെ ഉറച്ച ഷോട്ട് ഗോള്ലൈന് സേവിലൂടെ രക്ഷിച്ചതും അമദ് ഡിയാലോയായിരുന്നു.
മത്സരം എക്സ്ട്രാ ടൈമിലേക്ക് നീങ്ങുമെന്ന് തോന്നിച്ച നിമിഷത്തിലാണ് ഹാളണ്ട് തന്റെ ക്ലാസ് തെളിയിച്ചത്. 86-ാം മിനിറ്റില് പാട്രിക് ബെര്ഗ് നല്കിയ കൃത്യമായ പാസ് വലയിലെത്തിച്ച് ഹാളണ്ട് നോര്വെയ്ക്ക് വിജയഗോള് സമ്മാനിച്ചു. അവസാന മിനിറ്റുകളില് ഐവറി കോസ്റ്റ് സമനിലയ്ക്കായി സര്വശക്തിയും പ്രയോഗിച്ചെങ്കിലും നോര്വെ പ്രതിരോധവും ഗോള്കീപ്പര് നൈലന്ഡും ഉറച്ചുനിന്നു.
ഈ ഗോളോടെ ലോകകപ്പില് അഞ്ചാം ഗോള് നേടിയ ഹാളണ്ട്, ഗോള്ഡന് ബൂട്ടിനായുള്ള പോരാട്ടത്തില് മെസിക്കും എംബാപ്പെയ്ക്കും പിന്നിലായി ശക്തമായ സാന്നിധ്യം അറിയിച്ചിരിക്കുകയാണ്. ഇനി ലോകകപ്പിലെ ഏറ്റവും ആവേശകരമായ പ്രീക്വാര്ട്ടര് പോരാട്ടങ്ങളിലൊന്നില് ബ്രസീലിനെ നേരിടാനാണ് നോര്വെയുടെ ലക്ഷ്യം.
