കൊച്ചി: നടൻ ജോയ് മാത്യു ‘അമ്മ’ നിർവാഹക സമിതിയിൽ നിന്ന് രാജിവച്ചു. സംഘടന ഇന്ന് പൊതുജനങ്ങൾക്കുമുന്നിൽ അപഹാസ്യരായിത്തീരാൻ പ്രധാന കാരണം താനടക്കമുള്ള പുതിയ ഭരണസമിതിയുടെ പിടിപ്പുകേടാണെന്ന് രാജിക്കത്തിൽ ജോയ് മാത്യു വ്യക്തമാക്കി.
നിർവാഹക സമിതി അംഗങ്ങൾക്കിടയിൽ ജനാധിപത്യബോധമോ പരസ്പര ബഹുമാനമോ ഇല്ലെന്നും അദ്ദേഹം ആരോപിച്ചു. ആരോപണ-പ്രത്യാരോപണങ്ങൾക്കും പൊലീസിൽ പരാതിപ്പെടുന്ന സാഹചര്യങ്ങളിലേക്കും സംഘടന എത്തിയത് അതീവ നിരാശാജനകമാണെന്നും രാജിക്കത്തിൽ പറയുന്നു.
ഭരണസമിതിയിലേക്ക് വന്നവരുടെ ചെറിയ ഈഗോയും വലിയ അധികാരമോഹവും സംഘടനയെ പൊതുസമൂഹത്തിൽ പരിഹാസ്യമായി മാറ്റിയെന്ന് ജോയ് മാത്യു വിമർശിച്ചു. നിലവിലെ സാഹചര്യത്തിൽ സംഘടന മുന്നോട്ടുപോകുന്ന രീതിയിൽ താൻ കടുത്ത ഖേദത്തിലാണെന്നും വ്യക്തമാക്കി.
അശേഷം ജനാധിപത്യബോധമില്ലാത്ത ഒരു സംഘത്തിൽ യാതൊന്നും ഫലപ്രദമായി പ്രവർത്തിക്കാൻ കഴിയാത്ത അവസ്ഥയാണുള്ളതെന്ന് ചൂണ്ടിക്കാട്ടിയ ജോയ് മാത്യു, മികച്ച പ്രവർത്തനവും ആരോഗ്യകരമായ ചർച്ചകളും തീരുമാനങ്ങളും പ്രതീക്ഷിച്ച് തന്നെ തിരഞ്ഞെടുത്ത ‘അമ്മ’ അംഗങ്ങളോട് ആത്മാർത്ഥമായി ക്ഷമ ചോദിക്കുന്നുവെന്നും രാജിക്കത്തിൽ രേഖപ്പെടുത്തി.
